19
Profet In Jehoshafat Nun A Sim
1 Judah siangpahrang Jehoshafat cu himdam tein Jerusalem khua a inn ah a kirsal.
2 Cule Hanani ih fapa profet Jehu cu siangpahrang Jehoshafat tong dingah a feh ih a hnenah, “Miòha lo pawl bom le Bawipa a huatu pawl hnenih òan hi a òha tiah na ruat maw si? Hitiih na tuah ruangah nangmah ih parah Bawipa ih thinhennak na thlenter.
3 Asinan na òhatnak khal cu a um ve: Midang ih an biakmi khawzingnu Asherah lem pawl na hlon òheh ih Bawipa ih duhnak na hawl ringring,” tiin nun a sim.
Jehoshafat Ih A Tharsuahmi
4 Jehoshafat cu Jerusalem khuapi ah a um nain Judah a ram sungah thlangta bik Beersheba in sakta bik Efraim tlangpar ramri tiang khual a tlawng ringring ih a minung pawl cu an pupa ih Pathian Bawipa ih hnenah hoikirsal dingah a forh vivo.
5 Judah ram sungih khuapi kipah thuòhentu pawl a ret ih,
6 an hnenah, “Thu nan rel ih thuòhennak nan tuah tikah ralring zet in nan tuah pei; thu nan òhen tikah nanmah ih thuneihnak in thu nan òhen a si lo; Bawipa ih thuneihnak in a si; cule thu nan òhen tikah Amah cu nan lakah a um a si.
7 Bawipa òihzah uhla ralring zet in hnaòuan uh; ziangahtile Bawipa in mibum, mi thleidan le nawhthuh ei pawl a zawi thei hrimhrim lo,” tiah thu a cahta vivo.
8 Jerusalem khua khalah siangpahrang Jehoshafat in thuòhentu ah Levi mi, puithiam pawl le khuasung upa hminthang pawl a ret hai ih Bawipa ih daan an buar tikah le khuasungmi taza an cuai awk tikah thuòhentu an si.
9 An hnenah, “Nan òuanvo cu Bawipa òihzah phahin felte le thleidannak nei lo tein nan òuan pei.
10 Khua dangdang ihsin nan unau pawl, pakhat le pakhat an thah pangawknak thu ah siseh, Bawipa ih daan le thukham an buarnak thu ah siseh, nan hnenih an thlen tikah Bawipa parih sualnak an neih lonak dingah ralring zet in an òuanvo ciar cu nan simfel pei. Cumi nan tuah lo a si ahcun nanmah le nan unau pawl in Bawipa ih thinhennak nasa zet in nan tuar ding. Sikhalsehla fel tein nan òuanvo nan tuah a si ahcun mawh nan phur lo ding.
11 Biaknak lam thu hmuahhmuah ah Puithiam Sang Amariah cu thuneitu bik a si ding; khuasungmi pawl ih thu ahcun Judah ram uktu bawi Ishmael ih fapa Zebadiah thuneitu bik a si ding. Thuòhentu pawl ih thuòhenmi tuahsuak dingah òuanvo a neitu cu Levi mi pawl an si ding. Ralòha zet in òuan uhla hi ka lo cahmi thu bangin tuah uh; Bawipa cu midik pawl parah um hram seh,” tiah a ti.