EZEKIEL
Ezekiel
1. Pathian nih Ezekiel a auhnak;
2. Pathian nih dan an tat hna lai tiah mi kha ralrin peknak le Jerusalem rawhnak ding kong chimnak;
3. Pathian miphun a hremtu hna le a ping ah a kalpitu hna miphun dang hna kha Pathian nih bia a ceih hna lai;
4. Jerusalem rawh hnuah Israel mi nih hnemhnak an hmuh laimi le hmailei caan òha an hmuh lai ding kong;
5. Gog ralchanh in chimchungmi bia;
6. Ezekiel nih remh òhan dingmi Biakinn le miphun hmanthlak a suaimi.
Ezekiel cu zumhnak thukpi a ngeimi le ruahnak in thil a suai kho ngaimi a si; a hmuhmi thil tampi hi langhnak pungsan in a chim hna i a chim duhmi bia hi hmanthlak in a suai hna i pum tuahnak in fiang ngaiin a langhter hna. Ezekiel nih lungchung thar a biapitning kha a chim i pumpak cio ah mah sual ruangah òuanvo kan ngeih kha a langhter. A miphun an phun ningin tharter òhan an si lainak zong kha a chim. Tlangbawi zong a si i profet zong a si caah khan Biakinn le thiannak kong kha biapi in a hler khun hna.
1
LANGHNAK PAKHATNAK
Pathian Òhutdan
1 Kum 30 kum, thla linak thla, ni nga ni ah cun, saltangmi hna sinah Khebar tiva pawngah khan ka um i van kha aa hung i Pathian langhnak kha ka hmuh hna. Ref 1.1: Biat 19.11
2 Cu thla ni nga ni ah cun, cucu Jehoiachin sal i a tan a kum nganak a si. Ref 1.2: 2Sia 24.10-16; 2Cha 36.9-10
3 Khaldi mi hna ram i Khebar tiva pawngah khan Buzi fapa tlangbawi Ezekiel sinah khan Bawipa bia cu a phan; cun khika ah Bawipa kut cu a cungah khan a um.
4 Khua ka hei cuan i zohhmanh, chaklei in òotho pakhat a rung hran kha ka hmuh; cu òotho sinah cun khuadawm nganpi pakhat a um i cu khuadawm cu ceunak nih a kulh i a chungah cun dar bantukin a tleumi ceunak a um.
5 Cun mei chungah cun minung mui a lomi thilnung pali an um. An muisam cu hi bantuk hi an si: minung pumruang an ngei. Ref 1.5: Biat 4.6
6 Sihmanhsehlaw pakhat nih hmai pali cio an ngei i thla pali cio zong an ngei fawn.
7 An ke cu a ding i an ketin cu cawfa tin bantuk an si i dar kheng bantukin an tleu.
8 Cun an hrap pali i an thla toi cio ah cun minung kut kha an ngei cio.
9 Cun thilnung pali hna nih cun hmai le thla an ngei cio i an thla cu pakhat le pakhat an i tawng dih. An kal tikah khan an i mer lo, hmailei ah khan an kal cio ko.
10 An hmai cu, an hmailei hmai cu minung hmai an si; an pali khan an orhlei kap hmai cu chiandeih hmai an si i an pali khan an kehlei kap hmai cu cawtum hmai an si i an pali khan an hnulei hmai cu mupi hmai an si. Ref 1.10: Eze 10.14; Biat 4.7
11 Cu thilnung hna cu an thla tuah khat nih khan an hawile thla kha an tongh hna i tuah khat nih khan an pum kha an huh hna.
12 Cun annih cu hmailei ah khan ding tein an kal cio ko i thlarau a kalnak lei paoh ah khan i mer lo tein an kal.
13 Thilnung hna cu an mui cu meiòil vang hiamhuam in a ummi bantuk khi an si i an lakah cun meizik khi i chawk lengmang seh law cu ko cu a lo; mei cu a ceu ngaingai i mei chung cun nimtlau an chuak.
14 Cun nimtlau aa lek bantuk khin thilnung hna cu a kenkip ah an choi lengmang.
15 Thilnung pali hna cu ka zoh hna lioah khan vawlei cung an pawngah khan leng kekual pakhat ka hmuh, pakhat caah kual khat cio in. Ref 1.15-21: Eze 10.9-13
16 Cu leng kekual an muisam le an umtuning cu hi bangin a si: an mui cu topaz lungvar bantukin a tleu; an pali cun an i lo dih i an umtuning cu leng kekual chungah khin a kual chin si hna seh law cucu an lo.
17 Cun an kal tikah hin anmah le an hmai zawn cio ah khan an kal ko i an lam kha an hleen lo.
18 Cun leng kekual pali hna nih cun tlang an ngei cio i tung zong an ngei dih; cun an tlang cu a velchum in mit in a khat dih. Ref 1.18: Biat 4.8
19 Cun thilnung hna kha an kal tikah leng kekual hna cu an pawngin an kal ve; cun thilnung hna kha vawlei in an thawh tikah leng kekual hna zong kha an tho ve.
20 Thlarau a kalnak lei paoh ah khan an kal ve i an sinah cun leng kekual cu an tho lengmang ve; zeicahtiah thilnung hna thlarau cu leng kekual chungah khan an um.
21 Cu hna cu an kal tikah hi hna zong cu an kal ve, cu hna cu an dir tikah hi hna zong cu an dir ve; cu hna cu vawlei in an thawh tikah leng kekual hna cu an sinah cun an tho ve; zeicahtiah thilnung hna thlarau cu leng kekual hna chungah cun a um.
22 Thilnung hna lu cungah cun cungkhuh bantuk hi a um i thlalang bantukin a tleu i an lu cungah cun aa samh. Ref 1.22: Biat 4.6
23 Cun cu cungkhuh tangah cun an thla cu aa samh cio i pakhat le pakhat kha an i tawng, cun an thla tuah khat nih an pum kha a khuh cio hna.
24 Cun an thla thawng zong kha ka theih, an kal tikah an thla thawng cu ti tampi thawng bantuk a si, Lianngan Bik khuari thawng bantuk a simi bu nganpi thawng le ralkap bu thawng bantuk a si; an dir tikah an thla kha an òhumh hna. Ref 1.24: Biat 1.15; 19.6
25 An thla an i thlep i an dir ah khan, an lu cung i a ummi cungkhuh cungah khan thawng pakhat a thang.
26 Cun an lu cung i a ummi cungkhuh cungah cun bawiòhutdan bantuk, safaiar lungvar, bawiòhutdan a lomi kha a um i cu cungah cun minung pumruang a lomi pakhat a òhu. Ref 1.26: Eze 10.1; Biat 4.2-3
27 Cun a tai in a cunglei cu dar tleu bantuk a si i somei vaam huam in a ummi khi a lo, cun a tai in a tanglei cu mei bantuk a si i a velchum in a ceu dih. Ref 1.27: Eze 8.2
28 Ruahpi a sur ni ah khuadawm lak i chuncha a chuah bantuk khin a velchum i a ceumi cu a um.
Bawipa sunparnak a muisam cu cu bantuk cu a si. Cucu ka hmuh tikah ka bawk i aw pakhat ka theih.