1 Ikonium ah cun Judah hna sinakok ah hmunkhatte ah an lut, phung an chim i Judah mi le Grik mi he mi tampi nih an zumh. 2 Sihmanhsehlaw a zum lo Judah mi hna nih Jentail mi kha an tuaihrok hna i zumtu hna kha huatter awkin an lung chungah ruahnak òha lo sivai an chiah. 3 Sihmanhsehlaw caan saupi an cam i Bawipa caah ralòha ngaiin bia an chim, a velngeihnak bia fehternak caah khuaruahhar le hmelchunhnak an kut in a tuahter hna. 4 Sihmanhsehlaw Judah mi lei ah acheu, lamkaltu leiah acheu in khuami hna kha an i òhen dih. 5 Jentail mi hna le Judah mi hna le an hruaitu hna he serhsat in lung i cheh an timh hna ti kha an theih; 6 Likaonia peng Listra le Derbe le a pawngkam khua ah an zam. 7 Cuka ah cun thawngòha cu an va chim.

8 Listra khua ah cun mi pakhat a òhu komi a um, a ke a hmang kho lo; a chuahnak in a ke a bei i a kal kho lo. 9 Paul biachimmi cu a ngai ve i Paul nih dengteo in a zoh; dam khawhnak zumhnak a ngei ti a hngalh i aw thang ngaiin, 10 “Na ke in ding tein dir,” a ti. A tho hlut i a kal. 11 Cun Paul nih a tuahmi kha mi zapi nih an hmuh tikah an aw an i hlerh i Likaonia holh in, “Minung he aa lo in khuazing hna cu kan sinah an rung òum,” an ti. 12 Barnabas cu Zeus an ti i Paul cu biachimtu bik a si caah Hermes an ti. 13 Zeus biakinn cu khuapi hmaiah a um i tlangbawi cu cawtum le pangpar òhirual he cu kutka ah cun a hung chuak; mi zapi he lamkaltu sinah thawinak tuah a timh. 14 Sihmanhsehlaw lamkaltu Paul le Barnabas nih an theih tikah an hnipuan an thleh i mi zapi sinah cun an va zuang i an au, 15 “Mi hna, zeicahdah hihi nan tuah? Kannih zong nanmah bantuk minung kan si ve ko; van le vawlei le rili le a chungah a ummi vialte sertu Pathian nung lei ah hi pakpalawng thil hna in nan i mer nakhnga thawngòha kan rak in phorh hna. 16 A liam cangmi chan hna ah khan cun miphun kip nih anmah le an kal duhning cio lam in kal awk a onh hna; 17 sihmanhsehlaw theihpitu ngei loin a um lo; zeitintiah a òhami a tuah i vanruah le theitlai tlaitertu khuacaan an pek hna i rawl le lawmhnak in nan lung a tlinter,” an ti. 18 Cu bantuk bia òhaòha cun mi hna nih thawinak an cung i tuah an timhmi cu har ngaiin an òulhter hna.

19 Sihmanhsehlaw Antiok le Ikonium in Judah mi an ra i zapi cu anmah leiah an lem hna i Paul cu lung in an cheh i a thi cang tiah an ruah caah hau lengah chuak ko in an hnuh. 20 Sihmanhsehlaw zultu hna nih a pawng i an dum tikah a tho i khuapi chungah a lut. A thaizing ah Barnabas he Derbe khua ah an lan.

21 Cuka khua i thawngòha an chim tikah zultu tampi an hmuh hna i Listra le Ikonium le Antiok leiah an kir. 22 Cuka i zumtu hna cu thlarau thazang òhawnnak an pek hna, zumhnak ah feh chin awkin tha an pek hna i Pathian pennak ah cun harnak tampi tuar in kan luh awk a si tiah an forh hna. 23 Cun Khrihfabu kip ah upa an thimpiak hna i thlacam le rawlulhnak in an zumhmi Bawipa sinah cun an ap hna.

24 Cun Pisidia pal pah in Pamfilia ah an ra. 25 Perga ah phung an chim hnuin Attalia ah an lan; cuka cun Antiok ah sangphawlawng in an kal. 26 Cu Antiok khua cu atu i an lim cangmi rianòuan awkah Pathian velngeihnak i an rak chanhnak khua kha a si. 27 An va phanh tikah Khrihfabu kha an auh hna i Pathian nih anmah hmang in a òuanmi vialte le Jentail mi hna caah zumhnak lam a hun piaknak hna kha an thanh hna. 28 Cuka ah cun zultu hna he caan saupi an um.