13
Profet Deu Hna
1 Bawipa nih a ka thawh i,
2 “Mipa, Israel mi profet hna kha chim hna; chim hna law anmah an lungchung chuak bia a chimmi hna kha chim hna, Bawipa nih a chimmi hi thei tuah u, ti hna: Bawipa Pathian bia cu hihi a si:
3 Maw profet òhalo, mihrut rual hna, lungthawhnak kan hmuh nan timi cu nanmah lungchung in a chuakmi men a si i langhnak zeihmanh nan hmu lo.
4 Maw Israel, na profet hna cu hnawmpon lak i a vakmi cenghngia bantuk an si.
5 Bawipa ni i ral tuk tikah fek tein an dir khawh nakhnga, Israel velchum i a ummi ralhau a rawkmi kha a rawhnak cu hung thlop awkah an hung kal lo.
6 Lih lawng kha an chim i ahmaan lomi langhnak lawng kha an hmu. ‘Mah hihi Bawipa bia hrimhrim a si,’ an ti, asinain Bawipa nih annih cu a fial hna lo, asinain an bia cu Bawipa nih a tlinter ko lai, tiah an ruah. Nan profet hna nih hin hlennak langhnak a si lo maw an hmuhmi hi?
7 Nan mangihnak hi lih a si ko lo maw? Bawipa bia hrimhrim a si, nan ti, sihmanhsehlaw cu bia a chimtu cu Kei ka si lo.
8 “Cucaah hi tu hi Bawipa Pathian ka bia cu a si: ‘Nan bia cu ahmaan lomi bia a si caah le nan hmuhmi langhnak cu lih an si caah, nannih cu kan ral hna, tiah Bawipa Pathian nih a ti.
9 Langhnak an hmuhmi ahmaan lomi a simi hna le an mangihnak lih a simi profet hna kha ka kut ka hlerhnawh hna lai. Ka mi hna nih khua an khannak hmun ah khan hmun an ngei lai lo i Israel mi hna min relnak cazin chungah khan khumh an si lai lo i Israel ram zong an ke nih a lam lai lo.
10 Cuticun nannih nih Bawipa ka si kha nan hngalh lai. Zeicahdah hi bantuk hin dantat an si lai ti ahcun, ka mi hna kha a pingah an hruai hna caah a si, zeizong vialte a òhat lo ko zongah khan, zeizong vialte a òha dih ko, an ti hna. Zei he dah aa lawh ti ahcun, vampang pakhat chong hna seh law, cu vampang an chon tikah cun fek tein mirang-vawlei in sengh loin a lengin sirang nalh men hna seh law, cu he cun aa lo. Ref 13.10: Jer 6.14; 8.11
11 Hi a nalhtu hna hi chim hna law, vampang cu a cim lai, ti hna; ruahpi kha fak piin a sur lai i lung bantukin a hakmi rial kha an tla lai i thlitu a fakmi kha ka hranter lai.
12 Inn cu a tluk tikah, “Nan senghnak mirang-vawlei kha tah khuazei ah dah a si kun?” an ti hna lai.
13 Cucaah hihi Bawipa Pathian bia a si: “Zeizong vialte kha a rawh dih hlantiang, ka thin nan ka phawh caah thli chia kha ka hranter lai, ka thin hun in ruahpi fak piin ka surter lai i ka thinlinh in lung tlukin a hakmi rial kha ka tlakter hna lai.
14 Si rang nan thuhmi inn cu ka chimh lai i vawlei ah ka hrilh lai i a hram kha an lang dih lai. A tlu lai i cu chungah cun nannih zong hrawh nan si chih lai; cuticun Bawipa ka si kha nan hngalh lai.
15 Inn cungah cun ka thinhunnak kha ka hman lai i sirang a thuhtu hna cung zongah khan ka hman lai; cun mi nih an i thawh lai i
16 Inn kha a um ti lo, a satu hna zong kha an um ti lo, Jerusalem khua sin i bia a chimtu profet hna, daihnak a um naloin daihnak a um, tiah a chimtu hna kha an um ti lo,” an ti lai. Mah hi Bawipa bia hrimhrim a si, tiah a ti.
17 “Cun atu cu, mipa, i mer law, na mi hna lak i a ummi nu hna, anmah lung chung chuak lawngin bia a chimmi hna kha chim hna.
18 Annih cu thawh hna law, law, ‘Mah hihi Bawipa Pathian bia a si ti hna: Pa kha foih khawh nakding caah banrek ca i kutkhih a òhi i a mi kip nih an kum rup cio ah an i khuh khawh awkah lukhuh a sermi minu hna, nannih cu kan fih hna; nannih nih ka mi hna nunnak cu thah awkah kawl in nanmah nunnak tu cu him tein umter awk kha nan timh maw?
19 Nannih nih ka mi hna hmaiah barli pei khat ruang le changreu pelpawi ruangah nan ka thurhhnawmh cang, nannih nih lihbia ngaih a duh ngaimi ka mi hna sinah lih nan chimnak thawngin, a thi hnga lo ding kha nan thihter hna i a nung hnga lo ding kha nan nunter hna.
20 Cucaah mah hihi Bawipa Pathian bia cu a si: Nannih nih pa kha vate bangin foih nan i zuamnak nan camh kutkhih kha ka duh lo.
21 Kha kutkhih kha ka chah hna lai i vate bangin nan foihmi hna an nunnak kha ka luatter lai. Nan hmaikhuh puan sau pipi cu ka thleh dih hna lai i nan kut chung khan ka mi cu ka chuah hna lai, annih foih khawhnak òhawnnak kha nan ngei ti lai lo. Cuticun Bawipa ka si kha nan hngalh lai.
22 Miding mi cu an cungah òhat lonak tuah ka tim lo nain an lung nan donghter hna i cu bantuk òhiamòhiam in miòhalo mi hna cu an lam òhalo kha hlawt i khamh an si nakhnga tu si loin thazang nan pek lehlam hna;
23 cucaah nan hlennak langhnak hna cu nan hmu ti hna lai lo i nan mangihnak cu nan hmang ti lai lo. Ka mi hna cu nan kut chung khan ka chuah hna lai i cuticun Bawipa ka si kha nan hngalh lai,” tiah a ti.