5
Filistin Mi Hnenah Thukam Kuang
1 Pathian Thukam Kuang cu Filistin mi pawl ih an lon ngah hnuah Ebenezer ihsin Ashdod khua ah an phur.
2 Dagon an timi an khawzing biaknak inn ah an fehpi ih Dagon kiangah an ret.
3 A thaizing ah Pathian ih Thukam Kuang hmaiah Dagon ih lempi cu a bokkhup in a tluk kha Ashdod khuami pawl in an hmu. An tungsal ih a um keel in an ret.
4 A thaizing zingpit ah Bawipa ih Thukam Kuang hmaiah Dagon ih zukpi cu a bokkhup in a tluksal lala kha an hmu. A lu le a ban pawl a tan aw thluh ih sangka kiangah an ril teptep. A ruangpi lawnglawng a tang.
5 Curuangah tuih san tiangin Ashdod khua ih puithiam pawl le Dagon a betu pawl cun Dagon a tluknak hmun cu pal lo in an lan òheu.
6 Ashdod khuami pawl cu Bawipa in nasa zet in a hrem ih an thin a phang ringring. Ashdod khuami lawng si lo in a kiangkap khuami pawl khal a hrem ih khuaihli hma in an hma thluh.
7 Cutiih a si cu misenpi in an hmuh tikah, “Israel mi pawl ih Pathian in kanmah le kan khawzing Dagon tiangin in hrem a si. Thukam Kuang cu hitawkih umter hrih dingah a cang nawn lo,” tiah an ti.
8 Curuangah mi an thlah ih Filistin mi pawl hotu lal panga an ko khawm ih, “Israel mi pawl Pathian ih Thukam Kuang hi ziangtinso kan tuah ding?” tiah an sut.
Cutikah annih in, “Gath ah va ret uh,” an ti. An ti bangtukin Gath ahcun an va ret.
9 Asinan Gath ih an ret ve tein Bawipa in Gath khuasungmi pawl a hrem ih an van a sang ngaingai. Gath khuasungmi hmuahhmuah a tum a sen in khuaihli hma an tuar òheh.
10 Curuangah Thukam Kuang cu Ekron khua ah an kuat. Ekron khua an thlenpi ve tein khuasungmi pawl cu, “Israel mi Pathian ih Thukam Kuang an rak thlenpi ih in that thluh ding,” tiah an au ciamco.
11 Curuangah Filistin mi pawl ih lal pawl cu an ko khawm lala ih, “Israel mi pawl ih Thukam Kuang cu a rak umnak ah kuatsal uh; cuticun kanmah le kan sungkhat pawl kan thi lo ding,” tiah an ti. Nasa zet in Pathian in a hrem hai ruangah khuasungmi pawl cu an awlok a song ngaingai.
12 A thi lomi pawl khal cu khuaihli hma in an na ih mi hmuahhmuah in an khawzing pawl hnenah bomnak dil in an au ciamco.