43
Izipt Ram Ah Benjamin An Fehpi
1 Kanaan ram ah paam cu a luar sinsin ih,
2 Jakob ih sungte pawl cu Izipt ram ihsin an leimi rawl an ei òheh tikah Jakob in a fapa pawl hnenah, “Vung fehsal uhla kan hrangah rawl vung leisal uh,” tiah a ti.
3 Cutikah Judah in, “Nan naupa nan ratpi lo ahcun ka hmel hman in hmu thei lo ding, tiah Izipt ram ih bawipa in fiang tein ralrinnak in pe zo.
4 Kan naupa kan hnenih na fehter a si ahcun kan feh dingih na hrangah rawl kan lei ding.
5 Na fehter siang lo a si ahcun kan feh lo ding. Ziangahtile cupa cun nan naupa nan rak hruai lo a si ahcun in tong thei lo ding, tiah in ti zo,” tiah a ti.
6 Cutikah an pa Israel in, “Ziangtinso ka zawn maltetal ruat lo in nau pakhat kan nei hrih ti tiangtiang cupa ih hnenah nan va sim?” tiah a ti.
7 Cule a fapa pawl in, “Nan pa a nunglai maw? Unau dang nan nei maw? tiah kanmah le kan innsang thuhla lawnglawng cupa cun in sut ih, let lo in kan um thei fawn lo. Nan naupa nan rak hruai pei tiah in ti ding ti cu kan rak ruat hrimhrim lo,” tiah an ti.
8 Cun Judah in a pa ih hnenah, “Kan naupa cu keimah hnenah fehter aw. Kan tim kan tuah pei ih kan feh ding. Cutiih kan tuah lawngah nangmah siseh, kan faate pawl le kanmah siseh, kan zate in rilrawng thihnak in kan luat thei ding a si.
9 Kan naupa hrangah ka nunnak in ka kam a si; mawhphurh ding a um khalle keimah in ka phur ko pei. Na hnenah damte le himte ih ka kirpi lo a si ahcun ka nunsung hmuahhmuah na hmaiah mawhthluk ka tuar pei.
10 Hitiin rei hlah uhsila Izipt ram ah feh in vei hnih hman kan let man zo ding nain,” tiah a ti.
11 Cutikah an pa in, “Cuti ding thotho a si ahcun hitiin tuah uh: Kan ramsung ihsin a suakmi lakih a òha bik pawl thingthling, khuaitizu, rimhmui, khumkhal le mekei rah maltete ciar keng uhla cupa cu laksawng vung pe uh.
12 Nan dip sungih paisa nan hmuhsalmi pawl tla cu nan khirh a òul ding hrangah paisa khal a let hnih in nan keng pei. Paisa an lo khirh cu an tisual a si ding.
13 Nan timtuah in nan naupa cu hruai uhla cupa ih hnen ahcun fehpi uh.
14 Nan unau pakhat pa le Benjamin cu nan hnenih an rakirsal theinak dingah Ziangkimtithei Pathian in cupa cu nan parah zangfahnak thinlung neiter hram seh. Kei cu ka faate pawl hloral thluh ding hi ka tuar ding hrimhrim a si ahcun ka tuar a si ko pei cu,” tiah a ti.
15 Cuhrangah laksawng pawl an keng ih paisa khal a let hnih in an pai. An tim an tuah ih Izipt ram ahcun an feh. Benjamin khal an hruai ih Josef cu an va tong.
16 An hnenih Benjamin a tel cu Josef in a hmuh tikah a hnenumpa hnenah, “Hi pawl hi ka inn sungah hruai hai aw; òilva pakhat that awla suang aw; ziangahtile tuih sun ah keimah thawn rawl kan ei tlang ding,” tiah a ti.
17 Josef ih a sim vekin a hnenumpa in a tuah ih a inn sungah a fehpi hai.
18 Josef inn an thlen tikah an thin a phang ngaingai. Ziangahtile, “Hmaisa rawl kan lei òum ih kan paisa pawl kan dip sungih a um hrangah hitawkah in thlenpi. Kan sual hawl in rin lopi in sal ah in kai men ding. Kan laak pawl tla in long thluh ding a si hi,” tiah an ruat.
19 Curuangah Josef hnenumpa hnenah sangka kiangah an va feh ih,
20 “Bawipa, rawl lei dingah hitawkah veikhat kan ra thleng zo.
21 Kan tlung ih lamzin kan riahnak ah kan dip sung kan zoh tikah rawl leinak man paisa kan pekmi kim tein kan dip sung tlunta bik ah kan hmu fingfing. Cuih paisa cu atu ah kan rak keng.
22 Cule rawl leisalnak ah paisa dang tla kan keng a si. Kan dip sungah zo in maw paisa a rak ret ti cu kan thei lo,” tiah an ti.
23 Cutikah Josef hnenumpa cun, “Òih hlah uh, nan thin khal phang hlah uh. Nan Pathian le nan pa ih Pathian in paisa cu nan dip sungah a ret a si ding. Rawl man paisa kim tein ka ngah ko,” tiah a ti. Cuih hnuah an hnenah Simeon a rak hruai.
24 Cule hnenumpa in an unau rual in Josef inn sungah a fehpi hai ih an ke kholhnak ah tidai a pe ih an laak khal rawl a pek.
25 Sun ah Josef a ra dingih anmah thawn rawl a ra ei ding ti an theih tikah an kenmi laksawng pawl an suah ih Josef pek dingah tiar cia in an ret.
26 Josef a ra thleng ngaingai ih laksawng an kenmi pawl cu a inn sungah cun an pe ih a hmaiah leilung dai in an kun.
27 Cule Josef in an thuhla cu kim teih a sut òheh hnuah, “Kan dung nan rat lai ah a tar zet nan timi nan pa ih thuhla in sim. Atu ziangtin a um? A harh dam lai maw?” tiah a sut hai.
28 Cutikah annih in, “Kan pa, na siahhlawh, cu a dam lai a si,” tiah an ti hnuah an khuk an bil ih a hmaiah an kun.
29 Cule Josef in a nau Benjamin a hmuh tikah, “A thuhla in sim reromi nan nauta bik pa cu amah hi maw a si?” a ti ih, “Pathian in thluasuah lo pe seh, ka fapa!” tiah a ti.
30 Cuti a ti hnuah Josef cu hmakhat teah a khaan sungah a lut, ziangahtile a nau a hmuhsal tikah a lung a hno. A sup awk thei lo ruangah a khaan sungah cun a feh ih a òap ciamco.
31 A hmai a phiah awk hnuah a ra suak ih a lunghnomi sup aw phahin, “Rawl tuah uh,” tiah a hnenum pawl thu a pek.
32 Josef cu cabuai pakhat ah rawl an tuah sak; a unau pawl a dang cabuai ah rawl an pe ih Josef hnen rawl ei dingih a rami Izipt bawi upa pawl cu cabuai dang teah rawl an ei. Ziangah Izipt mi pawl a dang teah an ei tile Hebru mi pawl thawn rawl ei tlang cu ningzakza a si, tiin an ruat.
33 A unau pawl cu Josef hmai hoi in an toter hai ih an kum vekin upa bik in nauta bik tiang a sangsang in an to. Cuti an to cu an hmuh tikah mangbang in pakhat le pakhat an zoh aw.
34 Josef cabuai ih a ummi rawl pawl an lak ih a unau pawl cu an bet, asinain Benjamin cu a unau pakhat ih comi let nga tam in rawl an pek. Cuticun an ei an in ih nuam zet in caan an hmang.