16
Gaza Ah Samson
1 Samson cu Gaza ah a feh ih cutawkah hlawhhlang nu pakhat a hmu ih a hnenah a it.
2 Gaza khua mi pawl in an khua ih Samson a um kha an theih tikah an kulh ih zanvarte khuapi kulhnak kotka ihsin an bawh. Zanvar zianghman an tuah lo, an dai khepkhep. An thinlung tein, “Khawvang tiang kan bawh pei ih cutikah kan that leh pei,” tiah an ruat.
3 Asinan Samson cu zanòim tiang lawng a it. Cun a tho ih khuapi kulhnak kotka khar cu a òhuam pawl le a hrolh pawl le a thilri zate thawn a phawi ih a liang parih a suan hnuah tlangpar ram, Hebron khua ihsin ralden ih a ummi tlangpar tiang a phur ih cutawkah a tanta.
Samson Le Delilah
4 Cuih hnuah Samson cun Sorek Phairawn ih a ummi nunau pakhat, a hmin ah Delilahr Delilah tihi Hebru òong in miderdai asilole mithlem thiam tican a si. an timi a ngai.
5 Cutikah Filistin siangpahrang panga pawl Delilah hnenah an feh ih, “Na tlangvalpa hi rak leem aw; ziangtinso hi tluk lawmmam ih a cak tile, ziangtinso kan neh thei dingih kan kaih ih kan òem thei ding, ti pawl a theih rak zuam hnik aw. Na ti thei asile ngun tangka thawngkhat le zakhat ciar kan lo pe ding,” tiah an ti.
6 Curuangah Delilah in Samson hnen ahcun, “Ziangti in so hiti lawmmam ih na cah, i sim hnik aw he. Thuòhimnak ah midang in a khih le a kaih lo tum bang hai sehla ziangti talin an lo kai thei lo ding maw?” tiah a sut.
7 Cutikah Samson in, “A car hrih lomi thalhri thar pasarih in i khit hai sehla ka tha a cem thluh dingih midang vek thotho ka si ko ding,” tiah a ti.
8 Cule Filistin hotu pawl cun a car hrih lomi thalhri thar pasarih cu Delilah an pek ih cumicun Samson cu a òawn.
9 Inn khaan pakhat sungah mi a hrekkhat a ret ih Delilah in, “Samson, Filistin mi an ra!” tiah a au ciamco. Cutikah meisa urmi pat bangtukin thalhri pawl cu Samson in ol tein a botcat. Samson ih cahnak thuthup cu an thei lo.
10 Cutikah Delilah cun, “Ruat hnik, thuphan i sim ih capohnak men ah i hman hi! Atu cu òha tein i sim thlang aw, ziangtinso mi in an lo òemtar thei ding,” tiah Samson cu a sut.
11 Cule Samson cun, “Zohman ih hman dah hrih lomi hrihrual in, in òem a si ahcun ka tha a cem pei ih midang vek thotho ka si ko ding,” tiah a ti.
12 Curuangah Delilah in hrihrual tharte tampi in a lak ih Samson cu a òem hnuah, “Samson, Filistin mi an ra!” tiah a au. Mi a hrekkhat in khatlam khaan sung ihsin an rak bawh. Asinan Samson cun a kut an òemnak hrihrual cu pat phang khat vekin a botcat thluh thotho.
13 Cutikah Samson hnenah, “Capohnak men ah i hmang ih i bum thotho a si. I sim ko aw, ziangtinso an lo òem thei ding?” tiah Delilah in a sut.
Cule Samson in, “Ka samphiar phiar sarih hi thiam ah tak awla, thiamtleeng in hngette in khawncih awla, cule thiamtlang ah òem cih awla, ka tha a cem dingih midang vek thotho ka si ko ding,” tiah a ti.
14 Cule Delilah in Samson cu a thlim ih a ihthah lai ah a samphiar phiar sarih cu a lak ih thiam ah a tah; thiamtleeng in hngette in a khawncih, thiamtlang ah a òem cih ih, “Samson, Filistin mi an ra!” tiah a au. Samson cu a òhangih a òhuam pawl thawn a thiambu pi in a thawhpi luihlo mai.
15 Curuangah Delilah cun, “Na thinlung in i duh ngaingai lo nain ziangahso ka lo duh tiah i ti? Veithum tiang rori i hmuhsuam ih ziangruangah so hitiih na cah, ti hman i sim duh lo,” tiah Samson cu a ti.
16 Nikhat hnu ni khat, “I sim thlang aw he,” tiah Samson cu a ngiar ringring. Cutiin thlah lo ih a ningcerh tuk ruangah Samson cu a thin a pit ih thih hman a duh sawn thlang.
17 Cule a netnak ah a thuthup cu a phuan. “Ka sam hi meh dah lomi a si. Ka suah thlak ihsin Bawipa ih hnenah pekmi Nazir mi ka si. Ka sam hi met sisehla ka tha a cem thluh dingih midang vek ka si ko ding,” tiah a sim.
18 Cutikah thuhman i sim zo a si, ti kha Delilah in a thei. Filistin hotu pawl hnenah thu a cah ih, “Atu vei khat te cu ra hrih uh. A thuthup i sim zo a si,” tiah a ti. An ra ih tangka khal cu an rak keng.
19 Delilah in Samson cu a cawn parah a thlim, a ihthatter ih mi pakhat a kawh ih Samson ih samphiar phiar sarih cu a hleptan thluh. Cule Delilah in neh hram a thok. Samson ih thazang cu a cem ih a cahnak hmuahhmuah a hlo òheh.
20 Cutikah Delilah in, “Samson, Filistin mi pawl an ra!” tiah a au. Samson cu a òhang ih, “A hlan vek thotho in ka tho dingih ka luat ko ding,” tiah a ruat. Bawipa in a fehsan zo kha a thei lo.
21 Filistin mi pawl in an kai ih a mit an phorh ih Gaza ah an vun hruai. Cutawk ahcun dar ih tuahmi hreng an sut. Thawng sungah sangvut an rialter.
22 Asinan a sam cu a cerh vivosal.
Samson A Thi
23 Lungawi ih aih ding le an khawzing Dagon hnenih thawinak nasa zet pek dingah Filistin siangpahrang pawl cu hmunkhat ah an khawm aw ih,
“Kan khawzing in kan ral Samson,
kan kut sungah a thlenter zo,”
tiah hla an sak.
24 Misenpi in Samson an hmuh tikah an khawzing Dagon an thangòhat ih,
“Samson in kan ram cu kan ruak in
a khahter,
Kan khawzing in kan ral cu
kan kut sungah a thlenter,” tiah
hla an sak ciamco.
25 Misenpi cu an nuam zet ih, “Samson ko uh, hnihsuah capoh sainak ah kan hmang pei,” tiah an ti. Thawnginn ihsin Samson cu an rak hruai ih hnihsuah capoh sainak ah an hmang. Cule òhuam le òhuam karlak ah an dinter.
26 A kut kai tahrat in a rak hruaitu nauhakpa hnenah Samson in, “Hi inn òhuam pawl i thamter hnik aw, a hngauhsan ka duh,” tiah a ti.
27 Cuih inn sungah nunau le mipa a khat in an um. Filistin siangpahrang panga pawl khal an um ih hnihsuahnak ih an hman reromi Samson zoh duh ah minung thawngthum tlunta don ah an um.
28 Cutikah Samson cu thla a cam ih, “Maw Cungnungbik Bawipa, i run thei hram aw. Maw Pathian, nangmah ih zangfahnak in tuihòum òum khatte hi cu thacahnak i run pe hrih hram awla ka mit pahnih an phorh man ah an tlunih phu ka lak theinak dingin i zangfah hram aw,” tiah Pathian hnenah a dil.
29 Samson cun inn dotu sutpi pahnih cu a pom ih kut khat in sutpi pakhat veve a kaih ih a nawp aw ih,
30 “Filistin mi pawl thawn thi tlang ko ning law,” tiah au phahin sutpi pahnih cu a tha neih tawp in a tuul ciamco ih innpi cu misenpi le siangpahrang pawl parah cun a vung cim luailo. Samson in cutawk ih a thahmi minung pawl cu a nun sungih a thahmi hmuahhmuah hnakin an tam sawn.
31 A unau pawl le a sungkhat pawl in a ruak cu an vung lak. A ruak cu an tlunpi ih Zorah le Eshtaol karlak a pa Manoah ih thlan ah an phum. Samson in kum kul sung Israel hotu a òuan.