39
Josef le Potifar Nupi
1 Josef cu Izipt ram ah khan an vun kalpi i Izipt mi a min Potifar a simi, Faro bawi pakhat, siangpahrang inn cawngtu hna bawi a simi nih khan Izipt ram i a vun kalpitu Ishmael mi hna sin khan a rak cawk.
2 Bawipa nih Josef cu a umpi i a caah thil kalning a tluang dih ko. A bawipa Izipt mipa inn ah cun a um. Ref 39.2: Lam 7.9
3 Bawipa nih Josef cu a umpi i zei a tuahnak hmanh ah Bawipa nih a tlam a tlinter ti kha a bawipa nih cun a hmuh.
4 Potifar cu Josef cungah khan a lung a tling i a rianòuanning zong kha a duhning a si, cucaah cun a inn le a ngeihmi thil vialte zohkhenhtu ah a chiah.
5 Cu thawk cun Josef ruangah khan Bawipa nih cun Izipt mipa innchungkhar cu thluachuah a pek hna. A inn chung i a ngeihmi thil si hna seh, a lo chung i a ngeihmi thil si hna seh. Bawipa nih cun thluachuah a pek hna.
6 Potifar nih cun a ngeihmi thil vialte cu Josef kut chungah khan a chiah dih ko i a ei awk rawl dah ti lo kha cu a dang zeihmanh a lungre aa theihmi a um lo.
Josef cu mipumruaòha midawh a si.
7 Tlawmpal ah khin a bawipa nupi nih cun a duh i, “It u sih,” tiah a ti.
8 Josef nih cun a duh lo i, “Hika ka um ruangah ka bawipa cu a inn chung thil kongah lungretheihnak zeihmanh ngei lo tein a um. A ngeihmi thil vialte kha keimah kut chungah a chiah dih.
9 Hi inn chungah hin amah tlukin nawl ka ngei i a ka sianh lomi zeihmanh a um lo, a nupi nangmah dah ti lo cu. Cucaah cun cu bantuk thil òhalo cu zeitindah ka tuah khawh lai i Pathian cungah ka sual lai?” tiah a leh.
10 Ni khat hnu ni khat a lem lengmang nain Josef nih cun zeihmanh ah a rel lo i a ihpi duh lo.
11 Asinain ni khat cu Josef kha a rian òuan awkah inn chungah khan a vung lut i cu lioah cun inn chungah khan ahohmanh an um lo;
12 cucaah a angki leng khan a rak tlaih i, “Ka ihpi ko,” tiah a ti. Sihmanhsehlaw Josef nih cun a lektak i lengah a chuak i a angki leng cu a kut chungah cun a kaltak.
13 A angkileng cu a kaltak i lengah a zaam ti kha a hmuh tikah,
14 a innchung mi kha a auh hna i, “Mah hi zohhmanh u! Ka va nih hi Hebru mipa hi kan inn ah a ratpi i atu cu a kan serhsat ngaingai cang. Ka khaan chungah a ka luhhnawh i kan it lai a ka ti i asinain a than khawh chungin ka ai.
15 Ka ai kha a theih tikah a angkileng kha ka pawngah a zaamtak i a le i lengah a chuak,” a ti.
16 Josef a bawipa inn i a òin hlantiang angkileng cu a rak i chiah ko.
17 Cun a chim hmasa bantuk òhiamòhiam khan a chimh ve i, “Khi Hebru sal kan sin i na ratpimi nih khin ka thangchiat a ka duh caah ka khaan chungah a ka luhhnawh.
18 Sihmanhsehlaw ka ai ciammam i lengah a chuak i ka pawngah a angkileng hi a lektak,” a ti.
19 “Hitihin na salpa nih ka cungah rian a òuanning a si ko,” tiah a nupi nih a rak chimh tikah Josef bawipa cu a thin a hung tuk hringhran.
20 Josef cu a tlaihter hna i siangpahrang thongtla pawl an chiah hnanak hmun ah khan an chiah i cuka ah cun a um.
21 Asinain Bawipa nih khan Josef cu a umpi i a cungah zaangfahnak a ngei i cucaah thongbawi kha a lung a hmuh ngaingai. Ref 39.21: Lam 7.9
22 Josef cu thongtla dang vialte uktu ah khan a chiah i thonginn chung i an tuahmi thil vialte kha amah nih a zoh dih hna.
23 Bawipa nih khan Josef cu a umpi i a tuahmi paoh kha a tlam a tlinter caah Josef zohkhenhmi thil a simi paoh kha cu thong bawi nih zeihmanh a zoh a herh lo.