28
1 Tikcu a hung rei deuh tikah Filistin pawl cu Israel do dingah an ralkap pawl an khawm ciamco. Cutikah David cu Akhish in, “Nang le na ralkap pawl cu kan hnenah òangin Israel nan do ding a si lo maw?” tiah a sut.
2 David in, “Si e; na salpa ka si ih ka thil tithei zia na zoh pei cu,” a ti.
Cutikah Akhish in, “A òha! Kumkhua keimah kiltu ah ka lo tuah ding,” tiah a ti.
Saul In Tinzohtu A Leng
3 Samuel cu a thi zo ih Israel mi hmuahhmuah in an òah ih amah ih khua Ramah ah an phum. Israel ramsung ihsin kutòial zohthiam le pol hmuahhmuah cu Saul siangpahrang in a dawitlan thluh.Ref 28:3 Pui 20:27; Daan 18:10, 11; 1 Sam 25:1;
4 Filistin ralkap pawl cu an khawm aw ih Shunem khua kiangah an riak. Israel ralkap pawl cu Saul in a kokhawm ih Gilboa tlang parah an riak.
5 Saul in Filistin ralkap pawl a hmuh tikah a thin a phang ngaingai.
6 Curuangah Saul in Bawipa thu a ron. Asinan Bawipa in mang in siseh, Urim le Thummim zohnakin siseh, profet in siseh, thu a let hrimhrim lo.Ref 28:6 Mipum 27:21;
7 Cutikah Saul in a kuthnuai bawi pawl cu, “Tin ka len theinak dingah nunau pakhat, pol a simi ka hrangah hawl uh,” tiah thu a pek.
“Endor khua ah pakhat a um,” tiah an ti.
8 Curuangah Saul cu midang ah a tuah aw ih hnipuan phundang a hruk ih, a milai pahnih thawn a cuih nunaunu hnen ahcun khawthim hnuah an feh. Cule Saul in, “Na khawvang i kawh sak awla hmailam ah ziang a cang ding ti i suh sak aw. A hmin ka lo simmi mithipa i kawh sak aw,” tiah a ti.
9 Asinan nunaunu cun, “Israel ramsung ihsin Saul siangpahrang in kutòial zohthiam pawl le pol hmuahhmuah a dawi thluh a si, ti cu na thei ko. Ziangahso pol ka sinak hi thei hai sehla that hai seh tiih a bum i tum?” tiah a rak ti.
10 Cutikah Saul in thukamnak a tuah ih, “A nungmi Bawipa ih hmin saal in ka lo kam: Hih mithi kawh ruangah cun an lo that hrimhrim lo ding,” tiah a ti.
11 Cule nunaunu cun, “Zoso ka lo kawh sak ding?” tiah a sut.
“Samuel ko aw,” tiah Saul in a ti.
12 Nunaunu cun Samuel a hmuh tikah a raak ciamco. “Ziangahso i bum? Saul siangpahrang na sisi!” tiah a ti.
13 Cutikah Saul in, “Òih hlah aw. Ziangso na hmuh?” tiah a sut.
Nunaunu in, “Leilung sung ihsin mithi thlarau pakhat a hung suah ka hmu,” a ti.
14 “Ziangvek so a si?” tiah Saul in a sut.
“A hung suakmi cu patar pa a si. Kor fualpi a hruk,” tiah nunaunu cun a ti.
Cutikah Samuel a si, ti kha Saul cun a thei ih upatnak in leilung ah a kun.
15 Cule Samuel in Saul cu, “Ziangahso i hnaihnok? Ziangahso i kirtersal?” tiah a sut.
Saul in, “Ka van a sang ngaingai a si. Filistin mi pawl in, in do ih Pathian in i dungtun zo. Ka thusuhmi pawl i let lo. Profet in siseh, mang in siseh, i let hrimhrim nawn lo. Curuangah ziangso ka tuah ding, ti i simtu dingah ka lo ko a si,” tiah a ti.
16 Cutikah Samuel in, “Ziangahso Pathian ih a lo dungtun hnuah le na ral ih a can hnuah kei cu i kawh duh?
17 Bawipa in ka hnen ihsin a lo simmi kha na parah a kimter zo, na ram uknak cu na hnen ihsin a lak ih na ai ah David a pek zo a si.Ref 28:17 1 Sam 15:28;
18 Bawipa ih thupekmi na thlun lo ih Amalek mi pawl le an neihmi hmuahhmuah a zate in na siatsuah thluh lo. Curuangah Bawipa in hitiih a lo tuahnak a si.Ref 28:18 1 Sam 15:3-9;
19 Nangmah le Israel mi pawl cu Bawipa in Filistin mi pawl kut sungah a lo pek ding. Thaisun ah nangmah le na fapa pawl cu ka hnenah nan rung thlang ding. Cule Israel ralkap pawl cu Bawipa in Filistin mi pawl ih kut sungah a pek thluh ding a si,” tiah a ti.
20 Saul cu hmakhat teah a tlu ih leilung ah a ril. Samuel ih simmi thu cu a òih tuk lawmmam. Sunvu le zanvar zianghman a ei fawn lo ruangah Saul cu a òamsawl ih tha a nei lo.
21 Pol nu in Saul ih tluknak ahcun a va pan ih a thin a phangzet ti a hmuh ruangah a hnenah, “Bawipa, ka nunnak hman ruat lo in i fial mi cu ka tuah a si.
22 Curuangah atu ka lo fial mi hi tuah ve hram aw. Na hrangah rawl malte ka lo tuah sak pei. Ei awla na lamzin fehnak ah tha na nei deuh ding,” tiah a ti.
23 Saul in a ei duh lo; “Zianghman ka ei lo ding,” a ti. Asinan a kuthnuai bawi pawl khalin ei dingah an hnek ve ih a netabik ahcun an thu cu a thlun. Leilung ihsin a tho ih ihkhun parah a to.
24 Cutikah nunaunu cun thauseh tiih a rak cawm reromi caw note pakhat zamrang in a that. Sangphut a lak ih a hmal thluh hnuah thilnu tello sangah a tuah.
25 Saul le a kuthnuai bawi pawl ih hmai ahcun rawl cu a hun ih an ei. Cule a cuih zan ahcun an kir.