3
Nebuchadnezzar In Milem Biak A Fial
1 Siangpahrang Nebuchadnezzar in, a tung pi sawmkua a vang pi kua a simi milem tumpi kha sui in a tuah ih Babilon peng Dura hmunrawn ah a ret.
2 Cule siangpahrang in a kuthnuai ih bawi upa hmuahhmuah, ramòhen uktu bawi pawl, ram uktu bawi pawl, ram uktu bawi bawmtu pawl, mangki bawi pawl, tangka kaitu pawl, thuòhentu pawl le bawi dangdang pawl hmunkhat ah ra suak dingin thu a pek. Siangpahrang Nebuchadnezzar in sui milem a tuahmi apnak ih ra suak thluh ding an si.
3 Bawi hmuahhmuah cu sui milem apnak hmunah an ra suak ih sui milem hmaiih an din tikah,
4 thuthantu pakhat in aw ring zet in, “Phunkip le hnamkip le òongkip hmangtu minung pawl, ngai hnik uh!
5 Tawtawrawt an tum nan thei dingih cuve tein hmunkhat ah phirivau, lemlawi, baza, òingòang le a awn theimi hmuahhmuah an tum tla nan thei ding. Cutiih awnmawi an tum ve tein nan lu nan kun pei ih siangpahrang Nebuchadnezzar ih a tuahmi sui milem hi nan bia pei.
6 A lu a kun lotu le a bia lotu cu hmakhat teah meisa alh sungah thlak an si ding,” tiah a ti.
7 Curuangah tummi aw an theih ve tein phunkip, hnamkip le òongkip a hmangtu pawl cu an lu an kun ih siangpahrang Nebuchadnezzar ih sui milem cu an bia ciamco.
Daniel Ih Rualpi An Mawhthluk
8 Cuih caan ah Babilon mi pawl in Judah mi pawl thangsiat dingah tikcu rem cang a si.
9 Annih in siangpahrang Nebuchadnezzar hnenah, “Maw siangpahrang bawipa, na nunkhua sau hram seh.
10 Bawipa nangmah in thu na pek ih awnmawi an tum ve tein zokhal an lu an kun dingih sui milem an bia ding.
11 Lu a kun lotu le sui milem a bia lotu cu meisa alh sungah thlak an si ding, tiah na ti.
12 Babilon peng uktu le hotu dingih òuanvo na pekmi Judah mi Shadrak, Meshak le Abednego tla cu siangpahrang bawipa na thupekmi an el. Na Pathian an bia lo, milem na tuahmi hmai khalah an kun lo a si,” tiah an ti.
13 Cutikah siangpahrang bawipa cu a thin a heng ngaingai ih cuih pathumte cu a hmaiih rak hruai dingah thu a pek.
14 An rat tikah, “Shadrak, Meshak le Abednego, ka khawzing an bia duh lo ih ka sui milem tuahmi hmai khalah an kun duh lo, tiah an lo timi hi thungai a si maw?
15 Atu ah tawtawrawt, phirivau, lemlawi, òingòang le a awn theimi hmuahhmuah an tum dingih cumi nan theih ve tein nan lu nan kun pei ih milem hi nan bia ding. Nan biak duh lo a si ahcun hmakhat teah meisa alh sungah hlon nan si ding. A lo hum theitu ding Pathian a um tiah nan zum maw si?” a ti.
16 Cutikah Shadrak, Meshak le Abednego cun, “Maw siangpahrang bawipa, hi thu ahcun kanmah le kanmah òan awk òul in kan ruat lo.
17 Meisa alh sungin in hum theitu Pathian a um a si ahcun kan biakmi le kan rianmi kan Pathian lawnglawng a si ih amah cun na cahnak huham sung khalin in hum ko ding.
18 In hum lo a va si hmanah, siangpahrang bawipa, na khawzing pawl cu kan bia lo dingih na sui milem tuahmi hmai khalah kan kun lo ding, ti cu in theih sak cia aw,” tiah an ti.
Daniel Ih Rualpi Pathum Thah Ding
19 Cutiih an òongmi cu Nebuchadnezzar in a theih tikah a thin a sup thei nawn lo. Shadrak, Meshak, le Abednego parih a thinheng tuk ah a mithmai a sen òheh. A minung pawl cu thu a pe ih meipi an muah òheumi hnakih let sarih sa dingin a muahter.
20 Cule a ralkap sungah micak bikbik a hril ih cuih Judah mi pathum kutke òem dingah le meisa sungih paih dingah thu a pek.
21 Cute pathum cu an angki, an bawngbi le an lukhuh, an hruhlaimi thilthuam famkim thawn an òem ih meipi sungah cun an paih.
22 Siangpahrang in meipi cu sa cuang dingah thu khoh zet ih a pek vekin meipi an muahmi cu a sa ngaingai ih mi pathum meipi sungih a paihtu ralkap cak zet pawl hman cu meisa in a kang that.
23 Cule Shadrak, Meshak le Abednego pawl cu an kutke òemmi thawn meipi sungah cun an vung tla.
24 Cule rinlopi ah Nebuchadnezzar cu a mangbang in a ding lohli! A kuthnuai ih bawi pawl cu, “Mi pathum kha an kutke òem tahrat in meipi sungah kan paih a si lo maw?” tiah a sut. Annih in, “A si bawipa, na tivek cun a si,” an ti.
25 Siangpahrang bawipa cun, “Ziangtinso meisa sungah mi pali an feh rero ka hmuh hi!” tiah a sut. “An kutke khal òemmi an si lo ih a na an tuarnak zianghman a lang fawn lo; cule a palinak tla cu khawzing pawl ih fapa a bang!” tiah a ti.
An Suak Ih An Hnaòuan A Kai
26 Nebuchadnezzar cu meipi tihnak lamih a ummi kotka lamah a feh ih, “Shadrak! Meshak! Abednego! Ziangkimtithei Pathian ih siahhlawh pawl, ra suak uh!” tiah a ko ciamco. Cule hmakhat teah an ra suak.
27 Cule ram uktu bawi pawl, ramòhen uktu pawl, ramòhen uktu bawmtu pawl le siangpahrang kuthnuai ih bawi hmuahhmuah an ra ih meipi ih a tuahmawh lomi mi pathum cu an ra zoh ciamco. An sam phangkhat hman a kang lo, an hnipuan khal a kang lo ih meisa rim hman an nam lo. Cumi cu an hmu òheh.
28 Cutikah siangpahrang in, “Shadrak, Meshak le Abednego ih Pathian cu thangòhat si ko seh! Amah a riantu le a rinsantu pawl runsuak dingah a vancungmi a run thlah a si. An biakmi an Pathian siar lo khawzing dang biak le a hmaiih kun hnak cun ka thupekmi an el ih an nunnak tiangin an pe ngam sawn a si.
29 “Curuangah atu in thu ka lo pe a si: Zovek phun le zovek hnam an si hmanah, ziangbangtuk òong a hmangtu an si hmanah Shadrak, Meshak le Abednego ih Pathian upat lonak thawn a òongtu an um a si ahcun anmah cu an kut le an ke bauhthlek òheh an si pei ih an inn cu hnawmpen ih canter òheh an si pei. Hibangtuk ih mi run theitu khawzing dang khui hmanah a um lo,” tiah a ti.
30 Siangpahrang in Shadrak, Meshak le Abednego cu Babilon peng sungah an hnaòuan a kaiter a si.