8
Jesuh Thluntu Nunau Pawl
1 Tawkfang a rei hnuah Jesuh cu Pathian Uknak Thuthangòha sim in khuapi le khuate a tlawng vivo. Dungthluntu hleihnih tla an tel.
2 Cule natnak a phunphun le khawsia ih polhmi pawl a damtermi nunau tla an tel ve: A sung ihsin ramhuai pasarih a dawisuakmi Mari (Magdalene ti tla in kawhmi),
3 Herod zung ah bawi a simi Khuza nupi Joanna, Susanna le an neihmi thilri thawn Jesuh le a dungthluntu pawl a bawmtu nunau pawl tla an si.Ref 8.3 Mat 27:55-56; Mar 15:40-41; Luk 23:49;
Thlaici Vorhtu Tahòhimnak
(Mat 13:1-9; Mar 4:1-9)
4 Khuakhat hnu khuakhat in Jesuh hnenah mi an ra; mi tam ngaipi a hnenih an ratkhawm tikah hitiin tahòhimnak a sim.
5 “Veikhat ah mi pakhat cu thlaici vorh dingah a feh. Lo sungih thlaici a vorh tikah a òhenkhat cu lamzin tluanah an tla ih cupawl cu mi in an pal, vate in an sar òheh.
6 Òhenkhat cu lungsedaap lakah an tla ih thlaici cu an kho nain leilung a hnawng lo ruangah an car òheh.
7 Thlaici hrekkhat pawl cu hlingbur lakah an tla ih hlingkung thawn an òhang tlang ih hlingkung in a zaap òheh.
8 Cule òhenkhat cu leilung òhatnak ah an tla ih an kho ih an vui; fang zakhat fingfing an nei. Theihnak hna a neitu cun thei uh,” tiah a ti.
Cuih Tahòhimnak Ih Tican
(Mat 13:10-23; Mar 4:10-12)
9 Cuih tahòhimnak ih tican ziang a si, tiah a dungthluntu pawl in Jesuh an sut.
10 Jesuh in, “Pathian Uknak ih thuthup theih theinak cu nan hnenah pek a si zo; asinain midang hnen ahcun tahòhimnak thawn lawngin sim a si ding. Curuangah an zoh rero ding nain an hmu thei lo ding, an ngai rero ding nain an theithiam lo ding.Ref 8.10 Isa 6:9-10;
Thlaici Vorh Tahòhimnak Ih Tican
(Mat 13:18-23; Mar 4:13-20)
11 “Hi tahòhimnak ih tican cu hitiin a si: Thlaici cu Pathian ih òongkam a si.
12 Lamzin tluan ih a tlami thlaici cu Pathian òongkam an thei nain Satan a ra ih an zum lonak ding le runmi an si lonak dingah an thinlung sung ihsin Pathian ih thu cu a lak hlosak mi pawl an si.
13 Lungsedaap lakih a tlami thlaici cu Pathian òongkam cu an thei ih lungawi zet in an pom. Asinan an thinlung sung thukpi ah a pil lo. Tikcu tawite sung an zum ih hniksaknak caan a thlen tikah a tlusalmi pawl an si.
14 Hlingbur lakih a tlami thlaici cu Pathian òongkam cu an thei; sikhalsehla leilungtlun donharnak, len duhnak le taksa nomnak in a khuh ih ziangtik hmanah a rah cu a hmin dah lomi pawl an si.
15 Leiram òha ih a tlami thlaici cu Pathian òongkam an thei ih thinlung òha le zawnlung teih a cem tiang rah nei ko a pom hngettu pawl an si,” tiah a sim.
Kho Khuhmi Mei-inn
(Mar 4:21-25)
16 Cule Jesuh in, “Zohman in mei-inn vang tahrat in kho an khuh dah lo, ihkhun hnuai khalah an ret keel lo. Inn sungih mi an luh tikah tleunak an hmuh fiang theinak dingah mei-inn vannak tung parah an ret a si.Ref 8.16 Mat 5:15; Luk 11:33;
17 “A thup teih thuhmi hmuahhmuah cu langter thluhsal a si dingih khuhmi thil hmuahhmuah cu khawtleu ah suahtersal òheh an si ding.Ref 8.17 Mat 10:26; Luk 12:2;
18 “Curuangah thu nan ngaidan ahhin ralring uh; ziangahtile thil tawkfang a neitu cu peksin a si dingih zianghman a nei lotu cu malte ka nei tiih a ruahmi hman kha lak sak a si ding,” tiah a ti.Ref 8.18 Mat 25:29; Luk 19:26;
Jesuh Ih Nu Le Unau Pawl
(Mat 12:46-50; Mar 3:31-35)
19 Jesuh ih nu le a nau pawl kha a hnenah an ra, asinain mi an tam tuk ruangah an tong thei lo.
20 Mi pakhat in Jesuh hnenah, “Na nu le na naule pawl lenglam ah an ding ih an lo tong duh,” tiah a ti.
21 Jesuh in mipi hnenah, “Ka nu le ka naule pawl cu Pathian thu a thei ih a thluntu pawl an si,” tiah a ti.
Jesuh In Thlisia A Daiter
(Mat 8:23-27; Mar 4:35-41)
22 Veikhat ah Jesuh cu a dungthluntu pawl thawn lawng sungah an lut ih an hnenah, “Tili khatlam ralah feh uh si,” tiah a ti. A ti vek cun an feh.
23 Long in an feh rero lai ahcun Jesuh cu a it that! Rinlopi ah thlisia a rung hrang ciamco; an lawng sungah tidai a lut ih a khah zik thlang tikah cun an phang ngaingai.
24 Dungthluntu pawl in Jesuh cu an va òhang ih, “ Bawipa, Bawipa! Kan thi thluh zik thlang sokhaw,” tiah an ti.
Jesuh cu a hung tho ih thlisia le tilet cu thu a pek. Thlisia cu a reh ih zianghman thawthang um lo in a dai khepkhep.
25 Cule a dungthluntu pawl cu, “Nan zumnak khuiahso?” tiah a ti.
Sikhalsehla annih cu an mang a bang ih an òihzet; cule pakhat le pakhat, “Hi pa hi zoso a si? Thlisia le tilet tla thu a pek ih a thu an ngai hi!” tiah an ti aw.
Khawsia Polhmi Jesuh In A Damter
(Mat 8:28-34; Mar 5:1-20)
26 Jesuh le a dungthluntu pawl cu lawng in Galilee tili ralkhat Gerasene timi peng ah an thleng.
27 Jesuh cu tikap ih a suah zawng ah khawsia pawl ih polhmi pakhat in a rak tong. Cupa cu caan reipi inn ah um lo in le hnipuan hruk lo in a tawivak vivo ih mithi phumnak lungkua sungah a um sawn òheu.
28 Jesuh a hmuh tikah napi in a raak ih Jesuh kehram ah a hlon aw ih ring zet in, “Jesuh, Cungnungbik Pathian Fapa! Nang le kei ziangso kan seng aw? I hrem hram aw hlah, tiah ka lo dil!” tiah a au.
29 Ziangah cuvekin a au tile Jesuh in khawsia kha cupa sung ihsin suak dingin thu a pek ruangah a si. Vei tampi cu khawsia cun a tuah tikah thawnginn ah a kut le a ke thir cikcin in an òem khalle thir cikcin cu a phihcat thluh ih khawsia cun ramòhing ah a hlohter òheu a si.
30 Jesuh in, “Na hmin zoso?” tiah a sut.
Anih in, “Ka hmin cu burpi ka si,” tiah a sawn. Ziangahtile khawsia burpi a sungih an um ruangah a si.
31 Khawsia pawl in Jesuh cu, “Khur thukpi sungah in thlak hram hlah aw,” tiah an dil.
32 Cutawk kiangkap tlang parah vokrual tampi an tlang rero. Khawsia pawl in Jesuh cu, “Vok sungah in lutter hram aw,” tiah an dil ih an dil vek cun vok sungah a thlah hai.
33 Cupa ih sungin an suak ih vokrual sungah cun an lut. A cuih vokrual cu khaamsangpi ihsin an vung dawp ih tili sungah an pil that thluh.
34 Cuih vokrual a khaaltu pawl in ziang a cang ti kha an hmu thluh in zamrang in an tlan ih cuih thu cu khuasung le lo lakah an than ciamco.
35 Ziang a cang ti zoh dingah mi tampi an va feh. Jesuh hnen an thlen tikah a sung ihsin khawsia a suak mipa cu Jesuh kehram ah a to ih hnipuan hrukin le thinlung fimin a um kha an va hmu ih an òih ngaingai.
36 Ziang bangtukin a dam ti a hmutu pawl in a thuhla cu an sim.
37 Cuih ram sungih a ummi hmuahhmuah in an òih ngaingai ih an zate in Jesuh cu hmundang ih feh dingin an dil. Curuangah Jesuh cu lawng sungah a lut ih a feh.
38 A sungih khawsia tampi a dawi mipa cun, “Na hnenah i fehter ve aw,” tiah a dil ciamco.
Sikhalsehla Jesuh in,
39 “Inn ah va tlung awla Pathian in na hrangih a tuahmi thu hi va sim aw,” tiah a ti ih a tlunter.
Cupa cu khuasung ah a tlung ih Jesuh in a hrangih a tuahmi cu mi hnenah a sim ciamco.
Jairas Fanu Le Jesuh Puan A Thamtu
(Mat 9:18-26; Mar 5:21-43)
40 Jesuh cu tili ral khatlam a thlen tikah mi tampi in an rak hmuak, ziangahtile caan reipi amah kha an rak hngak zo.
41 Cule Jairas an timi pa a ra thleng. Jairas cu sinakok uktu a si. Jesuh kehram ah a bok ih a inn ih ra dingin a dil,
42 ziangahtile a fanu neihsun, kum hleihnih a simi cu, a na ih a thi zik thlang.
Jesuh cu a va feh ih cutiih a feh lai ahcun miburpi in a kilkip in an fuuk ih an thlun luihlo.
43 Cumi lakah nunau pakhat, kum hleihnih sung thidok natnak a tuartu a tel ve. A neihmi hmuahhmuah cem òheh in sibawi pawl hnenah a tuamhlawm aw nain zohman in an damter thei lo.
44 Mipi lakah cun Jesuh dunglam ihsin a hung ih Jesuh ih puanzimte kha a tham; cule a thidok cu hmakhat teah a reh.
45 Jesuh in, “Zoso i thamtu?” tiah a sut.
“Zohman in kan lo tham lo,” an ti. Cule Piter in, “ Bawipa, na kimvel ah mipi in an lo kulh ih an lo naih cupco a sisi!” tiah a ti.
46 Asinan Jesuh in, “Mi pakhatkhat in i tham a si, ziangahtile ka sung ihsin huham a suah kha ka thei,” tiah a ti.
47 Nunaunu in keimah ka si, ti i thei zo, tiah òhia rero in a ra ih Jesuh kehram ah a ra bok. Cutawkah mizapi hmuh ahcun ziangruangah Jesuh cu a tham ih ziang vekin hmakhat teah a dam ti thu tla a sim òheh.
48 Jesuh in, “Ka fanu, na zumnak in a lo damter zo; hnangam tein va tlung aw,” tiah a ti.
49 Cutiih Jesuh a òong rero lai ah Jairas inn ihsin mi an rak thlahmi a ra thleng ih Jairas kha, “Na fanu a thi zo; Sayapa cu hnaihnok nawn hlah,” tiah a ra ti.
50 Jesuh in cumi cu a thei ih Jairas hnenah, “Na thinphang hlah! Zum ringring aw; cule na fanu cu a dam ko ding,” tiah a ti.
51 Jesuh cu Jairas ih inn a thlen tikah Piter, Johan, Jeim le nauhaknu ih nu le pa siar lo zohman inn sungah a luhter lo.
52 Cutawk mithi hmunih a ummi hmuahhmuah cu riahsia in an òap rero. Jesuh in, “Òap hlah uh; hi nauhaknu hi a thi lo, a itthat a si,” tiah a ti.
53 Nauhaknu a thi ti cu zokhal in an theih ruangah Jesuh cu an hnihsan.
54 Sikhalsehla Jesuh in a kut in a vun kaih ih, “Ka fanu, tho aw,” tiah a ti.
55 A hung nungsal ih hmakhat teah a hung tho. “Rawl ei ding pe uh,” tiah Jesuh in a ti.
56 A nu le pa cun mak an ti ngaingai. Jesuh in cuih thu cu zohman sim lo dingin a tiam.