8
Saltannak In Ezra He A Kirmi Hna
1 Siangpahrang Artazaksis a bawi lio i Babilon in keimah sinah a hung kal vemi hna cu pale chungkhar lu cio kha an si i mah hihi an tefa hna cu an si:
2 Finehas tefa hna chungin Gershom.
Ithamar tefa hna chungin Daniel.
David tefa hna chungin Shekaniah fapa Hattush,
3 Parosh tefa hna chungin Zekhariah, amah sinah cun pa 150 minthlak an si.
4 Pahath-moab tefa hna chungin Zerahiah fapa Eliehoenai, amah he cun pa 200.
5 Zattu tefa hna chungin, Jahaziel fapa Shekaniah, cun amah he cun pa 300.
6 Adin tefa hna chungin, Jonathan fapa Ebed, cun amah he cun pa 50.
7 Elam tefa hna chungin, Athaliah fapa Jeshaiah, amah he cun pa 70.
8 Shefatiah tefa hna chungin, Mikhael fapa Zebadiah, cun amah he cun pa 80.
9 Joab tefa hna chungin, Jehiel fapa Obadiah, cun amah he cun pa 218.
10 Bani tefa hna chungin, Josifiah fapa Shelomith, cun amah he cun pa 160.
11 Bebai tefa hna chungin, Bebai fapa Zekhariah, cun amah he cun pa 28.
12 Azgad tefa hna chungin Hakkatan fapa Johanan, cun amah he cun pa 110.
13 Adonikam tefa hna chungin, annih cu hnu deuh i a rami an si, an min cu Elifelet, Jeuel, le Shemaiah an si, cun anmah he pa 60.
14 Bigvai tefa hna chungin Uthai le Zakkur, cun anmah he pa 70.
15 Ahava khua i a va luangmi tiva ah ka pumh hna i khika ah zan thum kan riak. Mi zapi hna le tlangbawi hna kha ka zoh òhan hna tikah khika ah Levi fapa hna chung mi pakhat hmanh ka hmu hna lo.
16 Cun mi hruitu Eliezer, Ariel, Shemaiah, Elnathan, Jarib, Elnathan, Nathan, Zekhariah, le Meshullam le mifim Joiarib le Elnathan kha ka cah hna i
17 Kasifia hmun i hruitu a simi Iddo sinah khan ka thlah hna. Annih cu Kasifia i a ummi Iddo le a unau biakinn rianòuantu hna sin i va chim awk kha ka chimh hna, cucu zeidah a si tiah, kan Pathian inn i rianòuantu an kan kuat hna nakhnga ding kha a si.
18 Cun kan cung i a ummi kan Pathian kut velngeihnak thawngin, Israel fapa Levi fapa Mahli fapa hna chungin mifim ngaingai a simi Sherebiah le a fapa hna le a rualchan hna, hleiriat kha ka sinah an ratpi hna;
19 Hashabiah zong Merari fapa hna chung i Jeshaiah le a rualchan hna le a fapa hna, 20 hna he tiah an ratpi;
20 cu lengah David le a bawi pawl nih Levi mi hna bultawltu ah an rak thleidanmi hna biakinn rianòuantu 220 zong kha an ratpi hna. Hi hna hi an min tein òial an si dih.
21 Cun kan Pathian sinin kanmah ca le kan fale hna ca le kan thilri vialte ca i lam ding kawl awkah amah hmaiah cun kan lung kan i òhumh khawh nakhnga Ahava tiva ah cun rawl ulhnak kan thanh.
22 Cun kannih nih, “Kan Pathian kut cu amah a kawltu hna cung paoh ah cun òhatnak caah a um i amah a hlawtu hna paoh cu a thinhunnak òhawnnak kha a chuahhnawh hna,” tiin siangpahrang kha kan rak chimh cang caah, kan lam i kan ral hna sinin a kan vengtu dingah ralkap bu khat le rangcung ralkap kha siangpahrang cu hal awkah ka ning a zak.
23 Cucaah cun rawl kan ul i kan Pathian cu kan hal i kan nawlnak cu a kan ngaihpiak.
24 Cun tlangbawi upa bikbik hleihnih, Sherebiah, Hashabiah le an unau hna pahra kha a dang tein ka chiah hna.
25 Cun siangpahrang le a fim chimtu hna le a bawi hna le khika i a ummi Israel mi vialte nih, kan Pathian inn ca i an thawhmi ngun le sui le umkheng hna cu an sinah ka thlai i ka pek hna;
26 an kut chung i ka thlai i ka pekmi hna cu hihi an si: ngun talen 650, ngun umkheng talen 100 man, sui talen 100,
27 sui khengkuar 20, darik 1-000 man, cun sui mansung tlukin a man a fakmi dar tleu um pahnih.
28 Cun annih cu ka thawh hna i, “Nannih cu Bawipa caah nan thiang i umkheng zong hi an thiang ve; cun ngun le sui hna cu Bawipa nan pupa hna Pathian ca i mah lungtho tein thawhmi thawhlawm an si.
29 Tlangbawi bik hna le Levi mi hna le Israel mi lak i pale innchungkhar cung i lu cio a simi hna hmaiah Jerusalem ah Bawipa inn chung dal chungah nan thlai hna hlan cu nan ven hna lai i nan ken hna lai,” tiah ka ti.
30 Cucaah Jerusalem i kan Pathian inn i kalpi awkah tlangbawi hna le Levi mi hna nih ngun le sui le umkheng hna cu an lak hna.
31 Cun kannih cu Jerusalem i kal awkah cun thla khatnak thla a ni hleihnih ni ah cun Ahava tiva cun kan i thawh; kan Pathian kut cu kan cungah a um i kan ral hna kut chung le lam i lamhruang a rak kan ahtu hna kut chungin a kan khamh.
32 Jerusalem cu kan phan i khika ah ni thum kan cam.
33 A ni linak ni ah cun, kan Pathian inn chungah khan, ngun le sui le umkheng hna cu Uriah fapa tlangbawi Meremoth kut chungah khan kan thlai hna i kan pek hna, amah sinah cun Finehas fapa Eleazar kha a um i an sinah cun Levi mi Jeshua fapa Jozabad le Binnui fapa Noadiah kha an um.
34 A ningpi cun rel a si i thlai a si i zeipaoh a rih ning kha òial a si dih.
35 Khi caan ah khan, sal taannak in a kir cangmi, sal chuak pawl nih khan Israel Pathian sinah cun khangh thawinak, Israel mi vialte caah cawtum 12, tuukawng 96, tuufa 77, cun sual thawinak caah mehehtum 12 an pekchanh; mah vialte hi Bawipa sin i pekchanhmi khangh thawinak a si.
36 Cun siangpahrang nih a chiahmi bawi upa hna le Tiva Ral ram uktu bawi hna sinah cun siangpahrang nawlbia ca zong cu an pek hna i annih nih mi hna le Pathian inn cu an bawmh hna.