1 Cun Derbe le Listra zong a phan. Cuka ah cun zultu pakhat Timote timi a rak um i Judah mi, zumtu nu fapa a si. A pa cu Grik mi a si. 2 Listra le Ikonium unau hna nih cun an chimthiam ngaimi a si. 3 Paul nih Timote cu amah zul ding caah a cuarpar a tan. 4 Khua khat hnu khua khat an tlawn pah in Jerusalem i lamkaltu le upa hna nih zulh awkin khua an khanmi kha zulh awkah an thanh pah lengmang hna. 5 Cucaah Khrihfabu hna cu zumhnak ah thazang an fehter hna i nifatin tein an karh chin lengmang.

6 Thiang Thlarau nih Asia ram chungah phungchim a thlauh caah Frizia le Galatia ram hrawngah an tlawng. 7 Misia ram ral an phak cun Bithinia ram i luh an i tim nain Jesuh Thlarau nih a onh hna lo; 8 cucaah Misia ram tan in Troas ah an vung kal. 9 Zan ah Paul nih langhnak a hmuh; a hmuhmi cu Masidonia mipa pakhat a hmaiah a dir i, “Masidonia ah ra law rak kan bawm,” tiah a nawl. 10 Cu langhnak a hmuh cangka cun Masidonia kal cu kan i tim; zeitintiah an sin i thawngòha chim dingin Pathian nih a kan ruah.

11 Cucaah Troas khua cun sangphawlawng in kan i thawh i Samothrasia ah lan thluahmah in kan kal i a thaizing ah Neapolis kan phan; 12 cuka cun Filipi khua ah kan kal. Cu khua cu Masidonia peng khuapi pakhat Rom penmi khua a si. Cuka ah cun ni tam nawn kan cam. 13 Sabbath ni ah cun hau lengah kan chuak i thlacamnak hmun a um rua tiah tiva kamah kan kal. Kan òhu i nu rual aa pummi hna sinah phung kan chim. 14 Kan bia a ngaimi nu lak i pakhat cu a min ah Lydia a si i Thiatira khuami a si; puan sendung a zuarmi a si i Pathian biami a si. Paul chimmi ngaih awkin Bawipa nih a lungthin a hun piak. 15 A chungkhar he baptisma an ing i, “Bawipa a zummi taktak a si nan ka ti ahcun ka inn ah rak ka tlung u,” tiah a kan nawl i a kan thlauh.

16 Ni khat cu thlacamnak i kan kal lioah, sal ngaknu, hmailei kong chimthiamtu khuavang ngei pakhat nih a kan ton. Hmailei kong a chimthiamnak nih cun a bawile kha a òhathnem ngai hna. 17 Ngaknu nih cun Paul le kannih cu a kan zulh i, “Mah hna hi Cung Nung Bik Pathian salle an si i khamhnak lam an in chimh hna hih,” tiah a au. 18 Cuticun ni tampi a um. Paul cu a ing a puanh caah aa mer i thlarau cu, “Jesuh Khrih min in kha nu chung khan chuak tiah nawl kan pek,” a ti.

19 Cu cangka cun a chuak colh. Sihmanhsehlaw a ngeitu hna nih òhathnemnak an i ruahchihmi cu a lo cang ti an hngalh tikah 20 Paul le Silas cu an tlaih hna i uktu hna hmai chuahpi awkin zapi tonhmun ah an hnuh hna; biaceih bawi hmai i an chuahpi hna tikah, “Mah mi hna hi Judah mi an si i kan khuapi hna an hnawh. 21 Kannih Rom kan phung a si lomi, kan tuah tawn lomi le kan cohlan lomi nunzia an chim,” an ti. 22 Mi zapi hna zong cu Paul le Silas kha òhuat awkin an hung chuak ve. Biaceihtu nih an angki a phoihter hna i fung in tuk awkah nawl a pek hna. 23 Voi tampi an tuk hna hnuah thong ah an thlak hna i thong uktu kha òha tein cawngh awkah nawl an pek. 24 Cuti nawl pek a si caah thonginn chungchin ah a khumh hna i an ke zong hreng a khenh hna.

25 Sihmanhsehlaw zanòim hrawngah khin Paul le Silas cu Pathian sinah thla an cam, hla an sa i thongtla hna nih cun an ngaih hna. 26 Lakhruak piin le fak piin li a hnin i thonginn cu a hram in a hninh dih; chikkhatte ah innka vialte aa hung dih i thongtla hna an cikcin cio kha aa phoih dih. 27 Thonginn uktu cu a hun i hlau i thong innka aa hun dih kha a hmuh tikah a vainam aa zuh i amah le amah thah aa tim, zeitintiah thongtla vialte kha an le dih tiah a ruah. 28 Sihmanhsehlaw Paul cu fak piin a au i, “Nangmah le nangmah i tuahmawh hlah, kan dihlak in kan um ko,” a ti. 29 Thong uktu nih cun mei van a fial hna i zokzok in a vung lut; a òih tuk i ther lengmang in Paul le Silas ke hramah cun a bawk. 30 A chuahpi hna i, “Ka bawipale, khamhnak hmuh awkah zeidah ka tuah lai? a ti. 31 An thawh i, “Bawipa Jesuh cu zum law nangmah he na inn chungkhar hna he khamh nan si lai,” an ti. 32 Inn ah a ummi vialte he Bawipa bia cu an chimh hna. 33 Cu zan, cu caan theng te ah cun a kalpi hna; an hma a òawlpiak hna i amah he a inn chungkhar he baptisma an pek colh hna. 34 Inn ah a òin pi hna, an hmaiah rawl a hunh hna i Pathian a zumh caah an inn chungkhar in an i lawm.

35 A thaizing khua a hung dei i biaceih bawi nih, “Mah mi hna kha rak chuah hna,” tiah palik a hei thlah hna. 36 Thong uktu nih cu bia cu Paul sinah a chimh i, “Biaceih bawi nih nan chuah awkah a kan cah, cucaah atu rak chuak u law dai tein va kal u,” a ti hna. 37 Sihmanhsehlaw Paul nih cun, “Sual phawt rih lomi, zapi hmaiah an kan tuk. Thong ah an kan thlak i atu a thli tein maw thlah an kan timh? Cuticun a si hnga lo, Rom mi dahkaw kan si. Anmah theng te kha ra hna seh law rak kan chuah hna seh,” a ti. 38 Palik nih cu bia cu biaceih bawi an va chimh òhan i Rom mi an si an hngalh tikah an òih ngaingai; 39 cucaah an ra i ngaihthiam an rak hal hna. Cun an chuah hna i khuapi in chuah awkah an nawl hna. 40 Thong cun an chuak i Lydia an va leng. Unau hna an va hmuh hna caah an sinah forhnak bia an chim dih in an kal.