40
Puan Biakinn Cu Pathian Sinah An Pek
1 Bawipa nih Moses cu a thawh i,
2 “Thla khatnak thla ni khatnak ni ah Pathian umnak thlam pumhnak thlam cu na dirter lai.
3 Biakamnak hngalhter òhantu lungtlap hna umnak kuang kha a chungah na chiah lai i puanzar na khuh lai.
4 Cabuai kha a chungah na chiah lai i a cungah a thilri vialte kha na chiah hna lai. Meiinn tung zong kha na luhpi lai i a cungah a meiinn kha na chiah hna lai.
5 Zihmui khanghnak sui biakòheng kha, biakamnak lungtlap hna umnak kuang hmaiah khan na chiah lai i pumhnak thlam luhnak innka ah khan puanzar kha na zar lai.
6 Pumhnak thlam hmaiah khan khangh thawinak biakòheng kha na chiah lai.
7 Kut òawlnak hmaihum kha pumhnak thlam le biakòheng karlak ah khan na chiah lai i a chungah ti na chiah lai.
8 A kulhtu tual kulhnak puanzar kha na zar hna lai i tual luhnak kutka puanzar kha na zar hna lai.
9 “Cun thuhnak chiti kha naa lak lai i Pathian umnak thlam le a chung i a ummi thil vialte kha na thuh hna lai. Cu thlam cu le a thilri vialte kha Pathian sinah na pek hna lai i cuticun thil zarh ah a cang lai.
10 Cun khanghthawinak biakòheng le a thilri vialte kha chiti na thuh hna lai. Cuticun Pathian sinah na chanh hna lai i a zarh ngaingaimi thil ah an cang lai.
11 Kut òawlnak hmaihum le a danh zong kha chiti na thuh hna lai i Pathian sinah na pek hna lai.
12 “Aaron le a fapa hna kha pumhnak thlam innka ah na ratpi hna lai i ti in na kholhter hna lai.
13 Aaron kha puan thiang cu na aihter lai i chiti na thuh lai i cuticun na thianter lai i ka tlangbawi rian kha a òuan lai.
14 A pawngah khan a fapale kha na ratpi hna lai i angki kha na aih hna lai.
15 Cun an pa chiti na thuh bantuk khan chiti na thuh ve hna lai i ka tlangbawi rian kha an òuan lai. Chiti na thuhmi hna nih khan dong loin tlangbawi a siter hna lai,” tiah a ti.
16 Bawipa nih a fial bantuk tein zeizong vialte kha Moses nih a tuah dih.
17 Cucaah Izipt ram in an chuah hnu a kum hnihnak, thla khatnak thla ni khatnak ni ah khan Pathian umnak thlam cu an dirter.
18 Moses nih khan a dirter. A danh vialte kha a chiah hna, a vampang kha a dirter hna, a thingthluan kha a hrolh hna, a tung kha a dirter hna.
19 Bawipa nih a fial bantuk te khan Pathian umnak thlam chungah cun thlam kha a samh i thlam cu a khuh kha a khuh.
20 Cun biakamnak lungtlap kha a lak hna i kuang chungah khan a chiah hna. Kuang i thlaihmi sui kual ah khan lang kha a hrolh hna i a chin kha a chinh.
21 Cun kuang cu Pathian umnak thlam chungah khan a chiah i a phentu puanzar kha a zar hna. Cuticun Bawipa nih a chimh bantuk te khan biakamnak lungtlap umnak kuang kha him tein a umter.
22 Cun cabuai kha pumhnak thlam chungah khan a chiah, cucu Pathian umnak thlam chaklei kamah khan a si i puanzar lengah khan a si i
23 a cungah khan Pathian hmai i hunmi changreu kha a hun hna, cucu Bawipa nih a chimh ning te khan a si.
24 Meiinn tung kha pumhnak thlam chungah cun cabuai he hmaitonh in a chiah, cucu thlam thlanglei kamah khan a si.
25 Bawipa hmaiah meiinn tung cungah cun meiinn kha a chiah hna i cucu Bawipa nih a chimhning te khan a si.
26 Sui biakòheng kha pumhnak thlam chungah khan, puanzar he hmaitonh in a chiah.
27 Bawipa nih a fial bantuk khan a cungah khan a rim a thawmi zihmui kha a khangh.
28 Thlam luhnak innka puanzar kha a zar hna.
29 Pumhnak thlam innka ah khan khangh thawinak biakòheng kha a chiah. Bawipa nih a chimh bantukin cu cungah cun khangh thawinak kha a thawi i ei awk thawinak kha a khangh hna.
30 Thlam le biakòheng karah cun kut òawlnak hmaihum kha a hun i kut òawlnak dingah ti kha a chungah cun a chiah.
31 Moses le Aaron le Aaron fapa hna nih khan an kut le an ke kha an i òawl.
32 Bawipa nih Moses a chimh bantuk te khan pumhnak thlam i an luh le biakòheng lei i an kal ah, an i òawl lengmang.
33 Thlam le biakòheng kulhtu tual kulhnak puanzar kha a zar hna. Cuticun Moses nih rian vialte kha a lim.
Pumhnak Thlam Cung Minmei
(Nam 9.15-23)
34 Pumhnak thlam cu minmei nih a huh i Bawipa sunparnak kha a chung cu a khat. Ref 40.34: 1Sia 8.10-11; Isa 6.4; Eze 43.4-5; Biat 15.8
35 Pumhnak thlam cungah cun minmei kha a um i Bawipa sunparnak cu a chung kha a khah caah Moses cu a lut kho lo.
36 Israel mi kha riahhmun pakhat in riahhmun pakhat ah an i òhial tikah Pathian umnak thlam cung i minmei kha aa òhial lawnglawng ah an i òhial tawn.
37 Minmei kha aa òhial lo ahcun annih zong riahhmun dang ah khan an i òhial ve lo, minmei aa òhial ni tiang kha an ngan tawn.
38 Pathian an sin i a um hmelchunhnak minmei cu, chun ah Pathian umnak thlam cungah khan a um i zan ah minmei chungah khan mei alh a um; cucu Israel mi nih riahhmun pakhat in pakhat ah an i thawn lengmang ah khan an hmuh zungzal.