5
Ezekiel Nih A Sam Aa Tan
1 Cun a ka thawh i, “Mipa, nam a har ngaingaimi, lumettu nam bantuk kha i lak law na lu le na khahmul kha i met tuah. Cun cuaithlainak kha la law òhen thum ah sam cu òhen hna.
2 Ral hrennak a dih tikah sam cheu thum cheu khat cu khuapi laifang ah khan khang; cun cheu thum cheu khat cu nam in sam law khuapi velchum ah cun hlonh; cun cheu thum cheu khat cu thlitu lakah khan hlonh hna law vainam zuh cia he ka zulh hna lai.
3 Cun hi sam chung hin tlawmpal tein la law na angki fual hmum ah khan òem chih hna.
4 Cun a dang kha la hna law mei ah paih hna law khang hna, cun an chung cun Israel mi hna cungah mei a chuak lai,” tiah a ti.
5 Mah hihi Bawipa Pathian bia cu an si: “Hi khua Jerusalem khua hi miphun hna lakah an laifang ah ka chiah i ramdang nih an dum,
6 sihmanhsehlaw cu miphun dang hna le ramdang hna nak i òhalo deuh in ka phung le ka nawlbia kha a doh hna; a mi hna nih cun ka phung kha an hlawt hna i ka nawl bantuk khan um an duh lo.”
7 Cucaah Bawipa Pathian nih, “Na velchum i a ummi miphun dang hna nak hmanh in i lawm lo deuh in na um i ka nawlbia bantukin um na duh lo i ka phunglam kha na zul hna lo i na pawngkam ah a ummi miphun phunglam hna hmanh kha na zulh duh hna lo caah, atu cu nangmah doh kha ka caan a si ve cang lai, tiah Bawipa Pathian nih a ti;
8 Na chungah hin miphun hna hmuh awkah biakhiahnak ka tuah lai i
9 cu biakhiahnak hna cu ka tuah balmi zong an si lo i hi hnu zongah ka tuah ti hna lai lo, na nawlbuarnak cu fih a nung tuk hringhran.
10 Cucaah maw Jerusalem, na chungah hin pale nih an fale kha an ei hna lai i fale nih an pale kha an ei hna lai; na cungah hin biakhiahnak ka tuah lai i na chung i a tangmi hna paoh cu khuazakip ah ka òhek dih hna lai. Ref 5.10: Òah 4.10
11 Ka hmunthiang kha na phung òhalo le na thil fihnung in na thurhhnawmh caah zaangfahnak um loin kan hloh lai, tiah Bawipa Pathian nih ka min chalh in ka ti; nangmah cu kan zuah hrimhrim lai lo.
12 Na mi cheu thum cheu khat cu na chungah rai le mangòam in an thi lai; cheu thum cheu khat cu na pawngkam ram ah vainam in an thi lai; cun cheu thum cheu khat cu khuazakip ah ka òhek hna lai i phawi cia vainam he ka zulh hna lai.
13 Khi tikah ka thinhunnak cu a dong lai i an cung i ka thinlinhnak cu ka òhumh lai i ka dai lai; ka thinlinhnak kha a dih tikah an sin i bia a chimtu cu Bawipa kha ka si i ka ham tuk hna ruangah cu bantukin ka chim ti kha an hngalh lai.
14 Nan pawngkam i a ummi hna nih nannih cu nihsawh awk le serhsat awkah kan ser hna kha aa chawkmi paoh nih cun an hmuh ko lai.
15 Nannih cu nihsawh awk le zawmhtaih awk thil ah nan cang lai i nan cung i biachahnak le biakhiahnak thinhung le thinlin in ka tuah tikah nan velchum i a ummi miphun hna caah i zohchunh awk thil òihnung nan si lai.
16 Hi bia hi Bawipa nih ka chim. Nannih cu thihnak cantiang mangòam in kan kah hna tikah, nannih cu hrawh awkin kan kah hna lai. Nan cungah mangòam ka tlunter lai i ni fate nan eimi nan rawl cu ka òhumh lai;
17 nannih cu mangòam le sahrang kha kan thlahhnawh hna lai i nan fale kha an thah dih hna lai. Rai le thisen chuahnak nih an in tlunhnawh hna lai i vainam cu nan cungah ka tlunter lai, tiah Bawipa nih ka chim,” tiah a ti. Ref 5.17: Biat 6.8