SAAM HLABU 129
Israel Ral Pawl Camnak
1 Maw Israel, na no lai ihsin
na ral pawl in,
Zangfahnak nei lo ih
an lo hremnak kha in sim hnik aw.
2 “Ka no lai ihsin ka ral pawl in,
Zangfahnak zianghman um lo in
in hrem;
Asinan in neh suak dah lo.
3 Ka zaang ah in dawt ih,
lei an leh bangin
thuk zetzet in, in rai.
4 Asinan a dingmi Bawipa cun
saltannak ihsin in luatter zo,” ti aw.
5 Zion a huatu hmuahhmuah cu,
ningzak in a sungmi le,
a dawi kirmi si hai seh.
6 A òhan reh hlanih a vuaisalmi,
Inn parih a khomi hrampi bangtuk
si hai seh.
7 Cuih hrampi cu zohman in
an finkhawm lo ih,
Fangteel bangin zohman in
an phur fawn lo.
8 A kiangih fehtu zohman in,
“ Bawipa in lo thluasuah
hram seh!
Bawipa ih hmin in
thluasuah kan lo pe!” an ti lo ding.