24
Paul Cu Judah Mi In Taza An Cuai
1 Ni nga hnuah Puithiam Sang Ananias cu upa òhenkhat le sih-ni Tertullas thawn Sisaria ah an feh. Mangki Bawipa Felix hmaiah an suak ih Paul taza an cuainak cu an sim.
2 Cule Paul cu an ko ih sih-ni Tertullas cun Paul sual an puhnak thu cu hitiin a sim:
“Mangki Bawipa, fimnak thawn nangmah in, in hruai ruangah caan reipi daihnak kan ngah ih kan ram òhatnak hrangah rem òulmi pawl tampi rem a si zo.
3 Himi kan hmuh tikah na tuahmi pawl hi khuazakip ah mi in an pom ih na parah kan lung a awi ngaingai.
4 Na tikcu tam tuk ka lo lak sak pang ding ti ka phan ruangah kan sim duhmi kha a tawi thei sungin kan hun sim pei ih zangfah tein, in ngaisak hram aw.
5 Himi pa hi mi buaiter thei zet le òihnungza a si tiin kan hmu. Leilungtlun hmun kipih Judah mi pawl a buaiter ringring ih Nazareth bu an timi pawl sungah hruaitu amah hi a si.
6 Kan Biakinn borhhlawhter a tum ih culai ah kan kai. (Cule kan daan vekin a thu rel kan tum;
7 asinain ralbawipa Lisias a ra ih hramhram in, in ra long.
8 Cuih hnuah Lisias in Paul tazacuai a duhtu pawl cu na hnenah hin feh hai seh, tiah thu a pek.) Nangmah in hi pa hi thu na sut ahcun amah ih hnen ihsin sual kan puhmi pawl hi nangmah rori in na thei ko ding,” tiah a ti.
9 Cutiih a simmi cu Judah mi pawl in an bawm ih a simmi hi a zate in a dik òheh a si an ti.
A Òannak Thu Felix Hmai Ah A Sim
10 Mangki Bawipa in Paul cu thu sim dingah a kut in a zaap ih Paul in Mangki Bawipa hnenah:
“Nangmah cu hi ram sungah hin kum reipi thureltu a òuantu na si, ti ka thei ih atu ah na hmaiah ka òanhmun sim dingin caan ka neih ruangah ka lung a awi zet.
11 Jerusalem ah Pathian bia dingin ka hung fehnak hi ni hleihnih hnakin a tam hrih lo, ti cu na thei ko ding.
12 Biakinn sungah zo thawn hman thu kan el aw lo, ti cu Judah mi in an thei òheh. Sinakok ah siseh, khuapi sung hmun dangdang khalah siseh, misenpi ka tokhroknak an hmu hrimhrim lo ding.
13 Cule atu ah na hmaiih sual in puhmi pawl hi a dik taktak a si tiah an lo hmuh thei fawn lo ding.
14 Ka tuah taktak tiin na hmaiah ka ti duhmi cu hihi a si: Kan pupa pawl ih Pathian ka biaknak ahhin Lamzin kan timi ka thlun; annih in cuih Lamzin cu a dik lo an ti. Sikhalsehla Moses Daan sungih nganmi hmuahhmuah le profet pawl ih nganmi cabu sung ummi hmuahhmuah khal ka zummi an si òheh.
15 Anmah vek thotho in keimah khal Pathian hnenah ruahsannak ka nei ve. Cuih ruahsannak cu, mi hmuahhmuah in, miòha khal misia khal, thihnak ihsin an thosal ding, timi a si.
16 Cuticun Pathian hmai le minung hmaiah phuhrun awknak nei lo dingin ka zuam thei tawk ka zuam ringring.
17 “Kum reipi sung Jerusalem khua ka thlen nawn lo ruangah ka miphun pawl bomnak ah tangka pe ding le thawinak pe dingin Jerusalem ah ka hung feh.Ref 24.17-18 Tirh 21:17-28;
18 A daan vekin thianfainak ka tuah òheh hnuah a tlunih ka simmi pawl ka tuah rero lai ah Biakinn sungah in hmu. Culai ah ka hnenah miburpi an um lo; buainak khal a um lo.
19 Asinan cutawkah cun Asia ram ihsin a rami Judah mi hrekkhat an um. Cupawl cu ka parah lungkimlonak an neih a si ahcun na hmai rori ahhin anmah ra in mawhthluknak cu ra sim ve ding an si.
20 Asilole hitawkih a um pawl hin Khonsil upa pawl hmaiih ka din lai ah ka sual tiih an hmuhmi lo sim hai seh.
21 An hmaiih ka din lai ah thil pakhat lawng ka aupi mi a um: ‘Mithi pawl cu nunnak ah an thosal ding,’ tiin ka zum ruangah tuih sun ahhin thu in khiing a si,” tiah a sim.Ref 24.21 Tirh 23:6;
22 Cule Felix cu cuih Lamzin thuhla òha zet ih a theitu a si ruangah an thu rel cu a cawlter ih, “Ralbawipa Lisias a ra thlen tikah nan thu cu ka rel leh ding,” tiah a ti.
23 Paul a kiltu ralbawi cu, “Paul hi òha tein kilveng uhla, malte in luatter deuh uhla a òul a haimi pawl cu a rualpi pawl in pe hai seh,” tiah a ti.
24 Ni malte a rei hnuah Felix cu a nupi Drusilla thawn an ra. Drusilla cu Judah mi a si. Paul kha a ko ih Paul in Jesuh Khrih zumnak thuhla kha a sim ih cumi cu an ngai.
25 Sikhalsehla Paul in òhatnak thu, mah le mah supawknak thu le a ra thleng dingmi Thuòhennak Ni thu pawl a sim tikah Felix cu a thin a phang ih, “Atu cu va kir hrih aw. Tikcu ka neih tikah ka lo kosal leh ding,” tiah a ti.
26 Felix cun Paul in tangka i pe sehla tiah ruahsannak a nei. Curuangah Paul cu a ko leuhleuh ih thu a ruahpi òheu.
27 Kum hnih a rei hnuah Mangki Felix cu Porsius Festas in a hnaòuan a thleng. Judah mi pawl hnen ihsin mithmai òha ngah a duh ruangah Felix in Paul cu suah lo in thawng sungah a tanta.