SUAHLANNAK
(Exodus)
Thuhmaihruai
Suahlannak timi cu, “Tlansuaknak,” tican a si. Himi cabu sungah hin Israel pawl ih thuanthu a thupitnak: Izipt ram ih sal an taannak, Izipt ram ihsin an tlansuahnak thu a um. Himi cabu hi òhenli ih òhen a theih. 1. Hebru mi pawl Izipt ram ih sal an taannak ihsin an luatnak; 2. Izipt ihsin Sinai Tlang ih an fehnak. 3. Pathian in a milai pawl thawn Sinai Tlang ah thukam a tuah. Cuih thukam sungah nuncan ziaza lam, ukawknak lam le biaknak lam daan tla a tel. 4. Israel pawl in an Pathian biaknak inn an sak ding thu le a sungih hman ding thil pawl, puithiam pawl thawn a pehparmi daan le Pathian biaknak ding daan pawl tla an si.
Cuih tlunah hi cabu hin Pathian in a minung pawl kha sal ihsin a suah ih miphun phunkhat ah a tuah hai ih hmailam ah ruahsannak a neimi phunhnam ah a canter a si, ti thu a simfiang.
Hi cabu sungih thuanthu neitu bik cu Izipt ram ihsin a miphun pawl hruaitu dingah Pathian ih hrilmi Moses kha a si. Mi ih an theih tam biknak zawn cu bung kul sungih um Thukham Pahra kha a si.
1
Israel Mi Izipt Ram Ah Hremnak
1 Jakob le anmah ih innsang ciar thawn Izipt ram ih a fehmi a fapa pawl ih hmin cu:
2 Reuben, Simeon, Levi, Judah,
3 Issakhar, Zebulun, Benjamin,
4 Dan, Naftali, Gad le Asher tla an si.Ref 1:4 Sem 46:8-27;
5 Jakob ih sungsuak tefa pawl cu an zate in sawmsarih an si. Josef cu Izipt ram ah a rak um zo.
6 Caan a hung rei deuh hnuah Josef le a unau pawl cu an thi ih an khukòhi pawl khal an thi thluh.
7 Sikhalsehla Israel mi pawl in faate tampi an nei ih Izipt ram khat ko in an zai ih a cah khal an cak.Ref 1:7 Tirh 7:17;
8 Cuih caan ah Josef ih thuhla thei dah lotu mi thar pakhat Izipt ram ah siangpahrang a cang.Ref 1:8 Tirh 7.18;
9 Anih cun a milai pawl hnenah, “Zoh hnik uh, hi Israel mi pawl hi an tam zet ih tlunah an cak zet fawn ih kan hrangah phan ding a um a si.
10 Curuangah i ngai uh, Israel mi pawl hi an tam sinsin lonak dingah fimkhur zet in an thu hi kan ruah a òul a si. Ral kan neih pang asile kan ral pawl hnenah an òang pei ih kan ram sungin an suak pang ding,”Ref 1:10 Tirh 7:19; tiah a ti.
11 Curuangah an thinpit ko in hnaòuan khung òuantertu dingah an tlunah salkhawngtu pawl an ret. Cuticun Israel mi pawl in rawl khawlnak dingah Pithom le Rameses khuapi pawl cu Faro hrangah an sak.
12 Asinan Izipt mi pawl ih an hrem deuhdeuh tikah Israel mi pawl cu an pungzai deuhdeuh. Izipt mi in Israel mi pawl cu an hua zet ih an òih zet fawn.
13 Curuangah sal zonzai ah an tuah hai;
14 tlakrawh ser le tlakrawh tuah hnaòuan khung òuannak ah an nun cu a har sinsin. Hnaòuan har tinkim cu zangfahnak nei lo in hramhram in an òuanter hai.
15 Cun Hebru nunau a bawmtu nau dongtu sayama pawl hnenah Izipt siangpahrang in thu a sim. Pakhat cu Shifrah a si ih a dang pakhat cu Puah a si.
16 An hnenah, “Hebru nunau in fa an hrin ih nan tuamhlawm tikah naute cu mipa asile nan that pei; nunau a si ahcun nan that lo pei,” tiah a ti.
17 Sikhalsehla nau dongtu sayama pawl cun Pathian an òihzah ruangah siangpahrang ih thu cu an thlun lo. Mipa naute khal that lo in an zuah òheh.
18 Cutikah siangpahrang in nau dongtu sayama pawl cu a ko ih, “Zianghrangah hitiin nan tuah ih mipa naute tla nan zuah òheh?” tiah a sut.
19 Cule annih in, “Hebru nunau pawl cu Izipt nunau vek an si lo. An cakvak ih an fahrin a ol zet; nau dongtu sayama kan va thlen hlanah naute cu a rak suak zo òheu,” tiah an ti.
20 Pathian ih òhatnak cu nau dongtu sayama pawl ih tlunah a thleng. Israel mi pawl cu an òhangso ih an cak sinsin.
21 Nau dongtu sayama pawl in Pathian an òihzah ruangah annih khalin faate an nei ve.
22 Cutikah Faro in a ramsung mi hnenah, “Hebru nunau ih hrinmi fapa hmuahhmuah cu Nail tiva sungah nan hlon pei; asinain fanu cu hlon lo in nan zuah pei,”Ref 1:22 Tirh 7:19; tiah thu a pek.