5
1 Atu cu zumnak in thiam cotermi kan si zo ih kan Bawipa Jesuh Khrih ruangah Pathian thawn kan rem aw zo.
2 Zumnak ruangih kan comi Pathian ih zangfahnak sungah amah in, in thlenpi ih cuih zangfahnak sungah cun atu hi kan um. Curuangah Pathian ih sunlawinak kan òawm aw ding tiah ruahsannak kan nei ih kan thin a nuam.
3 Cule harnak kan tuar tik khalah hin kan lung a awi thotho; ziangahtile harsatnak in tuartheinak a suahter,
4 tuartheinak in Pathian lungkimnak a suahter, cule amah ih lungkimnak in ruahsannak a suahter, ti kha kan thei.
5 Cule hi ruahsannak in kan bei dong lo in, in tuah, ziangahtile Thlarau Thianghlim sung ihsin Pathian in a duhdawtnak cu kan thinlung sungah a burh zo. Cuih Thlarau Thianghlim cu Pathian ih in pekmi laksawng a si.
6 Zianghman ti theimi kan neih lo laifangah Pathian ih khiahmi tikcu caan ah Khrih cu misual pawl hrangah a thi.
7 Miding hrang hmanah mi pakhatkhat thih ding cu a olmi thil a si lo. Miòha hrangah cun thih a ngamtu pakhatkhat an rak um khal a si thei.
8 Sikhalsehla Pathian in ziangtlukin so in duhdawt ti cu a langter: Misual kan si hrih na cingin kan hrangah Khrih cu a thi!
9 A thisen thawngin kannih cu Pathian thawn kan rem awk zo ruangah ziangtlukin so Pathian thinhennak ihsin amah in, in runsuak sinsin ding!
10 Hlanlai ahcun Pathian ih ral kan rak si, sikhalsehla atu cu a Fapa thihnak ruangah a rualpi ah in tuah zo. Pathian ih rualpi kan si zo ruangah Khrih ih nunnak in ziangtlukin so in runsuak sinsin ding.
11 Hi lawng hi a si hrih lo; Pathian rualpi ah in cantertu kan Bawipa Jesuh Khrih ruangah Pathian ih thil tuahmi ahhin kan lung a awi ngaingai a si.
12 Sualnak cu mi pakhat ruangah leilung ah a ra ih cuih a sualnak cun thihnak a thlenpi. Curuangah thihnak cu mi hmuahhmuah hnenah a thleng, ziangtintile zozo khal an sual òheh.Ref 5.12 Sem 2:17; 3:6;
13 Daan pekmi a um hlan ihsin sualnak cu leilungtlun ahhin a rak um zo; sikhalsehla Daan a um lonak hmunah cun sual cu sual ah siar a si lo.
14 Adam san thok ihsin Moses ih san tiang mi hmuahhmuah cu thihnak in a uk òheh; Adam in Pathian thupekmi a thlun lo ih a sual bangtukih an sual ve lo hmanah thihnak cun a uk thotho hai.
Adam cu nehhnu ih a ra dingmi pa ih hmuithlam a si.
15 Asinan cute pahnih cu an bang aw lo, ziangahtile Pathian ih laksawng cu Adam ih sualnak vek a si lo. Mi pakhat sualnak ruangah mi tampi thihnak an tong, ti cu thudik a si. Sikhalsehla Pathian ih zangfahnak cu, cu hnakin a tum deuh; Jesuh Khrih amah pakhat ih in zangfahnak Pathian ih laksawng cu mi tampi hnenah a tum sinsin a si.
16 Cule Pathian ih laksawng le mi pakhat ih sualnak cu an dang aw zet. Cuih vei khat sualnak hnu ih a ra thlengmi thuòhennak cu “Nan mawh,” tihi a si. Sikhalsehla sualnak tam zet hnuah kan hlawh lo cingih a ra thlengmi laksawng cu, “Nan mawh lo,” tiih thuòhennak a si.
17 Mi pakhat Adam ih sual ruangah thihnak in mi a uk òheh; sikhalsehla mi pakhat Jesuh Khrih ih a tuahmi thawngin Pathian zangfahnak tlamtling a ngahtu le amah thawn remawknak laksawng a cotu hmuahhmuah hnen ahcun ziangtluk tam sinsin in so dingnak in a uk hai ding.
18 Cuti a si ruangah sualnak pakhat tuahmi in mi hmuahhmuah cu sual a phurh bangtukin dingnak pakhat tuahmi in mi hmuahhmuah cu a luatter ih nunnak a pek.
19 Cule mi pakhat ih thu ngaih lonak ruangah mi hmuahhmuah misual ih canter an si bangtukin mi pakhat ih thungainak thawngin mi hmuahhmuah cu Pathian thawn an rem aw ding.
20 Daan a ra thlen tikah sualnak karhtertu ah a cang. Sikhalsehla sual a karhnak hmunah cun Pathian ih zangfahnak khal a karh sinsin ve.
21 Curuangah sualnak in thihnak thawn minung in uk vekin Pathian ih zangfahnak in dingnak thawn minung cu in uk ve; cuticun kan Bawipa Jesuh Khrih zaar in kumkhua nunnak sungah in hruai a si.