22
Joshua In An Ramah A Tlunter
1 Joshua in Reuben mi, Gad mi le Nisuahnak lam Manasseh mi a hrek pawl cu hmunkhat ah a ko ih an hnenah,
2 “ Bawipa ih siahhlawh Moses ih thupekmi hmuahhmuah cu nan thlun òheh ih keimah ih thupekmi tla a zate in nan thlun thluh.Ref 22:2 Mipum 32:20-32; Jos 1:12-15;
3 Tuih sun tiangah hin nan unau Israel mi pawl veikhat hman nan tlansan hrih lo. Tuih sun tiangah hin Bawipa nan Pathian ih thupekmi cu fel zet in nan thlun a si.
4 Atu ah an hnenih a rak tiam cia bangtukin nan unau Israel mi pawl hnenah Bawipa in colhnak a pek. Curuangah Bawipa ih siahhlawh Moses ih a lo pekmi nan ram, Jordan tiva ihsin nisuahnak lam ahcun va tlung thlang uh.
5 Cule Bawipa ih siahhlawh Moses in, “ Bawipa nan Pathian cu duhdaw uh; a lamzin in feh uhla a thukham thlun uh; Bawipa cu hngette in pom uh; nan thinlung le nan nunnak zate thawn a hnaòuan uh,” tiih thu a lo pekmi cu felfai zet in thlun suak tum uh,” tiah thu a cah.
6 Cule Joshua in thluasuah a pe ih an khua ah an tlung.
7 Manasseh hrin a hrek pawl cu Jordan tiva ihsin nisuahnak lam Bashan timi pengah Moses in leiram a pek; asinain a hrek cu hrindang pawl thawn hmunkhat ah Jordan tiva ihsin nitlaknak lamah leiram a pek. Reuben hrin, Gad hrin le Manasseh hrin a hrek pawl cu an khua ih an tlun tikah Joshua in,
8 “Atu nan khua ciar ah, sumsaw le òilva tampi, sui, ngun, dar, thir le hnipuan tampi thawn lian zet in nan tlung a si. Nan ral hnen ihsin nan lonmi hi thilri pawl cu nan unau Israel mi pawl thawn va zem aw uh,” tiah thu a cah.
9 Cutiin Reuben hrin, Gad hrin le Manasseh hrin a hrek pawl cu Jordan tiva nisuahnak lamah an khua ah an tlung. Kanaan ram Shiloh ih an riahnak ahcun Israel midang pawl cu an tanta ih Bawipa in Moses hnen ihsin thu a pek zomi vekin an comi anmah ih ram Gilead ahcun an feh.
Jordan Tiva Kap Ah Biakòheng
10 Kanaan ram, Jordan tiva kapih a ummi Geliloth an thlen tikah Reuben hrin, Gad hrin le Manasseh hrin a hrek pawl cun tiva kapah cun biakòheng tum zet pakhat cuang zet in an don.
11 Cutikah, “Ruat hnik uh, Reuben hrin, Gad hrin le Manasseh hrin ih a hrek pawl cun Jordan tiva khatlam kap, Kanaan ramri kiang, Geliloth ah biakòheng an don a si,” tiah mi in an rel ciamco.
12 Cumi cu Israel mipi in an theih tikah an zate in Shiloh ahcun an khawm aw ih Reuben hrin, Gad hrin le Manasseh hrin a hrek pawl cu do an tum.
13 Cutikah puithiam Eleazar ih fapa Finehas cu Israel mi in Gilead ram Reuben hrin, Gad hrin le Nisuahlam Manasseh hrin a hrek pawl hnenah an thlah.
14 Amah lawng si lo in Israel hrinkhat in pakhat ciar hotu pahra Finehas thawn an feh. Cuih palai pawl cu hrin khatih lu bik ciar an si.
15 Gilead ram ahcun an thleng ih Reuben mi, Gad mi le Nisuah lam Manasseh mi a hrek pawl hnenah,
16 “Zianghrangah hibangtuk thil òha lo cu Israel ih Pathian hmaiah nan tuah? Hi biakòheng nanmah hrangih nan don ruangah Bawipa nan dodal a si. Amah nan thlun nawn lo.Ref 22:16 Daan 12:6;
17 Peor ah Israel mi sualnak ruangih Bawipa in a minung pawl a hrem kha nan ciing lo maw si? A cuih sualnak ruangah atu tiangin kan tuar lai hrih a si. Cuhmuah cu a tawk thlang lo maw?Ref 22:17 Mipum 25:1-9;
18 Atu in maw Bawipa cu nan dungtun ding? Bawipa cu tuih sunih nan dodal a si ahcun thai sun ah Israel misenpi parah a thin a heng ding.
19 Cule nan ram hi a baal zo ih Bawipa ih biaknak hrangah a tlak nawn lo nan ti a si ahcun Bawipa ih ram a puanthlam umnak ah ra uh. Kanmah ih lakah covo ra la uh. Sikhalsehla Bawipa kan Pathian biakòheng siar lo biakòheng dang nanmah ih hrangah sak tahrat in Bawipa cu dodal hlah uh; kannih tla Bawipa dodaltu ah in canter hlah uh.
20 Siatsuah thluh ding tiih thupekmi Zerah fapa Akhan in a thlun duh lo ruangah Israel pumpi in hremnak kan tuar kha nan cing nawn lo maw si? Akhan sualnak ruangah hin amah lawng a thi a si lo,” tiah an ti.Ref 22:20 Jos 7:1-26;
21 Cutikah Reuben mi, Gad mi le Manasseh mi a hrek pawl in Israel miphun hotu pawl hnen ahcun,
22 “Ziangkimtithei Pathian! Amah cu Bawipa a si! Ziangkimtithei Pathian! Amah cu Bawipa a si! Hi thil kan tuahnak thu hi Bawipa amah in a thei; Israel mi khalin nan theih a òul a si. Bawipa kan dodal ih kan zuarthlai a si ahcun tuih sun ahhin in nunter hlah uh.
23 Bawipa ih thu thlun lo in kan hersan ih kanmah hrangih mei-ur thawinak, thlairawl thawinak le remnak thawinak dingah biakòheng kan don a si ahcun Bawipa amah rori in, in hrem seh.
24 Hitiih biakòheng kan donnak cu ziangruangah a si tile: Hmailam ah nan tefa pawl in, ‘Israel ih Pathian, Bawipa thawn ziang pehawknak so nan neih?
25 Reuben mi le Gad mi pawl, nannih le kannih karlak ih ramri si dingah Pathian in Jordan tivapi a tuah zo. Bawipa thawn nannih cu pehtlaihnak nan nei nawn lo,’ tiah kan tefa pawl hnenah an ti pang ding, ti kan phan ruangah a si. Cutiin ti ngaingai hai sehla nan tefa pawl in kan tefa pawl cu Pathian biak an kham a si lo ding maw?
26 Curuangah peknak le meisa-ur thawinak tuahnak hrangah si lo in,
27 Bawipa cu mei-ur thawinak, thawinak dang le remnak thawinak tla thawn a Puanthlam thianghlim hmaiah kan biak a si, ti kha nanmah le kanmah karlak ah siseh, nan tefa le kan tefa karlak khalah siseh, hminsinnak le thutheitu ah hi biakòheng cu kan don a si. Hitiih kan tuah asile nan tefa pawl in kan tefa pawl cu, “ Bawipa thawn zianghman pehtlaihnak nan nei lo,” tiah hmailam ah an ti thei lo ding.
28 Cutiih an ti hmanah kannih in, “Zoh uh, Bawipa ih biakòheng vek rori in kan pupa pawl in biakòheng pakhat an don ve a si. Thawinak hrang le mei-ur thawinak hrangah si lo in kan pahnih karlak ih hminsinnak thutheitu ah a si,” kan ti thei ding, tiah kan ruahnak a si.
29 Bawipa amah umnak Puanthlam hmaiih a ummi Bawipa kan Pathian ih biakòheng siar lo, mei-ur thawinak le thawinak dang le thlairawl thawinak hrangah a dang biakòheng pakhat don tahrat in Bawipa cu dodal kan tum hrimhrim lo. Amah thlun lo khalin um kan tum lo a si,” tiah an ti.
30 Cutiih an ti cu puithiam Finehas le a hnenih a telmi Israel phun hotu pawl in an theih tikah Reuben mi, Gad mi le Nisuah lam Manasseh mi a hrek tlunah cun an lung a awi ngaingai.
31 Cutikah Reuben mi, Gad mi le Manasseh mi hnenah puithiam Eleazar ih fapa Finehas cun, “ Bawipa nan dodal lo hrangah Bawipa cu kan hnenah a um a si, ti kan thei. Bawipa ih cawhkuannak tuar lo tein Israel mi pawl cu nan luatter a si,” tiah a ti.
32 Cule Finehas le Israel phun hotu pawl cu Gilead ram ih ummi Reuben mi le Gad mi hnen ihsin an kir ih Kanaan ram ih ummi Israel mi hnenah cuih thuhla cu an va sim.
33 An simmi thu an theih tikah Israel mi cu an lung a awi ngaingai. Pathian an thangòhat ih Reuben mi le Gad mi an umnak ram siatsuah dingih ral thawh ding thu cu an rel nawn lo.
34 Reuben mi le Gad mi pawl in an donmi biakòheng cu, “Theihpitu,” tiah an ko; ziangahtile “ Bawipa cu Pathian a si, ti kha kan zate hrangah theihpitu a si,” an ti.