25
Kum Sarihnak
(Daan 15:1-11)
1 A hnuailam ih daan pawl cu Israel mi hnenih pek dingah,
2 Bawipa in Moses hnenah Sinai Tlang parah a sim. Bawipa ih a lo pek dingmi ram nan thlen tikah kum sarihnak kum cu nan thlo lo pei; cuticun Bawipa nan upatnak nan langter ding.
3 Kum ruk sung nan lo ah thlaici nan tuh pei, nan sabit hmuan simsial in a hnge pawl tla nan tan pei ih lorawl pawl nan khawm pei.
4 Sikhalsehla a kum sarihnak cu nan leiram a colh kum, sabbath kum, Bawipa ih hnenah nan pek kum a si pei. Nan lo ah thlaici nan tuh lo pei. Nan sabit hmuan khal nan simsial lo pei.
5 Nan tuh lo nain nan lo ih a kho thothomi rawl hman kha nan la lo pei; nan simsial lomi nan sabit hnge pawl ih sabit rah khal nan lo, lo pei; nan leiram a colh kum a si pei ih a dai in nan dai lo pei.
6 Cuih kum ahcun nan lo nan thlo lo ding; asinain nanmah le nan sal pawl, hnaòuan nan fialmi pawl le nanmah lakih a um ramdangmi pawl cu nan lo in a lo cawm hai ding.
7 Innzuat òilva le hramlak ih ramsa pawl khal a cawm ding. Thlawh lomi ram ih a suakmi hmuahhmuah cu ei a si pei.Ref 25:1-7 Suah 23:10, 11;
Jubilee Kum
8 Kum sarih kum sarih in vei sarih, a zate in sawmli le kum kua a kim tiang siar uh.
9 Cuih hnu thla sarih thla ni hra ni, sualthlah thawinak ni ah mi pakhat nan ram pumpi sungah tawtawrawt nan phawtter pei.
10 Cuticun kum sawmnga kum cu Jubileel 25:10 Jubilee: timi hi Hebru òong in yobhel ihsin a ra ih a tican cu tuucangki tinak a si. Cuih puai caan ah tuucangki an tum òheu ruangah cutiih hmin an peknak a si. kum Pathian sunloih an pek kum a si pei ih ram sungih a ummi minung hmuahhmuah hnenih zalennak nan than kum a si pei. Hi kum ah an neihmi leiram le innlo an rak leimi hmuahhmuah cu a hmaisa ih a rak neitu hnenah, asilole a rocotu a tesinfa hnenah, khirh thluh a si pei. Sal ih an zuar zomi pawl khal a leitu in an sungkhat hnenah an kir thluh pei.
11 Nan lo ah thlaici nan tuh lo pei; amah teih a khomi rawl khal nan lak lo pei; nan simsial lomi nan sabit hmuan ih sabit rah khal nan lo, lo pei.
12 Cuih kum cu Jubilee kum a si ih nan hrangah kum thianghlim a si. Nan thlawh lomi ram ih a suahmi rawl lawnglawng nan ei pei.
13 Hi kum ahcun zuar cia mi leiram hmuahhmuah a hlanih a rak neitu hnenah khirh thluh an si pei.
14 Curuangah na mi phunpi Israel mi pakhatkhat hnenah leiram na zuar, asilole a hnen ihsin na lei tikah a dik lo in zuar ding le lei ding a si lo.
15 A man cu hmai Jubilee kum a kimsal hlanah hi leiram in kum ziangzat sungah rawl ziangzat a suak pei ti zoh in khiah ding a si.
16 Kum tampi a duh hrih a si ahcun a man cu a tam dingih kum malte lawnglawng a tang a si ahcun a man a niam thung ve ding; ziangahtile an zuarmi ngaingai cu leiram ih a suahmi rawl kha a si sawn.
17 Israel mi na laicinpi va bum hlah; na Pathian òihzah aw. Keimah hi Bawipa nan Pathian cu ka si.
Kum Sarih Kum Ih Harsatnak
18 Hi ram sungah hnangam zet ih nan umnak dingah Bawipa ih daan le thupekmi pawl cu thlun uh.
19 Leiram in rawl a suah pei ih, ei nan duhmi nan ngah thluh ding; cule hnangam zet in nan um ding.
20 Sikhalsehla mi pakhatkhat in hi kum sarih kum, lo thlawh lo kum le rawl lak lo kum ahhin ei dingah ziangso a um ding, tiah a sut ding.
21 Bawipa in kum ruknak kum ah leiram cu a thluasuah dingih curuangah kum thum hrang daih in rawl a suah ding a si.
22 Kum riatnak kumih rawlci nan tuh tikah kum ruknak kum ih nan lakmi rawl kha nan ei thotho hrih dingih cuih kum riatnak kumih nan tuhmi rawl nan lak hlan sung hmuahhmuah cu rawl ei ding cat lo in nan nei ko ding.
Thilri Khirhsalnak
23 Nan leiram le innlo cu kumkhua hrangin nan zuar lo pei; ziangahtile nan ta a si lo; Pathian ta a si ih nannih cu mikhual a laang teih hmanter sungmi lawng nan si.
24 Leiram le innlo nan zuar tikah a zuartu pa in leikirsal theinak a nei pei.
25 Israel mi pakhatkhat a farah ruangah a leiram a zuar a si ahcun a nai bik a sungkhat in a leikirsal thei ding.
26 Leikirsal saktu sungkhat a nei lotu cu nehhnu ah leikirsalnak sumsaw a neihsal ahcun,
27 a leikirsal thei ni in Jubilee kum tiang hrang òuat in a zorh mi pa hnenah a man a pek pei ih cuticun a leiram cu a lasal pei.
28 Sikhalsehla leikirsalnak sumsaw nei lo ringring a si ahcun Jubilee kum a kim hlan sung cu a leitu pa in a nei hrih pei. Cule Jubilee kum ah a hnenah khirhsal a si pei.
29 Tlakrawh phardawl ih kulhmi khuapi sung inn cu a neitupa in a zuar tikah kum khat sungah tlensal theinak a nei pei.
30 Sikhalsehla kum khat sungih a tlensal thei lo a si ahcun, leikirsal theinak a nei lo pei ih cuih inn cu kumkhua in a leitu le a tesinfa pawl ih ta a si pei; Jubilee kum khalah khirhsal a si nawn lo pei.
31 Cun kulh lomi khuasung inn pawl cu khualeng inn vekah ruah an si pei ih a rak nei hmaisatu in a tlen thei pei; Jubilee kum ahcun khirhsal thluh an si pei.
32 Asinan Levi hrin pawl cun Levi khuapi ih inn pawl cu an duh tiktikah an tlensal thei ding.
33 Kulhmi khuapi ih inn cu Levi mi in a zuar ih a tlensal lo a si ahcun Jubilee kum ah khirh a si pei; ziangahtile khuapi sungih Levi hrin pawl ih inn cu a kumkhua in anmah ih ta a si.
34 Cuih tlunah Levi miphun pawl ih khuapi kiangkap ih ram pawl cu ziangtik hmanah zuar ding an si lo; a kumkhua in an ta a si.
Farah Hnenih Sumsaw Coih Daan
35 Nan kiangkap ih um nan phunpi Israel mi a farah ih a nun a har a si ahcun, nan kiangih a um thei ringringnak dingah nan hnenum asilole mikhual nan cawm vekin cawm ve uh.Ref 25:35 Daan 15:7, 8;
36 Tangka nan coih asile a òhang lak hlah uh; Pathian òihzah uhla mifarah pa cu nan kiangah um ve seh.
37 A òhang thawn tangka coih hlah uh;Ref 25:37 Suah 22:25; Daan 23:19, 20; a miat in rawl khal zorh hlah uh.
38 Himi cu Bawipa nan Pathian ih thupekmi a si. Amah cu nan Pathian a sinak dingah le Kanaan ram nan conak dingah Izipt ram ihsin a lo suahtu a si.
Sal Pawl Luatternak
39 Nan kiangkap ih a ummi nan phunpi Israel mi pakhat a farah ih a nun thei lo ruangah sal ah a zuar aw a si ahcun sal hnaòuan nan òuanter lo pei.
40 Hlawh phalhmi hnenum vekin nan hnenah a um pei ih hmai Jubilee kum tiang nan hna a òuan pei.
41 Jubilee kum a thlen tikah amah le a faate pawl cun an lo taan pei ih an sungkhat le an pupa ih leiramah an kir pei.
42 Israel mi pawl cu Bawipa ih sal nan si ih amah in Izipt ram ihsin a lo suah zo a si ruangah sal ih zuarmi nan si nawn lo pei.
43 Nan Pathian òihzah uhla cubangtuk farah pawl cu tisia hlah uh.
44 Sal neih nan duh a si ahcun nan kiangkap ih a ummi ramdangmi pawl sung ihsin nan lei thei.
45 Nanmah lakih a um ramdangmi sung ihsin an faate pawl tla nan lei thei. Nan ram sungih a suakmi an faate pawl cu nan thilri ah an cang thei.
46 Nan fapa pawl hrangah ro ah nan roh thei ih nan fapa pawl an nun sung cu an hna an òuan ding. Sikhalsehla nan unau Israel mi cu nan tisia lo pei.Ref 25:46 Suah 21:2-6; Daan 15:12-18;
47 Nan lakih a um ramdangmi, asilole nan hnaòuantu pakhatkhat a lian ih nan unau Israel mi pakhat a farah tuk ruangah a cuih milianpa hnenah sal ih a zuar awk a si ahcun,
48 a lei hnu khalah tlensal theinak a um ding. Amah ih unau pakhatkhat,
49 asilole a paseu maw, a unauseu maw, asilole a sungkhat pakhatkhat in maw an tlen thei ding. Culole amah in paisa a neih thei a si ahcun amah le amah a tlen aw thei pei.
50 Amah a rak leitupa ramdangmi ih lungkimnak in, amah a zuarawknak ihsin hmai Jubilee kum tiang a kum an siar pei ih hnaòuan fial mi pa ih nihlawh man òuat in a luatnak man cu an khiak ding.
51 A luatnak dingah kum reipi a taan hrih a si ahcun a leinak man tuat in a luatnak man cu an khiak ding.
52 Jubilee kum tiang kum malte lawng a tang a si khalle a kum tuat in a luatnak man cu an khiak ding.
53 Kum khat hnu kum khat hnaòuan fialmi minung bangtukih ruat in ramdangmi ih kut hnuai ah a um ding; sikhalsehla a leitupa cun a tisiat hrimhrim lo pei.
54 A tlunih luat theinak lamzin pawl in a luat thei cuang lo a si ahcun hmai Jubilee kum ah amah le a faate pawl cu luatter an si pei.
55 Israel mi pawl cu Bawipa ih sal nan si ruangah midang sal ah a kumkhua cun nan si thei lo pei. Izipt ram in a suahmi nan si. Amah cu Bawipa nan Pathian a si.