34
Pathian Nih A Ral Kha Dan A Tat Hna Lai
1 Miphun vialte hna, ra tuah u. I pum u law ka bia ngai tuah u. Vawlei dihlak le a cung i a ummi vialte kha hika ah hin ra hna seh law ka bia cu ngai hna seh.
2 Miphun vialte hna le an ralkapbu vialte hna cungah Bawipa cu a thin a hung. Hrawh dih dingin a ruah cang hna.
3 An ruak kha an vui hna lai lo, cuka ah cun an ril liangluang ko lai i an thu thluahmah ko lai; cun tlang cu thisen nih a ciah in a ciah dih lai.
4 Ni le thlapa le arfi cu an kuai lai i leidip ah an cang lai. Van cu cazual bantukin aa zual lai i arfi cu mitsur ruang hnah òilh bantuk le theipi kung hnah tlak bantukin an òil lai. Ref 34.4: Mat 24.29; Mar 13.25; Luk 21.26; Biat 6.13-14
5 Van ah khin Bawipa nih a nam cu a timh cang i hrawh awkah a ruah cangmi Edom kha atu cu a tuk lai. Ref 34.5-17: Isa 63.1-6; Jer 49.7-22; Eze 25.12-14; 35.1-15; Amo 1.11-12; Oba 1-14; Mal 1.2-5
6 A nam ah cun an thi le an thau kha tlor zelzul in an i neh lai, raithawinak ah an hmanmi tuufa hna thi le thau bantuk le meheh thi le thau bantuk kha an si lai. Bawipa nih hi raithawinak cu Bozrah khua ah khan a tuah lai; hi bantukin a nganmi thahnak cu Edom ram ah khan a tuah lai.
7 Mi cu cawtum hrang le cawtum no bantukin an thi lai i vawlei cu thisen nih a ciah in a ciah lai i thau nih a khuh lai.
8 Hi caan hi Bawipa nih Zion kha a khamh i a ral hna cungah phu a hlam caan kha a si lai.
9 Edom ram tiva cu kattaza ah an cang lai i a vawlei cu kat ah a cang lai. Ram cu a ning piin kattaza kangh in a kang lai.
10 Chunzan in a kang lengmang ko lai i a meikhu cu a kai thluangthluan ko lai. Ram cu cuticun chan khat hnu chan khat hman awk òha ti loin a um lai i ahohmanh nih a pal zong an pal ti lai lo. Ref 34.10: Biat 14.11; 19.3
11 Chimbu le langak lawng nih an hngah lai. Bawipa nih, zeihmanh a um lomi ram, ramcar ah a ser òhan lai.
12 Ram cu uktu siangpahrang a ngei lai lo i hruaitu vialte hna kha an um ti lai lo.
13 Siangpahrang inn vialte hna le ralhau a ngeimi khua vialte hna chungah khan hling le so lawng an kho cang lai i ram-ui le chimbu kha an um lai.
14 Saram kha an tlong lai i pakhat le pakhat an i ko lai. Zan vak khuachia kha cuka ah cun a ra lai i dinhnak hmun a hung kawl lai.
15 Chimbu nih bu an i sak lai an ti an tit lai i an tlumh hna lai i an fale cu an zohkhenh hna lai. Cuka ah cun langta kha pakhat hnu pakhat in an i pum lai.
16 Thilnung kong òialnak Bawipa cauk chungah khan kawl tuah u law zeidah a chim ti kha rel tuah u. Hi thilnung vialte hna hi pakhat hmanh a baumi an um lai lo i pakhat hmanh keptu ngei lo zong an um lai lo. Cu bantukin si seh tiah Bawipa nih a ti i amah hrimhrim nih hmunkhat ah cun a umter hna lai.
17 Ram a phawtu hna cu Bawipa a si i amah nih an covo cio kha a pek hna lai. Ram chungah cun chan khat hnu chan khat an um lai i anmah ta a si zungzal cang lai.