20
Siria Thawn An Do Aw
1 Siria Siangpahrang Benhadad in a ralkap hmuahhmuah a khawm òheh ih, amah ih ralkap pawl ih tlunah ramdang uktu bawi sawmthum le pahnih in an bawm ih an rang le an raldonak rangleng pawl thawn Benhadad ho in an feh. Samaria khuapi an kulh ih an do ciamco.
2 Khua sungah palai a vun thlah ih Israel Siangpahrang Ahab hnenah, “Siangpahrang Benhadad in,
3 na sui le na ngun pawl, na nupi mawi bik pawl le na faate lakih a cak bik pawl i hun pe seh, a lo ti,” tiah an vung sim.
4 Cutikah Ahab in, “Ka bawipa Benhadad cu va sim uh: I dil vekin ka lung a kim a si. Keimah le ka neihmi hmuahhmuah khal a duh ahcun a ta kan si thei ko,” tiah a ti.
5 Cuih hnuah Benhadad ih palai pawl cu Ahab hnenah an rasal ih, “Na sui le na ngun, na nupi pawl le na faate pawl, i pe ding, tiah ka lo cah.
6 Sikhalsehla atu ah ka kuthnuai ih bawi pawl ka run thlah pei ih, na umnak inn le na kuthnuai bawi pawl ih inn an rung hawl òheh ding; man nei thil an hmuhmi pohpoh an la ding. Thaisun atu tikcu ah an ra thleng ding, a lo ti,” tiah an sim.
7 Siangpahrang Ahab in a ram sungih hotu pawl hmuahhmuah a kokhawm ih an hnenah, “Hi pa hi in siatsuah duh ruangah thusia lawnglawng a hawl a si. Ka nupi pawl, ka faate pawl, ka sui le ka ngun pawl i dil ih pek ding cu ka el lo,” tiah a ti.
8 Hotu pawl le misenpi pawl in, “A thu cu zianghman ah siar duh hlah aw. A lo dilmi zianghman pe hlah,” an ti.
9 Curuangah Ahab in Benhadad ih palai pawl hnenah, “Nan siangpahrang ka bawipa cu hung sim uh: “A hmaisa ih i dilmi cu pe dingah ka lung a kim ko. Asinan a neta ih i dilmi cu ka lung a kim thei lo a si” va ti uh,” tiah a ti.
Cule Benhadad ih palai pawl cu an tlung;
10 asinain Benhadad in palai a run thlah kirsal ih hitiin thu a run cahsal: “Na khuapi an siat thluh hnu ih a leivut le a hnawmhne hman an kut ih thiar thluh theitu ralkap siar cawk lo ka runpi ding. Ka tivek ih ka tuah lo a si ahcun khawzing pawl in keimah i that hai seh,” a run ti.
11 Siangpahrang Ahab in thu a khirh ih, “Siangpahrang Benhadad cu hung sim uh: Ralkap òha taktak cun ral a do òheh hlanah tluang a khawng dah lo; ral a neh hnu lawngah tluang a khawng a si,” tiah a rak ti.
12 Ahab ih thucahmi cu Benhadad le a òantu bawi pawl an riahhmun ih zu an in lai ah a va thleng. Hmakhat teah Samaria do dingin Benhadad in thu a pe ih a ralkap pawl cu an òannak hmun ciar ah tiar cia in an um.
13 Culaifang ah Israel siangpahrang Ahab hnen ahcun profet pakhat a feh ih, “ Bawipa in, “Hi ralkap pawl hi an tam ruangah òih hlah uh. An tlunah nehnak ka lo pe dingih Keimah cu Bawipa ka si kha in thei ding,” a ti,” tiah a sim.
14 Ahab in, “Ka do tikah zo in so a ho ding?” tiah a sut.
Profet in, “Ramòhen uktu bawi pawl hnuai ih ralkap mino pawl in ho hai seh, tiah Bawipa in a ti,” tiah a sim.
“Hmaisabik ih a nortu pawl cu zo in so a ho ding?” tiah Ahab in a sutsal.
Profet in, “Nangmah in na ho ding,” a ti.
15 Curuangah siangpahrang in ramòhen uktu bawi pawl hnuai ih ralkap mino pawl cu a ko òheh ih an zate in zahnih le sawmthum le pahnih an si. Cule Israel ralkap pawl a kokhawm ih an zate in thawngsarih an si.
16 An ral pawl cu sun laifangah an do; Benhadad le a òantu bawi sawmthum le pahnih pawl cu an riah hmunah zu an rak ri.
17 Ralkap mino pawl in hmai bik ah an nor. Benhadad ih thlahmi thlingthlatu pawl in, “Samaria ihsin ralkap burkhat an ra suak,” tiah an sim.
18 Cutikah Benhadad in, “Raldo dingih an rat khal asile, remnak tuah dingih an rat khal asile, a nung in kai hai uh,” tiah thu a pek.
19 Ralkap mino pawl cun an do hmaisa ih an dungin Israel ralkap burpi pawl in an thlun.
20 An domi an hmaiih an tonmi ral cu pakhat fingfing an that. Cutikah Siria ralkap pawl cu an tlan ih Israel ralkap pawl in an dawi vivo; amah Benhadad khal rang ralkap pawl in an kil ih rang to in a tlan suak.
21 Siangpahrang Ahab ho in rang tampi le rangleng tampi an lak ih Siria ralkap pawl cu nasa zet in an siatsuah.
22 Cule profet cu siangpahrang Ahab hnenah a feh ih, “Kir awla na ralkap pawl cu tam deuh le òha deuh in timtuah aw. Ziang hmuahhmuah ralring zet in tawlrel aw, ziangahtile hmai kum òhal ah Siria siangpahrang in a lo dosal ding a si,” tiah a ti.
Siria Pawl In An Dosal
23 Siangpahrang Benhadad cu a kuthnuai bawi pawl in, “Israel khawzing pawl cu tlangpar khawzing an si. Curuangah in neh. Sikhalsehla phairawn ih kan do hai a si ahcun kan neh tengteng ding.
24 Tuih òum ih in bawmtu bawi sawmthum le pahnih pawl hi ralkap an honak in hlon awla anmah ih ai ah raldo òhangtu ralbawi ret thluh aw.
25 Cule a lo tlansantu ralkap zat in ralkap a thar in la awla, rang le rangleng pawl khal a thar in la aw. Israel ralkap pawl cu phairawn ah kan do dingih tuih òum cu kan neh tengteng ding,” tiah an ti.
Siangpahrang Benhadad a lung a kim ih an ruahnak cu a thlun.
26 Òhal a hung suah tikah a ralkap pawl a kokhawm ih Israel do dingah Afek khua ah an feh.
27 Israel ralkap pawl khal an kokhawm aw ve ih ralthuam ih thuamaw aw in an feh ih Siria ralkap pawl ih riahhmun ralden hmun hnih ah an va riak. Thingkung le hrampi zat a simi Siria ralkap pawl lakah cun Israel ralkap pawl cu a malzet mi merual rual hnih an bang.
28 Profet cu siangpahrang Ahab hnenah a fehsal ih, “ Bawipa ih òongkam cu hitiin a si: Keimah hi tlangpar khawzing a si ih phairawn khawzing a si lo, tiah Siria pawl in, in ti. Curuangah ralkap hizat parah hin nehnak ka lo pe dingih nanmah le nan misenpi pawl in keimah cu Bawipa ka si kha in thei ding, a ti a si,” tiah a sim.
29 Siria ralkap pawl le Israel ralkap pawl cu an riahhmun fingfing ih ralden in ni sarih sung tiar cia òhepòhep in an um. A ni sarih ni ah an do aw ciammam ih Israel ralkap in Siria ralkap nikhat ah thawng zakhat an that.
30 A luatmi pawl cu Afek khua ah an tlan. Cun cutiih an tlan lai ah Afek khua kulhnak ralhruang a cim ih Siria ralkap thawng kul hluansarih a tlak that a si.
Benhadad khal khuapi sungah cun a lut ve ih inn pakhat ih dunglam khaan sungah a relh.
31 A kuthnuai bawi pawl a hnenah an feh ih, “Israel siangpahrang cu mi zangfah thiam an si, ti kan thei. Atu ah na lung a kim asile Israel siangpahrang hnenah kan tai ih buri puan òem in le kan lu ih hridai òemj Tai ih buri puan òem timi ih tican cu kan riah a sia ih kan siir aw tinak a si ih, lu ih hridai òem timi hi, na kut sungah ka pe aw tinak a si. in kan va feh hnik pei. Na nunnak tla a lo zuah thei men a si,” tiah an ti.
32 Curuangah an tai ah buri puan an òem ih an lu ah hridai an òem ih Ahab hnen ahcun an feh. “Na siahhlawh Benhadad in a nunnak zuah dingah a lo dil a si,” tiah siangpahrang Ahab an va ti.
Cutikah Ahab in, “A nunglai maw si? A òha! Ka unau vekih ka ruahmi si maw a si,” a rak ti.
33 Benhadad kuthnuai ih bawi pawl cun Ahab in ziangtin a ti pei tiih thinhar zet ih an um lai ah Ahab in, “Ka unau vek,” a hun ti cun hmakhat teah an thok ve ih, “Na tivek in Benhadad cu na unau a si ngai,” tiah an ti.
Cutikah Ahab in, “Ka hnenah rak hruai uh,” tiah thu a pek. Benhadad a ra thlen tikah amah ih hnenah rangleng parah a toter.
34 Cule Benhadad in, “Na pa hnen ihsin ka pa ih a rak lonmi khua pawl cu na hnenah ka lo khirhsal ding. Ka pa in Samaria khuasung ih dawrpi a rak tuah vekin nang khal Damaskas khuapi sungah dawrpi tuah ve aw,” tiah a ti.
Cule Ahab in, “Cuti a si ding taak ahcun ka lo thlah ding,” a ti ih, lungkimnak cakhen an tuah hnuah Benhadad cu a thlah.
35 Bawipa ih thupeknak in a buur ih a ummi profet lakah pakhat in a rualpi profet pakhat cu, “I thawi aw,” tiah a ti. Asinan cupa cun a el.
36 Curuangah a hnenah, “ Bawipa ih thupekmi na el ruangah na feh ve tein kiosa in a lo deh ding a si,” tiah a ti. A feh ih a feh ve tein kiosa in a thlun ih a deh ngaingai.Ref 20:36 2 Siang 13:24;
Profet In Ahab A Mawhthluk
37 Cule cuih profet cu midang pakhat hnenah a feh ih, “I thawi aw,” a ti. A ti vekin a thawi ih a tuahmawh.
38 Cuih profet in a hmai cu puan in a tuam ih midang vekah a tuah aw ih lamzin kiangah a ding. Israel siangpahrang cuih lamzin in ra lan ding a hngak.
39 Israel siangpahrang cu a ra lan ngaingai ih profet cun, “Maw siangpahrang bawipa, ral kan do lai ahkhan ral kaihmi pakhat ka hnenah ralkap pakhat in a hun hruai ih, “Hi pa hi kil òha aw. Na tlanter a si ahcun na nunnak in na kuan ding. Asilole tangka thawngthum na kuan ding,” i ti.
40 Ka kil òha ko nain, thil dangdang tuah phahnak ah ka buaituk ih cupa cu ka tlanter pang,” tiah ring zet in a hun ti.
Siangpahrang in, “Na thu cu nangmahte na relcat zo a si cu! Na sualman cu na kuan ding,” a ti.
41 Cutikah profet in a hmai tuamnak puan cu a phoih ih siangpahrang in profet a si, ti kha hmakhat teah a thei.
42 Cule profet in siangpahrang hnenah, “ Bawipa ih òongkam cu hitiin a si: “Thah ding ka timi na thlah ruangah na nunnak in na kuan dingih a ralkap pawl na luatter ruangah nangmah ih ralkap pawl an cem ding,” a ti a si,” tiah a sim.
43 Israel siangpahrang cu thinlung baang zet le riahsia zet in Samaria ah a kir.