12
Lantak Puai
1 Izipt ram thotho ah Bawipa in Moses le Aaron hnen ahcun,
2 “Tuih thla hi nan hrangah kum khat sungih thla hmaisabik a si.
3 Cuhrangah Israel miburpi hnenah: Tuih thla a ni hranak ah mipa hmuahhmuah in an innsang hrang ciar ah, innsang pakhat ah tuu note asilole me note pakhat ciar hril hai seh.
4 Innsang pakhat in an òilva thahmi an ei thluh thei lo ding asile an minung zat zoh in an innhnen te thawn òilva pakhat òawm aw hai seh. Minung ziangzat an um ti le ziangzat ciar an ei thei ding ti zoh in tuah hai seh.
5 A òilva cu a him raitluan a si pei ih, a pa kum khat ti a si pei. Tuu asilole me an hril pei.
6 A cuih thla ni hleili ni tiang an ret pei ih a ni hleili zanlam ah Israel mi zate in òilva cu an that pei.
7 Cun a thisen hrekkhat cu an lak pei ih, a cuih sa an einak ding inn sangka tunrel le sangka tlunah an hnih pei.
8 Zan ah a cuih sa cu meisa ah an em pei ih thilnu tel lo sang le anfangkha thawn an ei pei.
9 A hel in nan ei lo pei. A suan khalin nan ei lo pei. A pum in a lu le a ke le a sungril thawn nan em pei ih cutiin ei ding a si.
10 A sa malte hman zinglam tiang nan hlah lo pei. Nan hlahmi a um pang le meisa ah nan urral pei.
11 Nan ei ding daan cu hitiin a si pei: Nan hnipuan nan tai ah nan òem pei, nan kedam nan hruk pei ih nan kianghrol nan kai fekfek pei ih zamrang tein nan ei pei. Ziangahtile Bawipa ih Lantak puai a si.
12 Cuih zan ah Izipt ram pumpi sungah ka feh dingih minung siseh, òilva siseh, an fatir cu ka that òheh ding. Keimah cu Bawipa ka si ih Izipt ram ih an khawzing hmuahhmuah tlunah thu ka òhen ding.
13 Sangka ih thisen hnihmi cu nan umnak inn a si, ti hminsinnak a si ding. Thisen ka hmuh tikah ka lo lanta ding. Izipt ram ka hrem tikah nannih cu siatsuahnak nan tong lo ding.Ref 12:1-13 Suah 23:5; Mipum 9:1-5; 28:16; Daan 16:1,2;
14 Cuih ni cu nan hrangah nan ciin ringring dingmi ni a si dingih, Bawipa ih hnenah biaknak puai tiah nan tuah ringring pei. Sankhat hnu sankhat, kumkhua cat lo in puai ni a si tiah nan tuah ringring pei,” tiah a ti.
Thilnu Tel Lo Sang Puai
15 Bawipa in, “Ni sarih sung thilnu tel lomi sang nan ei pei. Nikhat ni ah nan inn ihsin thilnu hmuahhmuah cu nan hlon thluh pei; ziangahtile mi pakhatkhat in nikhat ni in ni sarih ni tiang thilnu telmi sang a ei ahcun Israel miphun sungin nan suah pei.
16 Nikhat ni le ni sarih ni ah biakkhawmnak nan tuah pei. Hi ni hnih sungah ziang hna hman òuan ding a si lo. Senpi hrangah rawl lawngte nan suang thei.
17 Hi thilnu tel lo puai hi òha tein nan ul pei, ziangahtile a hi ni ah Izipt ram ihsin nan zate in ka lo hruaisuak a si. Sankhat hnu sankhat hi ni cu a kumkhua in puai ni ah nan hmang pei.
18 Thla hmaisabik ih ni hleili ni zanlam in ni kul hluankhat ni zanlam tiang thilnu tel lo sang nan ei pei.
19 Ni sarih sung cu nan innsung pohpoh ah thilnu nan ret lo pei; ziangahtile mi pakhatkhat, ramdangmi siseh, nan phunpi siseh, thilnu rawimi a ei a si ahcun Israel miphun sung ihsin dawi a si ding.
20 Thilnu telmi nan ei hrimhrim lo pei. Nan innsung pohpoh ah thilnu tel lo sang lawnglawng nan ei pei, tiin thu than aw,”Ref 12:14-20 Suah 23:15; 34:18; Suah 23:6-8; Mipum 28:17-25; Daan 16:3-8; tiah a ti.
A Hmaisabik Lantak Puai
21 Cutikah Moses in Israel hruaitu upa pawl a ko ih an hnenah, “Feh uhla nan innsang hrangah tuu note asilole me note va hril uhla Lantak aihnak puai hrangah that uh.
22 Cun hissopk 12:22 hissop: timi hi pi hnih le hrek hrawng a saangmi zanthing fate a si ih a òek zimah a par a rang, a bormi a um. thingòek pakhat in la uhla kheng sungih a ummi thisen sungah hnim in sangka tunrel le sangka tlunlam tlang ah hnih uh. A thaizing khua a van hlan lo zohman nan inn ihsin nan suak lo pei.
23 Izipt mi pawl that dingah Izipt ram sungih Bawipa a feh tikah nan sangka tunrel le a tlunlam tlang ih thisen hnihmi a hmu pei ih siatsuahtu vanmi cu mi that dingah nan innsung ah a lutter lo ding.Ref 12:23 Heb 11:28;
24 Cuih tlunah hi daan pawl cu nanmah le nan tesinfa pawl hrangah kumkhua hrangih daan a si ih nan thlun tengteng ding.
25 Bawipa ih a lo kam cia bangtukin a lo pek dingmi ram ih nan thlen tik khalah hi daan hi nan thlun pei.
26 Nan faate pawl in, “Hitiih kan hman daan hi ziang tican so a si?” tiah an lo sut asile,
27 nannih in, “ Bawipa ih hnenah pekmi Lantak thawinak a si; ziangahtile Izipt mi pawl a thah hai tikah Israel mi pawl ih inn tla cu a lanta ih kan inn cu a zuah a si,” nan ti pei,” tiah a ti.
Cutikah Israel mi pawl cun an khuk an bil ih an biak.
28 Israel mi pawl cu an feh ih cuih thu cu an thlun. Moses le Aaron hnenih Bawipa ih thupekmi vekin Israel mi cun an tuah òheh.
Fatir Thihnak
29 Cun zanòim ah Bawipa in Izipt ram sungih fatir hmuahhmuah, Faro ih fapatir, siangpahrang rocotu ding a simi ihsin thokin leilung hnuai thawnginn ih thawngtla mi ih fapatir tiangin a that òheh; ramsa hmuahhmuah ih fatir khal an thi òheh relrel.Ref 12:29 Suah 4:22,23;
30 Cuih zan cu Faro le a kuthnuai bawi pawl le Izipt mi pawl cu an tho ih Izipt ram cu òah le raaknak hlir in a khat; ziangahtile fapa thih lonak inn pakhat hman a um lo.
31 Cuih zan thotho ahcun Faro in Moses le Aaron cu zamrang in a ko ih, “Pok uh! Nanmah le Israel mi pawl zamrang tein tlan uh. Ka minung pawl cu tanta uhla feh uh. Nan dil vekin nan Bawipa cu va biak uh.
32 Nan tuu le nan me le nan caw pawl khal nan dil vekin hruai uhla feh uh. Keimah hrang khalah thluasuah in dil sak uh,” tiah a ti.
33 Izipt mi pawl khalin zamrangte ih an ramsung ihsin suak hlohhlo dingah an fial hai; ziangahtile, “An feh lo asile kan thi thluh ngaingai ding,” an ti.
34 Curuangah Israel mi pawl cun thilnu tel lo sangvut cu an lak ih an sang tuahnak beel sungah an hnipuan in an tuam ih an liang in an phur ciamco.
35 Moses ih thucah bangtukin Izipt mi pawl ih hlawnthil sui le ngun le hnipuan pawl cu Israel mi in an dil.
36 Bawipa in hna a òuan ruangah Israel mi cu Izipt mi pawl in an hmaizah hngin ih an dilmi hmuahhmuah an ngah. Cuticun Israel mi pawl in Izipt mi pawl ih thilri cu an lak sak òheh.Ref 12:36 Suah 3:21,22;
Izipt Ram Ihsin Israel Mi An Suak
37 Israel mi pawl cu Rameses in an pok ih Sukkoth lamah an feh. Nunau le nauhak siar lo in mipa patling hlir thawng zaruk an ke in an feh.
38 Israel mi a si lomi midang tampi le tuu, me le caw tampi tla an hnenah an feh.
39 Izipt ram ihsin an kenmi sangvut cu thilnu tel lo in sangah an tuah. Thilnu tel lomi sang a si, ziangahtile rinlopi ah Izipt ram in dawimi an si. Anmah hrangih rawl suannak caan khal an nei lo.
40 Israel mi pawl cu kum zali le sawmthum Izipt ram ah an um.Ref 12:40 Sem 15:13; Gal 3:17;
41 Kum zali le sawmthum a kim ni ah Bawipa ih miburpi cu Izipt ram in an suak a si.
42 Cuih zan cu Izipt ramsung ihsin suak dingah Bawipa in a kilven zan a si. Curuangah cuih zan cu Israel mi pawl Bawipa ih a kilven zan tiah nehhnu san tiangin ulta dingah Bawipa ih hnenah an pek.
Lantak Puai Ih Thlun Dingdan
43 Bawipa in Moses le Aaron hnenah, “Lantak puai ih thlun ding daan cu hitiin a si ding: Ramdangmi in Lantak puai rawl an ei lo pei.
44 Asinan nan leimi sal cun a serh nan tan hnu lawngah a ei thei pei.
45 A laang teih a ummi le nan saancopmi kuli pawl cun an ei lo pei.
46 Inn pakhat sungah nan ei pei ih a lengah zianghman nan suahpi lo pei. Cun nan thahmi òilva cu a ruh nan khiak lo pei.Ref 12:46 Mipum 9:12; Saam 34:20; Joh 19:36;
47 Israel mi zate in puai cu nan tuah pei.
48 Ramdangmi nan hnenah an um ih Lantak puai Bawipa upatnak ih tuah an duh a si ahcun hmaisabik ah mipa hmuahhmuah an serh nan tan òheh pei; cuihnu lawngah puai ah an tel thei ding; nan sungsuak Israel mi bangtuk ah rel an si thlang ding. Sikhalsehla serh tan lomi pa cun a ei lo pei.
49 Hi daan pawl in Israel hrin a simi le nan lakih a ummi ramdangmi khal a huap a si,” tiah a ti.
50 Cuticun Israel mi pohpoh in an thlun ih Bawipa in Moses le Aaron hnenih thu a pekmi vekin an tuah.
51 A cuih ni ah Izipt ram ihsin Israel mi pawl cu Bawipa in a burpipi in a suahter hai a si.