37
1 Asinain Jakob cu a pa rak umnak Kanaan ram chungah khan a um ko.
2 Jakob tefa hna tuanbia cu hihi a si.
Josef le A Unau Hna
Kum hleisarih a simi tlangval Josef cu a unau pawl, a pa nupi Bilhah le Zilpah fapa hna he khan tuu le meheh an cawng tawn i a unau pawl nih thil òhalo an tuahmi kha a pa cu a chimh tawn.
3 Josef cu a tar hnu i a hrinmi a fa a si caah Israel nih khan a fale dang nakin a dawt khun i angki leng a saumi ban fual kha a serpiak.
4 An pa nih annih nakin Josef a dawt deuh kha a unau hna nih cun an hmuh tikah an huat ngaingai i a chawnh hmanh òhiòha in an chawn duh lo.
5 Voi khat cu Josef nih cun mang a manh i a mang cu a unau pawl kha a chimh hna. Cucaah cun an huat chinchin.
6 A thawh hna i, “Ka mang hi ngai hmanh u.
7 Lo pakhat ah hin kan dihlak in kan um i faphal kan tom len ko. Cu lioah cun ka faphal cu a tho i ding tein a dir. Cun nannih nan faphal hna nih khan an kulh i a hmaiah an kun,” a ti.
8 A unau pawl nih cun, “Kan cungah siangpahrang ka si lai tiin dahra naa ruah? Nangmah nih cun maw na kan uk ko hnga?” an ti i a mang kong a chimhmi hna ruangah cun an huat chinchin.
9 Cun Josef nih cun mang dang pakhat a manh òhan i, “Mang dang pakhat ka manh òhan i cu ka mang ah cun nika le thlapa le arfi hleikhat nih ka hmaiah an kun,” tiah a unau pawl cu a chimh hna.
10 A mang cu a pa le a unau pawl kha a chimh hna i a pa nih cun a sik i, “Zei bantuk mang dah na manh? Na nu le na unau pawl le keimah hi na sinah ra in na hmaiah an kun lai tiin maw na ruah?” a ti.
11 Josef cu a unau pawl nih khan cun an nahchuah ngaingai, sihmanhsehlaw a pa nih cun thil vialte kha a lung chungin a ruah lengmang. Ref 37.11: Lam 7.9
Izipt Ram Ah Josef An Zuar
12 An pa saòil run khalh awkah khan Josef unau pawl cu Shekhem ah khan an va kal i
13 Israel nih khan Josef cu a thawh i, “Na ule cu Shekhem ah saòil kha an khal hna. I tim law an sinah kan thlah lai,” a ti. Josef nih cun, “Kaa tim ko,” tiah a leh.
14 A pa nih cun a thawh i, “Va kal law na ule kha an dam dam lo va zoh hna law saòil zong cu an i nincan le nincan lo va zoh hna; cun bia rak ka phorh te,” a ti. Cuticun a pa nih khan Hebron nelrawn khan a thlah.
Shekhem kha a va phak tikah
15 ramlak i aa chawh len ko kha mipa pakhat nih a rak hmuh i, “Zeidah na kawl?” tiah a hal.
16 Anih nih, “Ka ule ka kawl hna,” a ti. Cun, “Khuazei ah dah saòil kha an cawngh hna ka chim tuah?” a ti.
17 Mipa nih cun, “An kal cang; Dothan ah kan kal lai an ti kha ka theih,” a ti. Cucaah Josef nih khan a ule cu a hei dawi hna i Dothan ah khan a va hmuh hna.
18 Lamhlat piin a rat lio kha an hei hmuh i an pawng a phak hlanah amah thahnak ding khua kha an rak khang.
19 An i thawh i, “Mang man pa a ra cang khih.
20 Ra u law that u sih, a ruak cu tikhor chungah kan hlonh lai; sahrang nih a seh kan ti lai. Cun a mang kha zeidah an lawh kan zoh tuah lai,” an ti.
21 An i ceih thawng kha Reuben nih a theih hna i Josef nunnak khamh kha aa zuam. “A thah cu that hlah u sih,” a ti.
22 Cun, “That hlah u, ram lak tikhor chungah hin thla u law a thah cu that hlah u,” a ti hna. Hiti a ti hna cu a nunnak kha ka khamh lai i ka pa sinah ka kuat òhan lai ti a duh caah a si.
23 Josef nih a ule cu a hei phanh hna tikah a angki leng banfual kha an rak hlih i
24 tikhor car ah an thlak.
25 Rawl an ei lioah khin Gilead lei in a rami Ishmael mi khualtlawng bu khat kha an hmuh hna. An kalauk cu mitsur thei car le hangòamh a phunphun kha Izipt i vung zuar awkah an phor.
26 Judah nih khan a unau pawl cu a thawh hna i, “Kan naupa cu kan thah i kan i pheh ah hin zeidah kan miak lai?
27 Ishmael mi hna sinah khin zuar u sih. Cu ti kan tuah ahcun amah thah kha a herh lai lo, a ngaingai ti ahcun kan nau pei a si, kan thi le kan sa pei a si ve,” a ti. A unau pawl cu an hna a tla.
28 Cun Midian chawlet pawl cu an ra phak tikah Josef cu tikhor chung khan an va chuah i Ishmael mi sinah khan ngun tangka phar kul ah an zuar i annih nih Izipt ram ah khan an kalpi. Ref 37.28: Lam 7.9
29 Reuben nih khan tikhor cu a va zoh òhan i Josef kha a rak um ti lo cu a hmuh tikah a ngaihchiatnak langhternak ah a thilpuan kha a thleh hna.
30 A unau pawl sinah khan a va kir i, “Ngakchiapa kha a um ti lo. Zeitindah ka tuah lai?” a ti.
31 Cun meheh pakhat an thah i Josef angki leng kha a thi ah cun an hnim.
32 A angki leng cu an pa sinah khan an hei kalpi i, “Hi hi kan hmuh ko. Na fapa ta a si maw si lo zoh tuah,” an ti.
33 Amah nih cun a rak hngalh zau i, “Asi, ka fapa ta a si. Sahrang nih a seh cang ko hi ta. Josef cu a thleh a bauh dih cang ko hi ta!” a ti.
34 Jakob nih a thilpuan kha a thleh hna i a tai ah a ngaihchiat langhternak ah puan nak aa menh i saupi a fapa cu a òah lengmang.
35 A fapa vialte le a fanu vialte hna nih khan hnemh an i zuam, sihmanhsehlaw an hnemhnak kha duh loin a thawh hna i, “Mithi khua Sheol ah ka fapa zunngai in kal ko ning,” a ti hna.
36 Cun Midian pawl nih khan Josef cu Izipt ram ah khan Faro bawi pakhat a simi Potifar sinah an va zuar; amah cu siangpahrang inn cawngtu hna haotu bawi a si.