38
Mei-ur Thawinak Hrang Biakòheng
(Suah 27:1-8)
1 Bezalel in mei-ur thawinak hrangah biakòheng cu lawithing in a don. A tung le a vang dong nga veve an si. A saanlam cu dong thum a si.
2 A parih bunmi thingzum cu akil kil li ah a bun ih biakòheng thawn an peh aw òheh. A zate in dar in a tuam.
3 Cuih biakòheng hrangih thilri pawl: Khengkhuar, cawhlek, kheng, thil awhnak le beel pawl tla cu dar in a tuah òheh.
4 Khohriik vekin darpheng a tuah ih biakòheng a saanlam ih hrek a thlennak dingah a cuih darpheng cu biakòheng ih zim hnuai ah a ret.
5 Biakòheng putnak hrangah darkual pali a tuah ih zawnfung pawl hrolhnak ah a cuih darkual pawl cu darpheng ih kiil li ah a bun.
6 Zawnfung pawl cu lawithing in a tuah ih dar in a tuam.
7 Cule biakòheng putnak ah a siir pahnih ih a ummi darkual ahcun zawnfung pawl cu a hrolh. Biakòheng cu thingpheng in a tuah ih a sung a kuatter.
Kut Kholhnak Kheng
(Suah 30:18)
8 Bawipa ih umnak Puanthlam sung luhnak kotka ih hna a òuantu nunau pawl ih neihmi dar thlalang pawl ihsin kut kholhnak darkheng le dar tawdam pawl a tuah.Ref 38:8 Suah 30:18;
Bawipa Ih Umnak Puanthlam Kulhnak A Tuah
(Suah 27:9-19)
9 Puanthlam kulhnak a tuah tikah thlanglam kap kulhnak cu kaih sawmnga a saumi puan mankhung, a phiarih phiarmi in a tuah.
10 Òhuam kul le a tawdam kul pawl cu dar in a tuah ih òhuamtlang pawl le òhuamtlang khihnak kual pawl cu ngun in a tuah.
11 Saklam kapih kulhnak khal cu kaih sawmnga a saumi puanzar in a tuah ih puanzar thlainak òhuam kul le a tawdam kul cu dar in a tuah; cule òhuamtlang le òhuamtlang kaihnak kual pawl cu ngun in a tuah.
12 Nitlaknak lam kulhnakah kaih kul hluannga a sau mi puanzar a hmang ih puanzar thlainak ah òhuam pahra le a tawdam pahra a tuah; òhuamtlang le òhuamtlang kaihnak kual pawl cu ngun in a tuah.
13 Nisuahnak lamah luhnak kotka a um ih kulhnak puanzar a hmanmi cu kaih kul hluannga thotho a sau.
14 Luhnak kotka ihsin khatlam kapih puanzar cu kaih sarih le a hrek a kau ih òhuam pathum le tawdam pathum an um.
15 Kotka ihsin khatlam kap khal cuvek thotho in a tuah; cuhrangah a kulhnak kotka ihsin vorhlam le kehlamah puanzar kaih sarih le a hrek veve a kau ih, òhuam pathum le tawdam pathum veve a tuah a si.
16 Puanthlam kulhnak hrangih hmanmi puanzar hmuahhmuah cu a phiarih phiarmi puan mankhung hlir in a tuah.
17 Òhuam tawdam pawl cu dar in a tuah ih òhuam parih a ummi òhuamtlang kaihnak kual pawl le òhuamtlang pawl le òhuam lu tuamnak pawl cu ngun in a tuah. A kulhnak hrangih hmanmi òhuam hmuahhmuah cu ngunih tuahmi òhuamtlang in a kai òheh.
18 A kulhnak kotka ih puanzar pawl cu coihcinmawi ih òelhmi a si ih mepian, sendup le a senmi tuuhmul le puan mankhung, a phiarih phiarmi in a tuah. Cuih puanzar cu a kulhnak hrangih hmanmi puanzar dang vek thotho in, kaih hra a sau ih kaih hnih le a hrek a hlai.
19 Hi puanzar cu darih tuahmi tawdam pali ih bunmi òhuam pali ah a thlaih. Òhuamtlang kaihnak kual, òhuam luzim khuhnak le òhuamtlang pawl cu ngun in a tuah.
20 Puanthlam hrangah siseh, a kulhnak hrangah siseh, puanzar awhnak kual hmuahhmuah cu dar in a tuah òheh a si.
Bawipa Ih Puanthlam Ih Hmanmi Thilri
21 Thukham ngannak lungpheng pahnih an retnak Puanthlam sungih an hmanmi thilri pawl cu cazin an tuah ih a hnuailam bangtuk a si. Cuih cazin tuah ding cu Moses in a fial ih puithiam Aaron ih fapa Ithamar kuthnuai ih hnaòuantu Levi mi pawl in an tuah.
22 Judah miphun Hur ih tupa Bezalel, Uri ih fapa cun Moses hnenih Bawipa ih thupek vekin thil hmuahhmuah cu a tuah òheh.
23 Bezalel bawmtu, Dan miphun Ahisamak ih fapa Oholiab cu lungkher lamih zungthiam, pungsan suai thiam le mepian, sendup, a senmi tuuhmul le puan òha mankhung pawl tahthiamtu a si.
24 Hmun thianghlim hrangih a cemmi sui hmuahhmuah, Bawipa ih hnenah an pekmi sui cu biakinn cuai thlainak ih thlai tikah pawng thawnghnih za le sawmkua le pawngnga a rit.
25 Israel mi pawl in mipum siar caan ih an pekmi ngun hmuahhmuah cu biakinn cuai thlainak ih thlai tikah pawng thawngsarih zanga le sawmnga a rit.
26 Himi cu Israel pawl in mipum ih an siarmi mi pakhat in, mah ih pek ding zat ciar an pekmi komkhawm in biakinn cuai khainakih an khaimi zat a si. Mipum siar tikah kum kul le a tlunlam cu an zate in minung thawngzaruk thawngthum zanga le sawmnga an si.Ref 38:25-26 Suah 30:11-16; Mat 17:24;
27 Ngun an pekmi zate sung ihsin hmunthiang hrangah siseh, puanzar hrangah siseh, òhuam tawdam an tuahmi hmuahhmuah hrangah pawng thawngsarih le zanga an hmang. Pawng thawngsarih le zanga cu tawdam zakhat hrang a si ruangah ngun pawng sawmsarih le pawngnga cu tawdam pakhat hrangah an hmang a si.
28 A tanglaimi ngun pawng sawmnga thawn òhuam hrangih ngunkual, òhuam luzim tuamnak le òhuamtlang pawl a tuah a si.
29 Bawipa ih hnenah an pekmi dar cu a zate in pawng thawngnga zathum le pawnghra a rit.
30 Cuih dar cun Puanthlam sungih luhnak kotka òhuam pawl ih tawdam pawl, biakòheng le khohriik vekih tuahmi darpheng le biakòheng hrangih thilri hmuahhmuah an tuah.
31 Cuih tlunah Puanthlam kulhnak òhuam ih tawdam, kotka òhuam ih tawdam le Puanthlam hrangah siseh, a kulhnak hrangah siseh, puan awhnak kual hmuahhmuah cu hi dar in an tuah a si.