JEREMIAH
Jeremiah
Jeremiah cauk hi a tanglei bantuk hin òhen nga ah òhen an si. 1. Jeremiah a auhnak; 2. Judah ram uktu Josiah, Jehoiakim, Jehoiachin, le Zedekiah hna chan lioah Pathian nih Judah mi le an bawi pawl sinah a chimhmi hna bia; 3. Jeremiah cazi Baruch nih a òialmi bia chungin òial òhanmi bia; cu bia hna cu Jeremiah kong le Jeremiah nih thil umtuning le a um òhan ding kong a rak chimmi hna an si. 4. Ram dang hna kong he pehtlai in Bawipa bia Jeremiah nih a chimmi hna; 5. Jerusalem rawhnak le Babilon saltannak tuanbia pawl an si.
Jeremiah hi mi thil hngal kho ngai a si i a miphun kha a daw ngaingaimi a si. An cung i a tlung dingmi thil kha chim a duh hrimhrim lo nain chim lo awk a òhat lo caah a chim hna. Pathian nih a profet si awk i a auh ruangah harnak a inmi kong kha lungfak ngaiin a chim hna. Pathian bia cu a lung chungah khan mei bantukin a lin i chim loin a um in a um kho lo.
Jeremiah bia lakah hin a biapi bikbik hna nih cun Jeremiah chan tiang lawng kha si loin Jeremiah chan leng tiang zong kha an chim i cu chan cu biakam thar chan, Pathian mi hna nih saya hau loin Pathian biakamnak an lung chungah an i òial lainak kong kha a si (31.31-34).
1
Jeremiah
1 Jeremiah bia, amah cu Benjamin ram chung Anathoth khua i a ummi tlangbawi hna chung mi Hilkiah fapa a si;
2 Amah sinah cun Bawipa bia cu Judah siangpahrang Amon fapa Josiah a bawi kum hleithum kum ah a phan; Ref 1.2: 2Sia 22.3§23.27; 2Cha 34.8§35.19
3 Judah siangpahrang Josiah fapa Jehoiakim chan zongah khan a phan i Josiah fapa Zedekiah, Judah siangpahrang, a bawi kum hleikhatnak a dongh tiang khan a phan. Cu kum thla nganak chungah khan Jerusalem mi cu sal ah khan kalpi an si. Ref 1.3: 2Sia 23.36§24.7; 2Cha 36.5-8; 2Sia 24.18§25.21; 2Cha 36.11-21
Jeremiah Auhnak
4 Cun Bawipa bia cu ka sinah a ra i,
5 “Paw chung i kan ser hlanah kan hngalh i na chuah hlanah kan thianter cang;
Nangmah cu miphun hna ca i profet ah kan chiah cang,” tiah a ti.
6 Khi tikah kei nih ka thawh i, “Aa, Bawipa Pathian! Zohhmanh, ngakchiate men ka si i biachim ka thiam lo,” tiah ka ti.
7 Sihmanhsehlaw Bawipa nih a ka thawh i, “Ngakchiate men ka si, ti hlah; Zeicahtiah cu hna sinah cun va kal, tiah kan tinak ah na kal lai i nawl kan pekmi paoh kha na chim lai.
8 Annih cu ahohmanh òih hna hlah. Zeicahtiah na sinah ka um i kan huhphenh lai”, tiah Bawipa nih a ti.”
9 Khi tikah Bawipa nih a kut cu a hun samh i ka ka kha a tawngh; cun Bawipa nih cun a ka thawh i, “Zohhmanh, ka bia cu na ka chungah ka chiah cang hna.
10 Zohhmanh nihin ah hin nangmah cu miphun hna cung le pennak hna cungah, phawi awk le òheh awkah, hrawh awk le hral awkah, sak awk le phun awkah kan chiah cang,” tiah a ti.
Langhnak Pahnih
11 Cun Bawipa bia cu ka sinah a ra i, “Jeremiah, zeidah na hmuh?” tiah a ti.
12 Cun kei nih, “Tuan tein a parmi almond kung ka hmuh,” tiah ka ti. “Na hmaan, zeitintiah kaa tinhmi kha tlinter awkah tuan tein ka tho,” tiah a ti.
13 Bawipa bia cu a voi hnihnak ka sinah a phan òhan i, “Zeidah na hmuh?” tiah a ti. Cun kei nih, “A tlok hluahmahmi um, chaklei in hika leiah a sawnmi ka hmuh,” tiah ka ti.
14 Cun Bawipa nih a ka thawh i, “Hi ram chung i a ummi vialte hna cungah chaklei in òhat lonak a rung tlung lai.
15 Zeicahtiah zohhmanh, chaklei ram hna chung i a ummi miphun vialte kha ka kawh hna, tiah Bawipa nih a ti; cun annih cu an ra lai i Jerusalem kutka luhnak hna ah khan le a velchum vampang vialte hna pawng le Judah ram khua vialte ah khan an bawiòhutdan cu an chiah cio hna lai.
16 Keimah kha an ka hlawt i pathian dang hna sinah zihmui an khangh i anmah kut lila in sermi an biaknak òhat lonak vialte ruangah an cungah ka biakhiahnak cu ka chim lai.
17 Sihmanhsehlaw nang cu na lung òhawng ko, tho law nawl kan pekmi vialte kha chim hna. Annih ruangah na lung dong hlah, atu i na lung a dongh ahcun an hmaika i na um tikah na lung kaan donghter chinchin sual lai.
18 Nihin ah hin nangmah cu, Judah ram siangpahrang hna le bawi hna le tlangbawi hna le mi zapi hna he aa tawng dingah kan ser, kulhmi khuapi, thir tung le dar vampang bantuk na si lai.
19 Annih nih nangmah cu an in tuk lai, sihmanhsehlaw na sinah ka um i kan huhphenh lai caah an in tei lai lo, tiah Bawipa nih a ti,” tiah a ti.