23
1 Cutikah Balaam in Balak hnenah, “Hitawkah ka hrangah biakòheng pasarih in dawl awla cawcang pasarih le tuucang pasarih i rak ken aw,” tiah a ti.
2 A sim vekin a tuah ih Balak le Balaam in biakòheng pakhat ah cawcang pakhat le tuucang pakhat fingfing biakòheng pasarih ah thawinak an pek.
3 Cule Balaam in Balak hnenah, “Na mei-ur thawinak kiangah hin rak ding hrih awla kei cu Bawipa in i tong duh maw tong duh lo ka va hliahta hrih pei. Bawipa in ka hnenih a langtermi hmuahhmuah cu ka lo sim ding,” tiah a ti. Cule Balaam cu tlang parah a feh ih,
4 Pathian in Balaam cu a tong. Balaam in, “Biakòheng pasarih ka dawl zo ih pakhat parah cawcang pakhat le tuucang pakhat fingfing ka thawi a si,” tiah a ti.
5 Cutikah Bawipa in, “Balak hnenah kir awla ka thucahmi va sim aw,” a ti.
6 Curuangah Balaam cu a kir ih Balak cu a mei-ur thawinak kiangah Moab mi hotu pawl thawn a rak din hrih kha a hmu.
7 Cule Balaam in a tanglam vekin
profet òongkam in a òong:
“Moab siangpahrang Balak in i ko,
Aramn 23:7 Aram: timi hi khuahlan hmin a si. Tuih san hmin cu Siria ti a si. le nisuahnak lam tlang ihsin,
“Ka ai ah ra sim aw,” i ti,
“Israel mi pawl camsiat aw,” i ti.
8 Pathian ih camsiat lomi
ziangtinso ka camsiat thei ding?
Pathian ih camriam lomi
ziangtinso ka camriam thei ding?
9 Lungpi tlangsang in
anmah cu ka cuan,
Tlangzik par ihsin anmah ka hmu.
Anmahte a nungmi miphun an si,
Miphun dang lakah a siar cih aw mi
an si lo.
10 Jakob ih tefa pawl cu
vunnel zat an si,
Israel cithlah pawl cu siar cawk
an si lo.
Pathian ih minung bangin
ka nunnak ni cu liamseh,
Miding bangin daihnak in
thi ning law,” tiah a ti.
11 Cutikah Balak in Balaam hnenah, “Ka parih na thil tuahmi hi ziangvek so a si? Ka ral pawl camsiat dingah hinah ka lo ko. Asinan anmah riangri thluasuah na pek,” a ti.
12 Cule Balaam in, “Keiih ka simmi cu Bawipa in sim dingih i fialmi lawng a si,” tiah a ti.
Balaam Ih Òongmi Vei Hnihnak
13 Cun Balak in Balaam hnen ahcun, “Ra awla Israel mi hrekkhat lawng na hmuh theinak hmunah kan feh pei. Cutawk ihsin ka ai ah camsiat hai aw,” a ti.
14 Balak in Balaam cu Pisgah Tlang zik, Zofim ih lo ah a fehpi. Cutawk ahcun biakòheng pasarih a dawl ih biakòheng pakhat parah cawcang pakhat le tuucang pakhat fingfing thawinak ah a pek.
15 Cule Balaam in Balak hnenah, “Hitawk na mei-ur thawinak kiangah rak ding awla khitawkah Pathian ka va tong ta pei,” tiah a ti.
16 Bawipa in Balaam cu a tong ih a òong dingmi pawl cu a sim ih Balak sim dingah a kirter.
17 Balaam cu a kir ih Balak a mei-ur thawinak kiangah Moab mi hotu pawl thawn a din hrih kha a hmu. Cutikah Balak in, “ Bawipa in ziang a ti so?” tiah a rak sut.
18 Balaam cun a thok ih profet òongkam in hitiin a ti:
“Ra aw, Zippor fapa Balak, ra aw,
Ka sim dingmi hi ra ngai hnik aw.
19 Pathian cu thuphan per hmang
milai vek a si lo,
A thinlung a thleng leuhleuhmi
milai vek khal a si lo.
A tiamkammi hmuahhmuah cu
a tuahsuak,
A òong ih tuah thluh an si.
20 Thluasuah pek ding lawng hi
in fialmi a si,
Pathian in thluasuahnak a pek zo ih
ka khirsal thei nawn lo.
21 Israel mi pawl hmailam ih
an fehnak dingah,
Vanduainak le harsat tonnak
ding ka hmu lo.
Bawipa an Pathian cu
an hnenah a um ih,
Pathian cu an Siangpahrang ah
an aupi a si.
22 Pathian in Izipt ram ihsin
a suahpi hai ih,
An hrangah cawcang hrang bangin
a òang a si.
23 Dawi siseh, polsia siseh, a um lo,
Israel miphun dodal ding ahcun.
Miphun pawl in Israel an hmuh tikah,
“Zoh hnik uh, Pathian thiltuah hi,”
an ti ding.
24 Israel miphun cu a cak zetmi
kiosa vek a si,
A deh cia mi sa a bauh thluh le
a ei thluh hlan lo,
A thisen a in thluh hlan lo cu
colh ti a nei lo,” a ti.
25 Cutikah Balak in Balaam hnenah, “Israel mi pawl camsiat ding cu na el thla rori a si hi! Sikhalsehla thluasuahnak tal cu pe lo in um aw,” a ti.
26 Asinan Balaam cun, “ Bawipa ih i fialmi lawnglawng ka tuah ding, tiah ka lo sim cia zo lo maw?” tiah a ti.
Balaam Ih Òongmi Vei Thumnak
27 Balak in Balaam hnenah, “Ka hnenah ra awla hmundang ah ka lo fehpi ding. Cutawk ihsin cun ka ai ih Israel mi pawl camsiat dingah Bawipa in a lo siang khal a si thei men,” a ti.
28 Curuangah Balak in Balaam cu nelrawn hmuh theinak Peor Tlang zik ah a fehpi.
29 Cule Balaam in Balak hnenah, “Ka hrangah biakòheng pasarih hitawkah dawl awla cawcang pasarih le tuucang pasarih i rak ken aw,” a ti.
30 A tivek cun Balak in a tuah ih biakòheng pakhat parah cawcang pakhat le tuucang pakhat fingfing thawinak ah a pek.