16
David Le Ziba
1 David cu tlangpar ihsin malte a feh tikah, ruah lopi in, Mefibosheth ih hnenumpa Ziba in a rak hmuak. Ziba cun laak pahnih a hruai ih laak pawl cun sang zawl zahnih, car mi sabit rah bawr zakhat, thingrah lawh tharmi bawr zakhat le sabitti saphaw thawl khat an phur.Ref 16:1 2 Sam 9:9, 10;
2 Siangpahrang David in, “Thil hi zatzat cu khuiahso na heih ding?” tiah a sut.
Cutikah Ziba in, “Laak pawl cu siangpahrang ih innsang pawl to dingah an si; sang le thingrah pawl cu na minung pawl ih ei dingah a si; sabitti cu na minung pawl hramlak ih an bang tikih an in dingah a si,” tiah a ti.
3 Siangpahrang in, “Na bawipa Saul ih fapa sin Mefibosheth cu khuiahso a um?” tiah a sut.
Cutikah Ziba in, “Jerusalem ah a um; ziangahtile a pu Saul ih uknak cu a tuih òumah Israel mi pawl in “Ka hnenah in pesal hmang ding,” tiih a zum ruangah a si,” tiah a ti.Ref 16:3 2 Sam 19:25-27;
4 Siangpahrang in Ziba hnenah, “Mefibosheth ih ta hmuahhmuah cu na ta an si thluh sokhaw,” a ti.
Cule Ziba cun a lu a kun ih, “Kei cu na sal ka si ko. Siangpahrang nangmah ih mithmai òha a cotu si ringring hram ninglaw,” a ti.
David Le Shimei
5 An feh vivo ih Bahurim khua an thlen tikah Saul ih sungkhat a simi, Gera ih fapa Shimei cu David tong dingah mi camriam phahin a ra suak.
6 David le a kuthnuai bawi pawl cu lungto in a deng hai ih ralkap pawl le a kiltu pawl in David cu an kulh òhepòhep nain a deng thotho.
7 Shimei in David cu a cam ih, “Tlan aw, tlanzang aw; laithat pa, mi sualral pa;
8 Saul ih uknak cu na long ih Saul ih sungkhat pawl tampi na thah ruangah Bawipa Pathian in atu ah na parah phuba a la a si. Atu ah Bawipa in na uknak cu na fapa Absalom hnenah a pek zo. Na cem a si, laithat pa!” tiah a cam ciamco.
9 Cutikah Zeruiah ih fapa Abishai in siangpahrang hnenah, “Maw siangpahrang bawipa, ziangahso hih uico pa ih cam cu na tuar cuahco men? Ka va feh pei ih a lu ka va tan pei,” tiah a ti.
10 Siangpahrang in Abishai le a u Joab hnenah, “Himi cu nannih thawn a seng lo. Pathian ih a fial ruangah i cam a si ahcun, “Ziangahso na cam?” tiah zoso a ti thei ding?” tiah a ti.
11 Cule David in Abishai le a kuthnuai bawi pawl hnenah, “Ka sungsuak ka fapa rori hman in a thah i tum a si ruangah hi Benjamin pa ih thil tuahmi parah mangbang ding zianghman a um lo. Bawipa in a fial a si ruangah a parah zianghman ti hlah uh, a duh tawkin i cam seh.
12 Bawipa in ka zonzaih harsatnak hi a run hmu pei ih, a tuih in cam rero can ai ah Bawipa in malza i sawm tla a si thei,” tiah a ti.
13 Curuangah David le a milai pawl cu an feh vivo. An dungin Shimei cun a thlun ih an fehnak tlangpar zin kap ihsin a feh ih a feh phah cun a cam vivo hai ih lungto le hnawmhne in a deng phah vivo.
14 Siangpahrang David le a milai pawl cu Jordan an thlen tikah cun an bang hnephnep ih cutawkah David cu a cawl.
Absalom Cu Jerusalem A Thleng
15 Absalom le a hnenih a òangmi Israel mi hmuahhmuah cu Jerusalem khua ah an lut ih Ahithofel tla a tel.
16 Cule David ih rinsanmi a rualpa Hushai in Absalom cu a tong ih, “Siangpahrang a nun sau hram seh! Siangpahrang a nun sau hram seh,” tiah a ti.
17 Cutikah Absalom in, “Na rualpa David ih milai na si nawn lo maw si? Ziangahso amah na thlun lo?” tiah a sut.
18 Hushai in, “Ziangtinso ka thlun thei ding? Bawipa Pathian ih a hrilmi le hi minung pawl le Israel misenpi ih an hrilmi lawng kei ka thlun ding a si. Na hnenah ka um ding.
19 Thungai ih kan ti ahcun, ka bawipa ih fapa rian lo in zoso ka ren cuang ding? Na pa ih hna ka òuan vekin atu ah nangmah ih hna ka òuan ding,” tiah Absalom cu a ti.
20 Cule Absalom cu a her ih Ahithofel hnenah, “Na ruahnak in sim hnik! Ziangtinso thil kan tuah pei?” tiah a sut.
21 Cutikah Ahithofel in, “Feh awla na pa ih inn, siangpahrang inn kilkhawitu dingih a tantami a nupisun pawl va ihpi aw. Cutiih na tuah asile a pa ih thin a hengter nasa zo tiah Israel mi hmuahhmuah in an lo thei dingih na hnenih a òangtu pawl cu an òang sinsin ding,” tiah a ti.
22 Curuangah siangpahrang inn diphun parah deu an sak ih Israel misenpi mithmuh ah Absalom in a pa ih nupisun pawl cu a ihpi a si.Ref 16:22 2 Sam 12:11, 12;
23 A cuih san ahcun Ahithofel ih ruahnak cu Pathian ih òongkam ngaingai bangin an rak thlun. David khalin a rak thlun ih Absalom tla in a thlun ve.