18
Elijah Le Baal Profet Pawl
1 Tikcu a hung rei ih ruah sur lo kum, kum thumnak ah Bawipa in Elijah hnenah, “Va feh awla Siangpahrang Ahab va tong aw. Cule ruah ka surter ding,” tiah a ti.
2 Curuangah Elijah cu a feh.
Samaria ah paampi cu a luar ngaingai.
3 Curuangah Ahab in siangpahrang inn kiltu pawl hotu Obadiah a ko. Obadiah cu Bawipa zumtu òha zet a si ih,
4 Jezebel in Bawipa ih profet pawl a thah rero tikah Obadiah in profet zakhat tluk a hruai ih lungpuk sungah sawmnga, sawmnga in a thup ih an ei ding tidai le rawl tla a pek.
5 Ahab in Obadiah hnenah, “Kan feh pei ih cerh kap le tiva kap hmuahhmuah ah hrampi kan hawl pei. Hrampi kan hmu a si ahcun kan rang le kan laak pawl hi an nung men ding. Kan òilva pawl pakhat hman thah òul lo tla in kan tuah thei men ding,” tiah a ti.
6 An fehnak ding ram an zem aw ih hmun dangdang ah an feh.
7 Obadiah cu a feh rero lai ah rinlopi ah Elijah a tong. Elijah a si, ti a theithiam lohli ih, a hmaiah a kun ih, “Bawipa, nangmah maw na si?” tiah a ti.
8 Elijah in, “A si! Elijah ka si. Va feh awla siangpahrang na bawipa cu, “Elijah hinah a um” tiah va sim aw,” a ti.
9 Cutikah Obadiah in, “Ziang ka tuah ruangah so hibangtuk hnaòuan i fial? Siangpahrang Ahab in i that men ding a sisi!
10 A nungmi Bawipa na Pathian hmin saal in ka lo sim: Leilungtlun ramtin ah siangpahrang in a lo hawl ringring a si. Khui ram khalin na um lonak thu siangpahrang Ahab hnenih an rak sim tikah, na um lonak thu thungai a si, ti theinak an ram uktu cu thu a kamter a si.
11 Cule atu ah siangpahrang hnenah feh tahrat in hitawkih na um thu va sim aw tiah i fial.
12 Ka feh ve tein kan theih lonak hmunah Bawipa ih thlarau in lo phur hlo bangsehla ziangtinso kan ti ding? Hitawkih na um thu Ahab ka va sim ih anih ih a lo hmuhsal lo tikah kei cu i that ding a si. Na theih vekin keimah cu ka nauhak lai ihsin Bawipa biatu le òihzahtu ka si.
13 Jezebel in Bawipa ih profet pawl a thah rero tikah profet zakhat lungpuk sungah sawmnga, sawmnga in ka thuh ih an ei ding le an in ding ti le rawl khal ka pek ti na thei dah lo maw si?
14 Curuangah ziangtinso hitawkih na um thu kha siangpahrang sim ding i fial? I that ding a sisi!” tiah a ti.
15 Cutikah Elijah in, “Ka biakmi Ziangkimtithei Bawipa hmin in ka lo kam: Tuih sun ah siangpahrang ka tong ding a si,” tiah a ti.
16 Curuangah Obadiah cu Siangpahrang Ahab hnenah a va feh ih a va sim. Cule Ahab cu hmakhat teah Elijah tong dingah a suak.
17 Ahab in Elijah a hmuh tikah a hnenah, “Nangmah maw na si, nang Israel ram sungih mi hnaihnoktu bik pa!” tiah a ti.
18 Cutikah Elijah in, “Mi hnaihnoktu cu kei ka si lo. Nangmah na si sawn. Nangmah le na pa nan si. Bawipa ih thupekmi nan thlun duh lo ih Baal khawzing sawn nan biak.
19 Israel mi hmuahhmuah hnenah thu pe awla Karmel Tlang ah i ra tong hai seh. Siangpahrang bawinu Jezebel ih kilkhawi mi Baal profet zali le sawmnga le khawzingnu Asherah ih profet zali pawl khal ratpi hai aw,” tiah a ti.
20 Curuangah Ahab in Israel mi hmuahhmuah le Baal profet hmuahhmuah cu Karmel Tlang ah a kokhawm thluh.
21 Elijah cu misenpi hmaiah a ding ih, “Ziangtik tiang so nan thinlung òhen thei lo in nan um hrih ding? Bawipa cu Pathian a si ahcun bia uh; asinain Baal cu Pathian a si, nan ti ahcun bia uh,” tiah a ti. Asinan misenpi pawl cu zianghman an òong lo, an dai khepkhep.
22 Cutikah Elijah in, “ Bawipa ih profet cu keimah lawng ka tang zo. Asinan Baal profet cu zali le sawmnga an um lai a si.
23 Cawcang pahnih rak keng uh. Cawcang pakhat cu Baal profet pawl in la hai seh; that hai sehla a sa can tahrat in zanthing parah re hai seh. Sikhalsehla meisa cu muah hlah hai seh. Kei in cawcang pakhat cu vekin ka ti ve ding.
24 Cule Baal profet pawl cu an khawzing hnenah thlacam hai sehla kei khal ka Bawipa ih hnenah thla ka cam ve ding. Kan thlacamnak thei in meisa a run thla tutu cu Pathian ngaingai a si ding,” tiah a ti.
Misenpi pawl cu an lungkim in an au ciamco.
25 Cule Elijah in Baal profet pawl hnenah, “Nannih cu mi tampi nan si ruangah hmaisa ah cawcang pakhat la uhla timtuah uh. Nan khawzing hnenah thlacam uh. Asinan zanthing cu meisa in muah hrih hlah uh,” a ti.
26 A ti vekin annih in an rak kenmi cawcang pakhat cu an lak ih an thah, an timtuah ih Baal hnen ahcun sun tiang thla an cam. “Maw Baal, in run thei law,” tiah an au ciamco. Cule an dawlmi biakòheng kimvel ah an laam ciamco. Asinan a run let dah lo.
27 Ni a sun tikah Elijah in zokzet phahin, “Ring deuh in cam uh! Baal cu khawzing a sisi! Thudang a ruat lai tla a si ding. Asilole a eek a thawh lai a si ding. Khual tla rak tlawng sehla theih lo sokhaw! Asilole a it that lai a si dingih nan òhang tla a òul men ding!” tiah a ti.
28 Baal profet pawl cu ring deuhdeuh in thla an cam. Anmah ih daan a si vekin fei le nam in an sun aw ih an thisen a suak thluahthlo.
29 Sun hnu tiang an au an kiau, an hruum an raak; asinain zianghman thu a let lo. Ziang aw-aan hman a um lo. Thawmvang zianghman an thei lo.
30 Cutikah Elijah in misenpi hnenah, “I rak naih deuh uh,” a ti ih, an zate in a kimvel ah an ra; Bawipa hrangah rak dawlmi biakòheng a siat zomi kha a rem phah.
31 Jakob ih tesinfa miphun hleihnih pawl ai ah lungto hleihnih a lak. Jakob cu Bawipa in Israel tiah hmin a sakmi pa a si.Ref 18:31 Sem 32:28; 35:10;
32 Cuih lungto hleihnih in Bawipa biaknak ding biakòheng a dawl. Cule biakòheng kimvel ah tidai pung hnih tluk tlemmi khur a lai.
33 Biakòheng parah cun zanthing a peng ih cawcang cu a sahtan òheh hnuah zanthing parah cun a ret. Elijah in, “Ralca beel pali khat in tidai than uhla sa le zanthing hi toih uh,” tiah a fial. A ti vekin an tuah.
34 Anih in, “Toihsal uh,” a ti ih, an toihsal. “Toihsal hrih uh,” a ti ih an toihsal lala.
35 Biakòheng par ihsin tidai cu a liam ih, a kimvel ih a laihmi khur cu a khat òheh.
36 Sun hnu thawinak pek tikcu a si tikah profet Elijah cu biakòheng kiangah a feh ih, “Maw Bawipa, Abraham, Isaak le Jakob ih Pathian, nangmah cu Israel ih Pathian na si tinak atu ah run langter aw; keimah khal hi na siahhlawh ka si ih hi thil pawl hi nangmah ih thupeknak vekih ka tuahmi an si tinak khal run langter aw.
37 Maw Bawipa, i run let hram awla cuticun hi minung pawl in Bawipa nangmah cu Pathian taktak na si, ti an lo thei dingih na hnenah na hruai kirsal ding a si,” tiah thla a cam.
38 Cuve tein Bawipa in meisa a run thlak ih thawinak sa le zanthing le lungto pawl cu an kang òheh. Leilung khal a ur car òheh ih khur sungih tidai khal a kang òheh a si.
39 Cumi cu misenpi pawl in an hmuh tikah leilung ah an bok ih, “ Bawipa cu Pathian a si; Bawipa lawng Pathian a si,” tiah an au ciamco.
40 Cutikah Elijah in, “Baal profet pawl hi kai òheh uh. Pakhat hman luatter hlah uh!” tiah thu a pek. Baal profet pawl cu misenpi in an kai òheh ih Kishon Tiva ah Elijah in a hruai ih a that òheh.
Ruah A Sursal
41 Elijah in Siangpahrang Ahab hnenah, “Atu va feh awla rawl va ei aw. Ruah a rat thawm ka thei,” a ti.
42 Ahab rawl ei dingih a feh lai ah Elijah cu Karmel Tlang zim ah a hung kai ih a khuk le khuk karlak ah a lu retin leilung dai tiangin a kun.
43 Cule a hnenumpa hnenah, “Feh awla tifinriat lam vun zoh hnik,” tiah a ti.
A hnenumpa cu a feh ih a rakir ih, “Zianghman ka hmu lo,” a ra ti. Elijah cun a fialsal. Vei sarih tiang va zoh dingah a fial.
44 A vei sarihnak ahcun, “Mero fate kuttum tia tifinriat ihsin a ra ka hmu,” a ti.
Elijah in a hnenumpa cu, “Va feh awla Siangpahrang Ahab va sim aw: A rangleng to in ruah ih a kham hlanah a inn ah tlung seh,” tiah a ti.
45 Rei lo teah van ah khawdur a khat ih thli a hrang ih nasa zet in ruah a sur. Ahab cu a rangleng a to ih Jezreel ih kir dingin a pok.Ref 18:42-45 Jeim 5:18;
46 Bawipa ih huham cu Elijah parah a rung thleng ih a hnipuan pawl a tai ah fektein a ngerh ih Ahab ih hmai ahcun Jezreel khua kiangte tiang a tlan ciamco.