2
1 Nang noh ta jum ei ktie üng Pangsiima kkhyü be ksang üng ngkäk ktia jah msuuk mtheh bä.
2 Pa kshe-e üng phi asun kba nah jah mtheh vai. Asune noh ah nih päta puum sha-a hlü ko ei sun khän ta lü kkhyaange noh ah nih jah lei shong vaia veyah kkhaie ni. Ah nih nih-e sun mlung mbüüp naak, jum ei naak ngkhääng ngpaang naak, mhlä kphya naak, mlung mshaaü naak üng ah nih ve vai ua jah msuuk mtheh bä.
3 Asuna tänga nu kpüie phi ngsiim ngsaih ktia shak üng ah nih xün shei vaia jah mtheia. Asune noh kkhyaange üng käh sok sek lü ju phi käh o-tong yah kkhaie. Ah nih kthaka diik kti nghnu mie üng do ktia ngkho jah mthei u she.
4 Nu kpüie noh ngkhääp ei thaai kti nghnu mie üng ah nih kpa mi jah ah nih sa nae phi ah nih jah mhlä kphya naak vaia jah mthei u she.
5 Ngkhääp ei thaai kti nghnu mie sun shing khän thei ulü ah nih ve soh mkhiin mkhäk yah kkhaie ni. Im khüüi lou khoom üng phi thei leh yah kkhaie. Hnip hnooi lü ve u she. Ah nih kpa mia pyen kshak ksang na-u she. Pangsiima thang kdo kkya sun käh thang msheet lü asun kba ah nih ve vai hlü kti, tilü nu kpüie noh jah mthei u-she.
6 Asuna tänga kpa mi sae phi ah nih puum sha hlü ko ei sun ah nih khän ta vai jah msing msääi bä.
7 Ah nih ning hju tuih vai ua nah pät phi abäng üng akdo kkinga ngbi ngloua. Ah nih nih-e üng Pangsiima kkhyü be nah jah mtheh üng nah pyen kshak jah nah ve soh mat yah kkhai. Ashü kyüa jah msuuk mtheh-a.
8 Kkhyaange noh käh ah nih ning pyen ei vaia Sangsiim üng ngkäk ktia nah pyena. Asun üng va nih ye-e noh ah nih jah kbäü ei naak vaia mkot käh velü ngke ei kkhaie.
9 Mpyae phi ah nih mah pa-a ti pyena ve vai jah mtheh bä. Ah jah xüh shoh abäng ah hlü eia poh mshah peet yah kkhaie. Ah nih mah pa sun am pyen ei be yah u.
10 Ah nih mah pa-a külak sun käh mpyu kkhi na-yah kkhaie. Ah nih mah pa noh küm seei ktia ah jah üm naaka ve-u she. Asun kba ah nih ve u ta jah thoong khyah kti Pangsiima kkhyü msuh mtheh naak sun nglou ngthang lok kkhai ni.
11 I lüni ti ta kkhyaang naküt noh kuum kyan naak ah yah khoh vaia Pangsiim noh ah bä naak ngshing ngte shak kti.
12 Ah nih-a am ah hlü eia ve soh ngki ngheei hoih vai jah kho mdek üng shääng ei kti kpaam ei naak not vaia Pangsiim noh nih nih-e ah bä naak üng jah msuuk mtheh kti. Asuna phäh-a nih nih-e sun ahina kho mdek kkhaana pät noh khän ta lü pyuun ktia xün shei vai jah Pangsiima hlü eia kba ve soh khoh kti.
13 Nih nih-e hin Pangsiima däm duh kti mhnüüp sun ääp ei lü nih mtät k'um üng asun kba ve vai hlü kti ni. Asuna mhnüüp üng nih nih-ea däm duh kti Pa Pangsiim jah thoong khyah kti Booi Jeishüh Khritoa jou taai naak pou lok kkhai.
14 Asuna Booi Jeishüh Khrito sun noh nih nih-ea mkhye mshoh mjü kküm üng ah jah thoong khyah vaia ah shak ah jah ton peet. I a thoon lüni ti ta ah jah ka naak vaia ngsiim ngsaih ktia kkhyaanga jah msom lü akdo poh vai sun mtun ei ktia ah jah thoon shak.
15 Ahin bange hin jah msuuk mtheh bä. Jum ei ktie ktha jah pea. Ah hima phi jah him bä. Pangsiim noh ah ning peet hiit shum ei bä. U a kkhyaang noh phi käh ning mdih mshuui she bä.