7
Pupa Pawl Ih Thuzirhmi
(Mat 15:1-9)
1 Jerusalem ihsin a rami Farasi òhenkhat le Daanthiam òhenkhat pawl cu Jesuh hnenah an va leng.
2 A dungthluntu hrekkhat pawl cu kut kholh lo ih rawl an ei kha an hmu; rawl ei hlanah nan kut nan kholh ding, timi vekin an kut an kholh lo, tinak a si.
3 Ziangahtile Farasi mi siseh, Judah mi dangdang pawl siseh, an zate in an pupa pawl ih thuzirhnak kha an thlun; a daan vekin an kut an kholhta lo ahcun rawl an ei lo;
4 cule dawrih an leimi thil khal a daan vekih an kholhta lo ahcun an ei duh lo. Cun an pupa pawl ih thuzirhmi khuathai kholhdan, beel kholhdan, darkheng kholhdan le ihkhun kholhdan ti pawl tla an thlun.
5 Curuangah Farasi mi pawl le Daanthiam pawl in Jesuh cu, “Ziangahso na dungthluntu pawl in kan pupa pawl ih in zirhta mi daan vekin nung lo in kut kholh lo pi thawn rawl an ei?” tiah an sut.
6 Jesuh in, “Profet Isaiah in nanmah ih thuhla a rak sim tikah a va dik lawmmam so! Nannih mititeraw pawl, nan thu cu hitiin a ngan:
Pathian in ‘Hi minung pawl hin
an òongkam lawngin in upat;
An thinlung cu ka hnen ihsin
a hlat ngaingai a si.
7 Keimah in biak hi a lak a si,
Ziangahtile milai ih tuahcopmi
daan kha Pathian ih pekmi daan vekin
an zirh a si,’Ref 7:6-7: Isa 29:13 a ti.
8 Pathian thupekmi cu nan taan ih milai ih zirhmi sawn cu nan thlun a si!” tiah a ti.
9 Cule Jesuh in a peh ih, “Nanmah ih thuzirhmi fekter ih Pathian pekmi daan hnon zia cu nan va thiam so!
10 Ziangahtile Moses thupekmi sungah ‘Nan nu le nan pa upat uh,’ tile ‘A nu siseh, a pa siseh, a camtu cu thah a si ding,’ tiah a um.Ref 7.10 Suah 20:12; 21:17; Pui 20:9; Daan 5:16;
11 Sikhalsehla nannih cun ‘Mi pakhat in a nu le a pa kha: Nanmah bomnak hrangah ka timi ka thilri hi Korban a si, a ti ahcun, (Korban ti cu Pathian ta a si tican a si)
12 cupa cu a nu le a pa bomnak ihsin a luat,’ tiah nan ti.
13 Cutiih mi nan zirhmi in Pathian òongkam cu a phiat òheh a si. Cule cubangtuk ih nan tuahmi dangdang tla tampi a um,” tiah a ti.
Minung Baaltertu Thil
(Mat 15:10-20)
14 Cule Jesuh in misenpi kha a kosal ih an hnenah, “Nan zate in ka thusimmi hi ngai uhla thei uh!
15 Minung hi lenglam ihsin sung lamah a lutmi thil in a baalter lo. A sunglam ihsin a ra suakmi in a baalter sawn a si,” tiah a ti.
16 ‘Theihnak hna nan neih ahcun thei uh,’ tiin a sim.
17 Jesuh in misenpi pawl cu a fehsan ih inn sungih a luh tikah a dungthluntu pawl cu cuih a òongmi sullam sut dingah an ra.
18 Jesuh in, “Midang pawl hnakin nan fim cuang lo a si hi! Nan thei lo ngaingai maw? Lenglam ihsin minung sungah a lutmi in mi a baalter thei lo,
19 ziangahtile cuih thil cu a thinlung sungah feh lo in a pumpi sungah a feh ih cuticun zunpawng ah a suaksal a si,” tiah a ti. (Hitiin Jesuh ih a sim tikah ziangbangtuk rawl hman hi ei thiang an si òheh ko, tiah a ti duhnak a si.)
20 Cule Jesuh in, “Mi a baaltertu ngaingai cu a sunglam ihsin a suakmi an si.
21 Ziangahtile òhatlonak a tuahtertu ruahnak òha lo pawl cu minung sunglam ihsin a suakmi an si: Nupa sualnak, rukruk, mithah,
22 Òaangòawm sualnak, duhham, thil siava dangdang tuah, mibum, a mawi lo zetmi thilsual tuah, iksik, misimsiat, puarthau le aatthlakza thil tuahnak,
23 hi thil siava pawl hi minung thinlung sung ihsin a suakmi an si ih hi pawl hin mi an baalter a si,” tiah a ti.
Nunau Nu Ih Zumnak
(Mat 15:21-28)
24 Cule Jesuh cu a feh ih Òaiar khua kiang a hung thleng. Inn pakhat sungah a lut ih cutawkah a um ti zohman theihter a duh lo; asinain a thup aw thei cuang lo.
25 Cu ngaingai in, a fanu ramhuai ih a kaihmi nunau pakhat in Jesuh a um ti kha a thei ih hmakhat teah Jesuh kehram ah a bok.
26 Cuih nunaunu cu Zentail nu a si ih Siria ram Fonisia pengih a suakmi a si. Ramhuai kha a fanu sung ihsin dawisuak dingah a dil.
27 Asinan Jesuh cun, “Rawl cu faale pawl kan pek hmaisa pei. Faale pawl ih rawl uico pek cu a dik lo a si,” tiah a ti.
28 Cunu cun, “A si ko, Bawipa! Sikhalsehla faale pawl ih hlahtakmi rawl òilfuan cu cabuai hnuai ih uico pawl in an ei ve òheu ko a sisi!” tiah a ti.
29 Cutikah Jesuh in, “Cutiih i leh thei ruangah inn ah va tlung awla na fanu sung ihsin ramhuai cu a suak zo ti na va hmu ding,” tiah a ti.
30 Inn ah a tlung ih a fanu cu ihkhun parih a rak ih kha a va hmu. Ramhuai cu a sung ihsin a rak suak zo ngaingai.
Hnaset, Òongthiam Lo A Damter
31 Cule Òaiar peng ihsin Jesuh cu a pok ih Sidon ram pal phahin Dekhapolis ram laifang a hruut ih Galilee Tili a thleng.
32 Mi òhenkhat in a hnenah hnaset òong thiam lo pa pakhat an rak keng ih a parah Jesuh in a kut suang dingin an dil.
33 Curuangah Jesuh in cupa cu mipi hnen ihsin hmun dangdeuh ah a hruai ih a kut zungin a hna pahnih cu a tawhsak; cil a phui ih a lei a thamsak.
34 Cule vanlam hoi in Jesuh cu a hruum ih cupa hnen ahcun, “Effatha,” tiah a ti. A tican cu “Ong aw thlang aw,” tinak a si.
35 Hmakhat teah cupa cu a hna a vang, a lei a naal ih har lo tein a òong thei.
36 Cuih thu cu zo hnen hmanah sim lo dingin Jesuh in mipi pawl cu a dawn. Asinan tam deuh a dawn hai tikah tam deuhdeuh in an sim.
37 Cule cuih thu a theitu hmuahhmuah in an mang a bang ngaingai ih, “A tuahmi hmuah in an va òha lawmmam so! Hnaset mi an hna a vang ih òong thiam lo tla an òong thei,” tiah an fak ciamco.