10
Siangpahrang Nu Sheba A Ra Tlawng
(2 San 9:1-12)
1 Sheba ram siangpahrang nu in Solomon hminthan zia a theih tikah hniksak dingah thusuhnak har zetzet thawn Jerusalem ah a feh.
2 Hnenum tampi thawn a feh ih, rimhmui pawl, lungmankhung pawl, le sui tampi phurtu dingah kalauk tampi a keng ih Jerusalem khuapi a thleng. An ton awk tikah Sheba siangpahrang nu cun a thinlung ih a suakmi pohpoh thu tampi a sut.
3 Solomon in a thusuhmi cu a let thei òheh. A leh thei lomi thu zianghman a um lo.
4 Solomon ih mangbangza fimnak cu Sheba siangpahrang nu in a thei ih, siangpahrang inn a sakmi khal a hmu.
5 Cabuai parih a rawl eimi, a kuthnuai bawi pawl ih umdan, a hnaòuantu pawl ih hrukmi hnipuan mawi zia, a hnenum pawl ih cangvaih daan le Biakinn ih thawinak a pekmi pawl, a zoh ih a hmuh tikah Sheba siangpahrang nu cu a thinlung a tong ngaingai. A hmuhmi hmuahhmuah in siangpahrang nu cu a mang a bangter tuk ih a lung hmuah a mit òheh.
6 Cule Siangpahrang Solomon hnenah, “Ka ram ihsin na thuhla le na fimnak thu pawl ka rak theihmi cu a dik a si.
7 Asinan hinah ra tahrat in ka mit rori ih ka hmuh hlanah cun ka zum thei dah lo. Ka theihmi cu atu ka mit ih ka hmuhmi ih hrek hman a rak si lo. Na fimnak le na lennak hi in rak simmi hnakin a nasa sawn a si.
8 Na nupi pawl an van a va òha ve! Na hnenah um in na fimnak òongkam a thei ringringtu na hnenum pawl hi van an va nei so!
9 Bawipa na Pathian cu thangòhat in um ko seh! Israel siangpahrang ih a lo tuah ruangah na parah a lung a awi ti cu a langter zo a si. Israel mi pawl a duhdawtnak cu kumkhua in a hmun ruangah dingthluk lairelnak le felnak thawn anmah uk dingah nangmah an siangpahrang ah a lo tuah zo a si,” tiah a ti.
10 Cule Sheba Siangpahrang nu in Solomon cu sui phurh zakhat le phurh kul hluannga lenglo le rimhmui le lungmankhung tam ngaingai a pek. Sheba Siangpahrang nu in a pekmi rimhmui cu Solomon in òumkhat ih a ngahmi laksawng hmuahhmuah lakah a tam bik a si.Ref 10:1-10 Mat 12:42; Luk 11:31;
11 Hi thilri pawl hmuahhmuah tlunah Ofir ram ihsin sui a rak phurtu Hiram ih lawng pawl in sandal thing le lungmankhung pawl tampi an rak phurh fawn.
12 Hi thing cu Solomon in Biakinn le siangpahrang inn kulhnak ah a hmang ih awnmawi tumtu pawl hrangih tingrisit le òingòang ah a tuah fawn. Israel ram sungih an phurhmi sandal thing hmuahhmuah lakah a òha bikmi thing a si. Cubangtuk thing òha cu an hmu dah nawn lo.
13 Sheba ram siangpahrang nu ih a dilmi hmuahhmuah cu Solomon in a pek òheh. Hi a pekmi cu siangpahrang pakhat in a dang siangpahrang hnenih an pek òheumi laksawng tlunah a si. Cuih hnuah Sheba siangpahrang nu cu a thluntu pawl thawn Sheba ram ah an tlung.
Solomon Ih Neih Zia
(2 San 9:13-29)
14 Siangpahrang Solomon in kumtin tein sui phurh zaruk le phurh kul hluannga a ngah ringring.
15 Himi cu sumtuahtu pawl hnen ihsin ngunkhuai a lakmi le pursumtu pawl hnen ihsin a miat a ngahmi le Arabia siangpahrang pawl le Israel ramòhen uktu bawi pawl hnenin ngunkhuai a lakmi ih tlunah a si.
16 Solomon in ralphaw tumpi zahnih a tuah ih ralphaw pakhat cu sui cuai nga thawn khuutmi a si.
17 Cuih tlunah ralphaw fate deuh pawl zathum a tuah ih ralphaw pakhat cu sui cuai khat le hrek thawn khuutmi a si. Hi ralphaw pawl cu Lebanon Tupi Khaan timi a inn khaan sungah a ret.
18 Siangpahrang tohkham tumpi pakhat vuiho le sui òha bik in a khuut.
19-20 Cuih siangpahrang tohkham parih hung kainak ah kailawn paruk a um ih kailawn pakhat ah kiosa lem pahnih fingfing an ret ih a zate in kiosa lem hleihnih a um. Siangpahrang tohkham dunglam ah cawcang lu lem a um ih, tohkham parih kut retnak pahnih kapah kiosa lem pahnih, khatlamah pakhat fingfing in an um. Hibangtuk tohkham cu zo siangpahrang hman in an nei dah keel lo.
21 Solomon ih hmanmi khuat hmuahhmuah cu sui ih tuahmi an si òheh. Lebanon Tupi Khaan sungih hmanmi beel le kheng pawl khal sui hlir ih tuahmi an si òheh. Ngun cu zianghman ah an hmang lo, ziangahtile Solomon san ahcun ngun cu man nei lo ah an ruahmi a si.
22 Solomon in tipi thuanthum fehmi tangphawlawng khal tampi a nei ih, Hiram ih lawng pawl thawn an feh tlang òheu. Kum thum ah vei khat a lawng pawl cu an ra tlung ih sui, ngun, vuiho, le zawng tumpi pawl le zawng dang pawl tla an rak phur òheu a si.
23 Siangpahrang Solomon cu siangpahrang dang hmuahhmuah hnakin a lian deuh ih a fim khal a fim deuh.
24 Pathian ih a pekmi fimnak theih duh le ngai duh ah leilungtlun khuazakip in mi tampi a hnenah an ra òheu.
25 Kum khat hnu kum khat a hnenih a rami pawl in laksawng an rak ken òheu ih an pekmi laksawng pawl cu, sui le ngun ih tuahmi thilri, korfual pawl, hriamnam pawl, rimhmui pawl, rang pawl le laak pawl tla an si.
26 Solomon in raldonak rangleng thawngkhat le zali a nei ih rang cu thawng hleihnih a nei. A hrek cu Jerusalem ah a re ih a hrek cu khua dang ah a ret.Ref 10:26 2 Siang 4:26;
27 Solomon in ram a uk sungah ngun cu Jerusalem ih lungto zat in a tam ih sidar thing cu Judah Phairawn ih theipi kung zat in a tam.Ref 10:27 Daan 17:17;
28 A rang pawl cu Izipt le Silisia ihsin leimi an si. A milai pawl ih a man an khiah zat in Silisia ihsin an lei òheu.Ref 10:28 Daan 17:16;
29 Izipt ram ah raldonak rangleng pakhat man cu ngun tangka zaruk a si ih rang pakhat man cu ngun tangka za le sawmnga a si. Solomon ih milai pawl in rang le raldonak rangleng pawl cu Hit siangpahrang le Siria siangpahrang hnenah an zuar sin òheu.