17
Nitlak Lam Manasseh
1 Manasseh cu Josef ih fapa upa bik a si ruangah Jordan ihsin nitlaknak lam ram a hrekkhat cu Manasseh ih tefa pawl an pek. Cun Gilead ih pa Makhir cu Manasseh ih fapa upa bik a si ih ralkap hminthang a si. Curuangah Jordan ihsin nisuahnak lamih ummi Gilead le Bashan tla cu Makhir an pek.
2 Cun Manasseh ih tefa pawl Abiezer, Helek, Asriel, Shekhem, Hefer, le Shemida pawl tla ram an zem ve. Hi pawl cu Josef ih fapa Manasseh ih tefa pawl an si ih hrin khatih hotu ciar an si.
3 Asinan Manasseh ih fapa Makhir, Makhir ih fapa Gilead, Gilead ih fapa Hefer, Hefer ih fapa Zelofehad an si; cule Zelofehad in fapa pakhat hman a nei lo; fanu lawng a nei. A fanu pawl ih hmin tla cu: Mahlah, Noah, Hoglah, Milkah, le Tirzah an si.
4 Anmah tla cu puithiam Eleazar, Nun ih fapa Joshua le an hotu pawl hnenah an ra ih, “Kanmah siseh, kan sungkhat pawl siseh, bangrep ih ram co ve dingah Bawipa in Moses hnenah thu a pe a si lo maw?” tiah an ra ti. Curuangah Bawipa ih thupekmi bangtukin an pa ih unau pawl lakah an covo ram cu an ngahsal a si.Ref 17:4 Mipum 27:1-7;
5-6 Cutiih a fapa pawl vek thotho in Manasseh ih fanu pawl tla in ram covo an ngah ve ruangah Jordan tiva ralah Manasseh in Gilead le Bashan ih hlei ah a hleimi ram covo pahra a ngahsal a si. Gilead ram cu Manasseh fapa dang pawl hnenah an pek.
7 Manasseh ram cu Shekhem ih nisuahnak lamah Asher ihsin Mikmethath a thleng. An ramri cu Mikmethath ihsin thlanglam ah a vung ih Jashib Entappuah a thleng.
8 Tappuah ram cu Manasseh ta a si. Asinan ramri kapih a ummi Tappuah khua cu Efraim ih tefa pawl ta a si.
9 Cutawk ihsin an ramri cu Kanah tiva tiang a vung. Hi tiva ihsin thlanglam ih a ummi khuapi pawl cu Manasseh ih khuapi pawl lakah an um nain Efraim ih khuapi pawl an si. Manasseh ram ih ramri cu a cuih tiva ih saklam kap tluan in a si ih Mediterranean Tifinriat ah a netnak a si.
10 Efraim ram cu thlanglam ah a si ih Manasseh ram cu saklam ah a si. An ramhnih ih nitlaknak lam ramri cu Mediterranean Tifinriat a si. Saklam ah Asher tiang, nisuahnak lamah Issakhar tiang a kau.
11 Cun Issakhar le Asher ramsung hmanah Beth Shean le a kiangkap ih khua pawl, Ibleam ih a ummi pawl, (tipikap ih a ummi) Dor khua, Endor khua, Taanak khua, Megiddo khua le an kiangkap ciar ih a ummi khua pawl hmuahhmuah cu Manasseh ta an si.
12 Sikhalsehla Manasseh mi pawl in a cuih khua pawl ih a ummi Kanaan mi pawl cu an dawisuak thei lo ruangah tuih san tiangin an umta a si.
13 Israel mi pawl an cak deuh ngaingai tik hmanah Kanaan mi pawl cu an dawisuak lo; asinain Israel mi pawl cun anmah riantu ah an tuah hai.Ref 17:12, 13 Thuò 1:27, 28;
Efraim Le Nitlak Lam Manasseh In Ram An Dilsal
14 Josef ih tefa pawl in Joshua hnenah, “Ziang hrangah so kan co dingah ram òhenkhat lawnglawng in pek? Pathian in thluasuah vanluh in pek ih kan minung cun kan tam zet. Ram kau deuh kan òul a si,” tiah an ti.
15 Cutikah Joshua in, “Minung nan tam ih Efraim tlangpar ram nan hrangih a fiak tuk a si ahcun Periz ram le Refaim ram ah hung feh uhla an ram ih tupi pawl cu nan hrangah hung vaat uh,” tiah a ti.
16 Josef ih tefa pawl cun, “Atu kan umnak tlangpar ram cu kan hrangah a fiak tuk rori a si. Hmunrawnih a ummi Kanaan mi pawl cun thir rangleng tla an nei. Cuih tlunah Beth Shean le a kiangkap khuate sungih a ummi Kanaan mi pawl tla in an nei ve ih, Jezreel phairawn ih a ummi pawl khalin thir rangleng cu an nei thluh a si,” tiah an ti.
17 Cutikah Joshua in Efraim le Nitlak lam Manasseh hrin pawl hnen ahcun, “Minung nan tam zet ngai ih a cah khal nan cak zet a si. Curuangah covo pakhat hnakih tam deuh nan ngah ding.
18 Tlangpar ram cu nan ta a si pei. Tupi hlir asinain nan vaat pei ih khatlam kap ihsin khatlam kap tiang nan co pei. Kanaan mi pawl tla cu thir rangleng an neih ih an cah zet khalle nan dawisuak thotho ding,” tiah a ti.