32
Dinnak Siangpahrang
1 Ni khatkhat cu dinnak in ram a uktu siangpahrang a um te lai i a kut tang i rian a òuanmi a bawi hna zong nih dinnak in mi kha an uk ve hna lai.
2 Annih cu thlitu a hran tikah dornak le thlichia a hran tikah i thuhnak hmun bantuk an si lai. Annih cu thetse ram i tiva luang bantuk le ramcar i lungpi naidem bantuk an si.
3 An mi nih an herh an baumi kha hmu lo le thei loin an um lai lo.
4 Thin tawi in an um ti lai lo i an tuahmi kha hngalh ciammam tein an tuah lai i an chimmi kha an lung taktak a si lai.
5 Ahohmanh nih mihrut cu hmaizahmi tiah an ruat ti hna lai lo i mihrokhrawl cu lihchim lomi tiah an ruat ti hna lai lo.
6 Mihrut nih cun hruhnak bia kha a chim i zei òhat lonak dah ka tuah lai ti kha a ruat. A tuahmi le a chimmi cu Pathian zawmhtaihnak lawng kha an si i rawlòammi kha rawl a pe bal hna lo i tihalmi kha din awk zeihmanh a pe bal hna lo.
7 Amah cu miòhalo a si i thil òhalo kha a tuah; sifakmi kha an rawk khawh nakhnga a lih in khua a khan lengmang i an hmuh hngami kha hmu loin an um nakhnga aa zuam.
8 Sihmanhsehlaw lihchim lomi nih cun thil a tuah tikah lihchim lo tein a tuah i a hmaanmi thil kong ah khan fek tein a dir.
Biaceihnak le Remhòhannak
9 Nunnuam zaang-awl in a um i khuaruahharnak zeihmanh a ngei lomi nu hna, ka chimmi hi ngai tuah u.
10 Atu ah cun hnangam in nan um, sihmanhsehlaw kumvoi atu tikah hin cun lungdong in nan um lai, zeicahtiah mitsur thei lawh awk zeihmanh nan ngei lai lo.
11 Nunnuam zaang awl ngaiin khua nan sa i khuaruahharnak zeihmanh tong loin nan um; sihmanhsehlaw atu cu a ther in ther cang u. Nan puan kha i phoih dih u law nan tai ah puanchia i kaih u.
12 Vansang au in nan òang kha i cum u, zeicahtiah rawl tampi a chuah tawnnak lo hna le mitsur dum hna kha an rawk dih i
13 hling le so lawng an khat dih. Nuam tein mi nih an rak umnak inn hna le minung a khah in an rak khahnak khuapi kha òah ko hna u.
14 Siangpahrang inn hmanh kha chuahtak a si lai i an ram chung khualipi kha zamtak a si lai. Ral vennak inn hna le umnak inn hna cu saram kua an si zungzal cang lai. Khika ah ramlak laa kha an i chawk lai i tuu kha an tlong lai.
15 Asinain Pathian nih voi khat cu a thlarau kha a kan thlahhnawh òhan lai. Zeihmanh a òhahnem lomi hmun kha vawlei òha ah a cang òhan lai i lo chungin rawl tampi a chuak òhan lai.
16 Ram chung hmun kip ah mi nih dinnak le biading in rian an òuan lai.
17 Mi kip nih a dingmi thil kha an tuah cio caah daihnak le himnak zungzal in a um lai.
18 Pathian mi hna cu an inn ah khan daihnak le himnak a um lai i lung retheihnak in an luat lai.
19 (Tupi cungah khan rial an tla lai i khuapi cu an rawk lai.)
20 Rawl caah ti tampi a um lai i caw le rang caah ramhno tampi a um lai caah zeitluk in dik aho paoh an i lawmh cio lai.