30
Thukam Awknak Tuah Tikih Thlun Ding Daan
1 Moses in a hnuailam ih daan pawl cu Israel mi hnam tinih hotu pawl hnenah a pek.
2 “Mi pakhat in Bawipa ih hnenah thil pakhat pek dingin thu a kam awk tikah siseh, asilole thil pakhat tuah lo dingin thu a kam awk tikah siseh, cuih a thukammi cu a balsal lo pei. Ka ti ding a timi cu kim tein a tuah thluh pei.Ref 30:2 Daan 23:21-23; Mat 5:33;
3 Fala pakhat in a pa ih inn ih a um lai ah Bawipa ih hnenah ziangmaw pek dingah thu a kam aw, asilole ziangmaw tuah lo dingin thu a kam awk tikah,
4 cuih a thukammi cu a pa in a theih tikah lungkim lonak a neih dah ti lo ahcun a thukammi vekin a thlun thluh pei.
5 Asinan a thukammi cu a pa in a theih ih a kham a si ahcun a thlun a òul lo pei. A thukammi vekih tuah ding cu a pa in a kham ruangah Bawipa in a ngaithiam ding a si.
6 Pasal nei hrih lomi nunau pakhat in, tumtahnak nei fetfet in maw, asilole tumtahnak mumal nei lem lo in maw, thil pakhatkhat tuah hrimhrim lo dingin thu a kam awk hnuah pasal a nei ih,
7 cumi cu a pasal in a theih tikah a lung a kim lo ih a kham dah tilo ahcun a thukammi vekin a thlun thluh pei.
8 Asinan a thukammi cu a pasal in a thei ih a kham a si ahcun a thlun a òul lo pei. Bawipa in a ngaithiam ding a si.
9 Nuhmei siseh, leengleh siseh, tuah dingih thu a kam awkmi, asilole tuah lo dingih thu a kam awkmi cu a thlun thluh pei.
10 Pasal a neimi nunau in thil pakhatkhat tuah lo dingih a kammi cu,
11 a pasal in a theih tikah a lung a kim lo ih a kham dah tilo ahcun a thukam vekin a thlun thluh pei.
12 Asinan a thukammi cu a pasal in a thei ih a kham a si ahcun a thlun a òul lo pei. A pasal in a kham a si ruangah Bawipa in a ngaithiam ding a si.
13 Nunau pakhat in siatcam ih thu a kammi, asilole thu a tiammi kha hngetter ding, asilole phiatsak dingah a pasal in thu a nei a si.
14 Asinan a nupi ih thukammi a theih sun ah lungkim lonak zianghman a langter lo ahcun a thukammi vekin a thlun a òul a si. A theih ve tein a nupi cu a kham lo ruangah a lungkimpi ah a cang.
15 Cun a nupi ih thukammi a theih hnupi ah a bal sak a si ahcun a nupi ih mawhnak cu amah in a tuar pei,” tiah a ti.
16 Hi daan pawl cu Bawipa in Moses hnenah pasal neimi nunau in siseh, pasal nei hrih lo a pa ih inn ih um laimi fala in siseh, thukamnak an tuah tikih thlun dingah a pekmi an si.