HABAKKUK
Thuhmaihruai
Profet Habakkuk in hi thu hi kum BC 600 cemnak lamih a simmi a si ih Babilon pawl an cah laifang caan a si. Babilon an nuncan an ziaza a òha lo tuk lawmmam ih cumi cun a thinlung a natter tuk ih Bawipa hnenah, “Anmah hnakih fel sawnsawn milai an siatsuah rero ih ziangtinso nang dai tein na um?” tiah thu a sut (1:13). Cutikah Pathian in, “Amah a tikcu a thlen tikah ka ti leh ding. A ding le a fel pawl cu Pathian an rinsannak thawngin an nung ding,” (2:4) tiah a ti.
A ding lomi harsat an tuarnak ding simsungnak le Pathian ih ropitnak thu le hi cabu ngantu in Pathian a rinsannak thu pawl cu hih cabu a netnak lamah kan hmu thei.
1
1 Profet Habakkuk hnenah Bawipa ih thu a ra thlengmi cu hitiin a si.
Habakkuk A Phunzai
2 Maw Bawipa, bomnak dil in ka aunak hi ziangtikah so i theih sak ding? Tisiatnak sungin in runsuak hlanah hin vei ziangzatso ka lo kawh ding?
3 Ziangahso hibangtuk harsatnak cu i tonter? Ziangtinso hitluk thil òha lo an tuahmi hi na zoh thei cuahco lai? Siatsuahnak le tisualnak hlir ka kiangkap ah an khat ih thawiawknak le tawhawknak lawnglawng khuazakip ah a um.
4 Daan timi hi hmual a nei lo ih òhathnemnak khal a nei lo. Thildik timi cu tuahsuak a si dah lo. Miòha lo pawl in miòha pawl ih lu parah an kai; cuticun thufel timi cu anmah ih duhduh in an her thei a si.
5 Cule Bawipa in a minung pawl ih hnenah, “Nan kiangkap ih miphun pawl hi zoh òha uh; nan hmuh tikah cun nan mang a bang zet ding. Thil pakhat ka tuah dingih nan theih tikah nan zum lo ding.Ref 1.5 Tirh 13:41;
6 Mi puar le mi tokhrok pawl Babilon mi pawl kha thuneitu ah ka tuah ding. Anmah cu ramdang neh dingin leilung pumpi ah an feh.Ref 1.6 2 Siang 24:2;
7 Khuazakip ah thinphannak le tuksumza hlir an khahter. An hngal tuk ah anmah ih thu lawng daan ah an neih a si.
8 “An rang pawl cu tlavang hnakin an zamrang sawn; rilrawng cinghnia cang hnakin òih an nung sawn. An rang ralkap pawl cu an rang to in ram hlapi ihsin an ra. An rang cu leilung an huat phahphah. Khaupi in an sadehmi an zon bangin ral cu an zon a si.
9 “An ralkap pawl in ram an nor vivo; a kham theitu zohman an um lo. An thlen ding thawmvang an theih cun zozo khal òihnak in an khat. Ral an kaihmi cu vunnel zat in an tam.
10 Siangpahrang pawl an nautat ih bawi upa pawl an hnihsan. Ziangvek ralhruang hman in a kham thei lo. A leng ihsin lei an dawl ih an lak thei thotho.
11 Cule thli bangin an hrang ih an hlota. An cahnak kha khawzing tluk ah an ruat!” tiah a ti.
Habakkuk A Phunzaisal
12 Maw Bawipa, a hramthok ihsin nang cu Pathian na si. Nang cu ka Pathian na si, a thianghlimmi le kumkhua in a hmunmi na si. Maw Bawipa, ka Pathian le ka Lungpi, nangmah in Babilon mi pawl cu na hril zo ih kanmah hrem theitu tiangin na cakter.
13 Sikhalsehla ziangtinso hitluk miòha lo le mi huaisen pawl hi na zawi thei? Thil òha lo zohnak ah na mit cu an thianghlim tuk ih sualnak a tuahtu pawl cu na hmu thei òheu lo a si. Ziangahso anmah hnakih miding pawl an siatsuah rero nain daiziar ih na um san men?
14 Ziangtinso minung cu uktu le hotu nei lo nga vek le cucik kharbok vek tluk ah na tuah?
15 Babilon mi pawl in midang cu nga vekin sio in an sio. Sur in an awk, an dirhsuak ih an kaihmi ruangah lungawi in an au ciamco.
16 An sur in thil òha bik an ngah thei ruangah an sur hnenah raithawinak an pek ih an biak a si.
17 Kumkhua in maw an ralnam hmang tahrat in miphun pawl cu zangfahnak nei lo in an siatsuah rero ko ding?