2
1 Kah sao, Booi Jeishüh Khrito üng nglooi eia phäh yah eia bä naak üng ngkhääng ngpaang lü vea.
2 Shak shi kho hah-a ma-a kah ning msuh mtheh Pangsiima kkhyü nang noh nah ngjaak ni. Pangsiima kkhyü sun üm naak vai ngkäih ktie jah kkhyaange jah mthei be khoh kkhaie üng jah msuuk mtheh-a.
3 Jeishüh Khritoa ngtuk kpoh ksanga thoon lü khui kha naak khaam ei kkhaia anangshääm ei bä.
4 Ngtuk khuut poh mtuui ktia kkhyaang hin noh ngtuk üng am shääng ei ktia ngkho üng käh ngpüi hü yah kkhai. Ah nih khü kti ngtuk kpoh khonga mlung ktüüma ah ve soh vai sun ngngaai yah kkhai.
5 Ngsaam ei naaka dong ktia kkhyaang sun ah nih thuuma kba am ah don ta kheen am yah ei khoh.
6 Ngnü ngsheng lü kho lou bi kti noh aktheih paai kho hah lou ei ma yah kkhai.
7 Kah ning msuh mtheh naak hin su ngngaaia. Booi Pa noh abäng nah ngjaak kya vaia ning kpüi kkhai ni.
8 Booi Jeishüh Khrito shüüm kyet bä. Kei noh thang kdo kkya kah kpyaüa kba ah nih sun thih naaka kkhyüh thou lobe kti. Davita koon shaang üng ngtüüi lok kti ni.
9 Asuna thang kdo kkya-a phäh üng kei noh mkhuh mhlih kah khaam ei kti. Mpyuk eia kba mthi yüüi üng ah nih nah khun ni. Lüphi Pangsiima kkhyü ta mthi yüüi üng khun lü am ng'yah.
10 Pangsiima jah xüea phäh-a kei noh abäng kah suun ei vaia kah mkhyah ni. Ah nih nih-e sun phi Booi Jeishüh Khrito üng nglooi ei lü kuum kyan naak jah angshääia hlüng taai naak ah nih yah vaia ni.
11 Akkea ka kkhyü hin aksang ni.
“Nih nih-e hin Booi Jeishüh Khrito mah mah nih thih ta ah nih mah mah nih xüng kkhai.
12 Ah nih-a phäh-a mkhuh mhlih nih khaam ta ah nih mah mah nih up yah kkhai. ‘Ah nih am kshing ngü’ tilü nih pyen ta Khrito noh phi ‘Ah nih am kshing ngü’ tibe kkhai” tilü vek kti.
13 Nih nih-e hin Khritoa kkhaana kkhyü shing üng am nih ve kyo ulü phi ah nih noh ta nih kkhaana kkhyü shing üng ve shet kkhai ni. I lüni ti ta ah nih noh ah mlung am hlai khoh.
14 Ahina msuh mtheh naak hin kkhyaange üng jah shüüm shak bä. Alapa ngthäh ngkhyah naak käh ah nih poh vaia Pangsiima ma-a jah msääia. Asu banga ngthäh ngkhyah naak hin shum ei vaia am do. Ngngaai ngjak ktiea jum ei naak sim pyak shak khoh kti.
15 Pangsiima khuut nah poh-a phäh käh ngke ei lü kkhyü ksang hman ktia nah jah mtheia phäh Pangsiima ma-a nah hmaai mah vaia mtun ei bä.
16 Pangsiim noh am ah hlü ei alapa ngthäh ngkhyah naak üng käh ngpüi bä. I lüni ti ta asu banga phäh kkhyaange noh Pangsiim sha lü kpet mjak kkhaie ni.
17 Asuna msuh mtheh naak sun mti sha üng jaü jaü lok kti mneh kkhyünga kba vek kti. Hämeeng Nün jah Piletüh asu banga msuh mtheh naak üng ngpüi kti xooi ni.
18 Asue sun sang ktia msuh mtheh naak lam hmü ulü Khritjaanea thoh naak be thoon lo pääng kti ni tilü kpyaü hü ktie. Ah nih nih-e noh be nae akhäka jum ei naak jah up lat shak ktie.
19 Lüphi Pangsiim noh ah jah peeta jum ei naaka phung ta ngkhääng lü am ngshüün khoh. Ah jah msuh mtheh naak ksanga ngte naak ta “Ah nih üng shääng ei ktie Booi Pa noh jah kshing kti ni. Mat mat noh ‘Kei hin Booi Pa üng kah shääng ei kti ni’ ah ti ta mkhye mshoh naak i phi käh poh ti she.”
20 Im kdäm nu mat üng uum k'am, kbe lung amjü kküm vek kti. Akhäk ngui xüi üng ah nih jah pyaan u. Akhäk thing, akhäk mdek üng ah nih jah pyaan u. Aphu küüi kti uum k'am kbe lung sun kkhin nghleei kdäm ah lo däk üng ni shum ei. Aphu jä kti uum k'am kbe lung sun vok aaia ei ook poh naaka jah shum ei.
21 Khye kti msuh mtheh naak üng ngsiim kti kkhyaang ta aphu küüi kti uum k'am kbe lung üng täng kti. Ngsiim ngsaih lü vek kti kkhyaang ta im mah pa noh ah shum eia kbe lung üng täng kti ni. Ah nih sun Booi Pa noh do ktia khuut amjü kküm üng shum ei khoh kti ni.
22 Athoiea am do kti kpaam ei naak üng käh ngpüi bä. Booi Pa sun mlung kkyoong ngsiim üng hjok khah kti abänge mah mah pyuun naak, jum ei naak, mhlä kphya naak jah diim deih naak nang nih üng ave vaia mtun ei ubä.
23 Am shum ei vai alapa vek ktia ngthäh ngkhyah naak mphen bä. Asuna ngkho üng ngvook ngshah naak pou lok kti ati sun nah kshing kti ni.
24 Booi Pa-a khuut poh kti ta ngvook ngshah poh hlük ktia kkhyaanga käh thoon yah kkhai. Ah nih sun kkhyaang naküta kkhaana ah mlung k'jena jah msuuk mtheh yah kkhai. Ah mlung mshaaü yah kkhai ni.
25 Ah nih kpet mjak ktia kkhyaange phi ahnip hnooi ktia jah msuuk mtheh thei yah kkhai. Asun üng va ah nih nih-e vuuk be ulü kkhyü ksang kshing lo kkhaia Pangsiim noh jah ku ei to kkhai ni.
26 Asun kba ani ta Shatan noh jah man lü ah hlü ei jah ksang na-shak kyo lüphi ah nih nih-e sun Shatana msuta kkhyüh lät be khoh kkhaie ni.