30
Lantak Puai Timtuahnak
1 Thla khatnak thla ahcun a thianghlimmi puithiam tlamtling in an um hrih lo ih misenpi tla tlamtling in Jerusalem an thlen thei hrih lo ruangah a tikcu caan ah Lantak Puai cu an tuah thei lo.
2 Cuhrangah siangpahrang Hezekiah le a kuthnuai ih bawi pawl le Jerusalem mi pawl in thla hnihnak thla ih tuah dingah an lung a kim.
3 Cuih Puai ah ra thei dingin Israel mi le Judah mi hmuahhmuah cu siangpahrang bawipa in a sawm. Efraim le Manasseh phun pawl hnenah ca a ngan ih Israel ih Pathian Bawipa ih hminthannak hrangah Jerusalem Biakinn ih Lantak Puai ra zawh dingah a hleice in sawmnak ca a kuat.Ref 30:2, 3 Mipum 9:9-11;
4-5 Saklam ah Dan ihsin thlanglam ah Beersheba tiang, Israel mi hmuahhmuah sawm ih kum dang hnakin Jerusalem ah mi tam deuh ngaingai ra ih Daan vekin Lantak Puai tuah dingih an tawlrel ruangah siangpahrang bawipa le misenpi pawl cu an ai a puang ngaingai.
6 Siangpahrang le a kuthnuai bawi pawl ih thupek vekin Judah ram le Israel ram sungah mi an thlah ih an mi sawmnak cu hitiin an ngan:
“Israel mi ulenau, Assiria mi in kan ram an neh nain nannih cu nan luat. Atu cu Abraham ih Pathian, Isaak ih Pathian le Jakob ih Pathian Bawipa ih hnenah kir thlang uhla, amah tla nan hnenah a kir ve ding.
7 Bawipa an Pathian hmaiah rinsan tlaklo ih a rak ummi nan pupa le nan unau Israel mi vek cun um nawn hlah uh. Nan theih thluh vekin annih pawl cu Bawipa in nasa zet in a hrem a si.
8 Anmah vekin nan lung ruh hlah seh; Bawipa ih thu cu thlun sawn uh. Nan parah Bawipa cu a thin a heng nawn lonak dingah Bawipa nan Pathian in a kumkhua ih thianghlim dingah a tuahmi Jerusalem Biakinn ah ra in Amah ra bia uh.
9 Bawipa ih hnenah nan kirsal a si ahcun nan unau sungkhat pawl hruaihlo tahrat in thawngih a thlatu pawl khalin an parah zangfah lainatnak thinlung an nei dingih inn ah an tlunter ding a si. Bawipa nan Pathian cu zangfahnak le lainatnak neitu a si ih Amah ih hnenah nan kir asile a lo pom hai ding,” tiah an ti.
10 Cule an mi thlahmi pawl cu Efraim le Manasseh ram sungih khua kipah an feh ih saklam bik Zebulun ram tiang an hung thleng; asinain misenpi in an rak hnihsan ih capohnak men ah an rak hman hai.
11 Asher phun, Manasseh phun le Zebulun phun sungin mi hrekkhat cu Jerusalem khua ah ra duhtu an um.
12 Cule Judah mi lakah Pathian hna a òuan ih siangpahrang bawipa le a kuthnuai bawi pawl thupekmi vekin Bawipa ih thu thlun dingah senpi pawl cu tumtahnak bangrep an nei.
Lantak Puai An Tuah
13 Thla hnihnak thla ah, Thilnu tello Sang Puai tuah dingah minung tam ngaingai Jerusalem khua ah an ra.
14 Jerusalem khuasung ih thawinak le rimhmui urnak biakòheng a ummi pawl an bal òheh ih Kidron Horkuam ah an hlon.
15 Cule cuih thla ni hleili ni ah Lantak Puai hrang thawinak ih tuu pawl an that. A thianghlim lomi puithiam le Levi mi pawl cu an ning a zah tuk ruangah Bawipa ih hnenah thianhlimnak an tuah copcop ih cuticun Biakinn sungah thawinak an pe ve.
16 Pathian ih siahhlawh Moses Daan pekmi bangtukin Biakinn sungah cun umnak an co ve. Levi mi pawl in thawinak hrangih rannung thisen cu puithiam hnenah an pek ih puithiam pawl in biakòheng parah an theh.
17 Mi tampi cu mithiang lo an si ruangah Lantak Puai hrangih tuu pawl an that thei lo; curuangah an ai ah Levi mi pawl in an that ih Bawipa ih hnenah tuu cu an pek.
18 Cuih tlunah Efraim phun, Manasseh phun, Issakhar phun le Zebulun phun sung ihsin a rami mi tampi cu thianternak a tuah hrih lomi an si ih Lantak Puai cu a daan lo in an tuah. Cutikah Siangpahrang Hezekiah in an ai ah thla a cam ih,
19 “Maw Bawipa, kan pupa ih Pathian, mithiang lo an si nain thinlungtak teih a lo betu pawl cu na zangfahnak thawn ngaithiam hramhram aw,” a ti.
20 Bawipa in Hezekiah thlacamnak cu a theih sak ih cupawl cu a ngaithiam; harsatnak zianghman an parah a thlenter lo.
21 Jerusalem khua ih a rami hmuahhmuah in Thilnu tello Sang Puai cu lungawi aipuangte in ni sarih sung an tuah; ni khat hnu ni khat puithiam le Levi mi pawl in Bawipa cu an thaneih zatl Thaneih zat in timi hi Hebru Ca Thianghlim sung vekin A nasa zetmi awnmawi thawn ti tla a si thei. in an thangòhat.
22 Bawipa biaknak ah mi hruai daan a thiamzettu Levi mi pawl cu siangpahrang Hezekiah in a lawm hai.
Cuticun ni sarih sung puai an tuah ih Bawipa ih hnenah remnak thawinak an pek ih an pupa ih Pathian cu an thangòhat.
23 Cuih hnuah an zate in ni sarih sung puai tuah pehsal dingah an lung a kimih a dang ni sarih sung lungawi aipuang in puai cu an tuahsal.
24 Siangpahrang Hezekiah in cuih puai ih misenpi pawl ei dingah cawcang thawngkhat le tuu thawngsarih a pek ih a kuthnuai bawi pawl in cawcang thawngkhat le tuu thawnghra an pe ve. Puithiam tampi in anmah thianhlimnak an tuah.
25 Cuticun mi hmuahhmuah Judah mi, puithiam pawl, Levi mi pawl, saklam ram ihsin a rungmi pawl le Israel le Judah ram sungih a um ringringmi ramdangmi pawl tla an zate in an lung a awi ngaingai.
26 Jerusalem khuapi cu lungawinak in a khat; cubangtuk lungawinak cu David fapa Siangpahrang Solomon san hnuah a um dah lo.
27 Puithiam le Levi mi pawl in senpi pawl cu Bawipa ih thluasuah an dil sak. Vancung a inn ihsin an thlacamnak cu Pathian in a thei ih a co sak hai a si.