4
1 Booi Jeishüh Khrito ah lo be üng thik kti jah xüng kti jah si jaang kkhai. Shang phuhlanga thoon lü up kkhai ni. Asuna Booi Jeishüh-a hmaai ma-a ni, Pangsiima hmaai ma-a ni ahin kba nang Timotih üng kah ning mtaat ni.
2 Pangsiima kkhyü kpyaü hüa. Kkhyaange noh ngngaai hlü ulüphi am ngngaai hlü ulüphi jah mtheh kkhaia ngshääm kyet bä. Nah mlung mshaaü lü angseeia jah msuuk mtheh-a. Ah nih nih-e jah him lü ktha jah pea.
3 I lüni ti ta kkhyaange noh msuh mtheh naak ksang am ah nih su ngngaih hlüa ksüün pha lok kkhai ni. Asun üng ah nih mlung ktüüma velü ah nih ngjaak hlü jah mthei ktia kkhyaang jah khü kkhaie ni.
4 Kkhyü ksang ah nih nghnga üng am lut ti. Kkhui kkaam däk ni ah nih ngjaak hlü kom.
5 Nang ta anghläia ngshü ngseei lü ve bä. Khui kha nah khaam ei üng käh ktha jaüh bä. Thang kdo kkya kpyaü hin nah khuuta poh-a. Pangsiim noh ah ning peeta mta hin küm seei ktia poh bä.
6 Keia shak hin khah naak kkhyünga kah thoon vaia ksüün phalo hnüh kti ni. Kho mdek kah seh ta-hnüh kkhaia kyak kti.
7 Kei noh jum ei naak ngshun akdoa kah täk pääng kti ni. Don ngsaam ei naak pha onga kah dong pääng kti ni. Kah jum ei naak üng kkhyü shing üng kah vek kti.
8 Tuh-a ta pyuun naaka ktha kheen kah phäh-a vek kti ni. Booi Jeishüh ah lo be mhnüüp üng apät kuung pyuun ktia si jaang khonga thoon lü asuna ktha kheen nah pe hnüh kkhai ni. Kei däk üng am nilü ah nih kphya nalü ah lo be vaia mhnüüp ääp ei ktia kkhyaange naküt üng phi jah pek kkhai ni.
9 Kah veeia nah jaang lo vaia mtun ei bä.
10 Temang noh kho mdek üng shääng ei ktie jah hlü ei lolüta nah hoih hüt lü Teshah Lonih mlüh-a sit kti ni. Kyeh Sheen phi Kalatih hnea sit kti. Titüh phi Taal Matih hnea sit kti ni.
11 Lükah ah pät däk ni kah hlonga ah ve ti. Marküh shui lü lo püi bä. Ah nih noh kah khuut poh, nah ku ei khoh kkhaia kyak kti ni.
12 Tiki Kuh ta Ephet mlüh-a kah tüih ni.
13 Nah lo üng ta Taloah mlüh-a Khap Pua veei kah taak hüt kah phyang k'oh jah sa upe sän jah lo püi bä. Sa kah yuk naak meh vun sa nglepe sän aktunga käh jah mhnih bä.
14 Nglei mthi shep kti Alek Santa noh nah mkhui mkha kkhüt kti ni. Booi Pa noh ah nih sun ah poh-a kba kheen pe-be kkhai ni.
15 Nah pät noh phi ah nih-a phäh mseei ei bä. I lüni ti ta ah nih noh kah nih kpyaü thang kdo kkya akshe hleena kpet mjak kti ni.
16 Si jaang luuma aksüka kah ng'yung ei üng kei da ngtung kkhai u phi am ve u. Ah nih bänge noh ah nih nah hoih u ni. Pangsiim noh ah nih mkhyea käh ngngaai she.
17 Lüphi Booi Pa noh nah kpüi kpak lü kei noh thang kdo kkya akküma Pangsiim am kshing kti kkhyaang mjü kse-ea ma-a pyen khoh kkhaia ktha nah pek kti ni. Pangsiim noh kyüh she kkhüt ktia kkhyüh lü ah nah mhlät ni.
18 Booi Pa noh kei hin kyüh shek kti naküt üng nah mhlät ham kkhai ni. Ah kkhaan kho pea mkhüh k'üpa ngshuk ngvän naak käh vek ktia nah seh püi kkhai. Booi Pa-a hlüng taai naak sun aksüün tä lü kkhyaange noh mküüi mtou u she. Amen.
19 Phyiki Lah jah Aküüi Lah ni, Oom Nesi Pyüluh-a kkyoong longe kah jah shüüm jah mtheh bä.
20 Eratuh ta Korin mlüh-a vehüt kti. Tophi Müh phi mhnat ei lü Milet mlüh-a kah taak hüt ni.
21 Nang hin kho kshik khya apha hlaana nah lai lo vaia mtun ei bä. Jüpu Lung, Pu Theng, Linuh jah Klaau Ta-e noh ning shüüm ktie ni. Khritjaan be nae abäng noh phi ning shüüm ktie ni.
22 Booi Pa nanga hlonga veshe. Pangsiima bä naak nah nih bängea kkhaana veshe.