2
A Dikmi Thurin
1 Asinan nang cun a dikmi thurin thawn a kaih aw mi kha na zirh pei.
2 Patar deuh pawl kha zuri hlah uh, thinlung felfai in um uh, nan thinlung uk thei uh; zumnak dik, duhdawtnak le harsat tuartheinak neimi si uh, tiah zirh aw.
3 Cubangtuk òhiamòhiam in nutar deuh pawl kha nunau si dingdan tein nun thianghlim nei dingin zirh aw. Mi relsiat hmang an si lo pei ih zu ih sal ah an tla lo pei. A òhami an zirh pei ih,
4 nutar deuh pawl in kum no deuh nunau pawl cu an pasal le an faale pawl duhdaw deuh dingin,
5 mah le mah uk aw theitu si dingin, mithiang si dingin le an pasal thu ngai in tangdor thiammi nupi òha ih an cannak dingah zirh dingin sim aw. Cutiin Pathian hnen ihsin a rami thuthang cu zohman in an relsia lo ding.
6 Cubangtuk thotho in tlangval pawl khal mah le mah uk aw theitu an sinak dingah forh aw.
7 Ziang hmuahhmuah ah nangmah rori zohòhim tlak in um aw. Rin tlak mifel si awla thu na zirh tikah thungaithlak in zirh aw.
8 Zohman ih soisel thei lo dingin òongkam òha hmang awla kan ral pawl in soisel dingin thei lo dingih an ning lehlam a zak sawn ding.
9 Sal pawl cu nan bawi pawl ih tangah dor uhla ziangtinkim ah an lungawiter uh, tiah sim aw. An thu sawnkir hlah hai seh.
10 Cule an thil khal ru hlah hai seh. Miòha an sinak le rinsan tlak an sinak kha langter sawn hai sehla, cuticun an tuahmi kipah in Runtu kan Pathian ih thu kan zirhmi parah thangòhatnak an thlenter ding a si.
11 Ziangahtile Pathian in a zangfahnak cu mi hmuahhmuah rundam dingah a langter zo.
12 Cuih zangfahnak in Pathian ziaza thawn a mil aw thei lomi nundan le leilung taksa hiarnak pawl bansan dingah in zirh. Cule mah le mah a uk aw theimi le dingnak le hi leikhawvel ahhin Pathian ih duh zawng thawn a mil aw mi ziaza ih kan nun theinak dingah in zirh fawn.
13 Cutiin a maksakmi kan Pathian le in Runtu Jesuh Khrih ih sunlawinak a lang ding tiin kan ruahsanmi Ni sunglawi cu kan hngak a si.
14 Amah ih nunnak rori kha kannih pawl òhatlonak ihsin runsuak dingah le thil òha tuah a hiartu si dingah le amah ih bulta mithiang ih in canternak dingah kan hrangah a pek zo.Ref 2.14 Saam 130:8; Suah 19:5; Daan 4:20, 7:6, 14:2; 1 Pit 2:9;
15 Hi thu pawl hi zirh awla na thusim a ngaitu pawl thazang na pek ah siseh, nun na sim tikah siseh, na thuneihnak kha famkim zet in hmang aw. Zohman in lo hmuhsuam hlah hai seh.