3
1 Kkhyaang mat hin shaang khonga ah thoon hlü ta ah tüüm do kti ni tia kkhyü hin aksang ni.
2 Shaang khong sun kbäü ei naak käh vek kti, ah kkhyu mat däk vek kti, siim kyaai kti, ah mlung mbüüp khoh kti, kkhyaange noh ah nih lei shonga kkhyaang thoon yah kkhai ni. Kkhin jah kkhin nghleei na-thei kti, Pangsiima kkhyü jah msuuk mtheh thei ktia phi thoon yah kkhai ni.
3 Ju mpyüi mhmah kti, ngtuun poh hlü kti, shaang khonga am thoon khoh. Shaang khong ta hnip hnooi kti, ngvook ngshah käh poh kti, ngui xüi külak käh kpaam ei ktia kkhyaanga thoon yah kkhai ni.
4 Ah kkyoong long noh ah pyen ah nih ksang naaka jah up khoh ktia kkhyaanga thoon yah kkhai ni. Ah sa nae noh ah pyen ngjalü ah nih lei shonga kkhyaanga thoon yah kkhai ni.
5 Kkhyaang mat hin noh ah kkyoong long phi am ah up khoh ta Pangsiima shaang ngsiim ta i hok kba mshü mseei khoh kkhai ni.
6 Khritjaana thoon lo thaai kti phi shaang khonga käh msoon yah vai. Asun kba am ani ta sam sah lolü Shatan yaai pa-a kba sim pyak kkhai.
7 Pangsiim am jum ei ktie noh phi ah nih lei shonga kkhyaanga thoon yah kkhai ni. Asuk kba am ani ta kkhyaang noh ah nih kbäü ei naak vai velü Shatana msut üng ng'ook kkhai ni.
8 Shaang üng jah kpüi ktie phi ah nih ngnei shak do kti, kkhyü käh msom hü ktia thoon yah kkhaie. Ah nih nih-e sun ju ook mpyüi mhmah käh vek kti, ngui xüi külak käh kpaam ei ktia thoon yah kkhaie ni.
9 Ah nih ve soh ngnei shak mlung kkyoong käh ah nih kbäü ei vaia velü jum ei naak üng shääng lü ngthup kti sun ksüng ei kyet yah kkhaie ni.
10 Aksüka ah nih nih-e sun saam naaka shaanga mta nah nih jah peet ma vai. Jah kbäü ei naak vai am ah ve lo ta shaang üng jah kpüi ktia nah nih jah msoon vai u.
11 Ah nih kkhyue phi ah nih ve soh ngnei shak do yah kkhai ni. Käh sok sek yah kkhaie. Siim kyaai lü a i üng phi üm naak vaia looi ngkäih ktia kkhyaanga thoon yah kkhaie ni.
12 Shaang üng jah kpüi kti ta mat däk kkhyu na-yah kkhai. Ah sa nae jah ah kkyoong long noh ah pyen ah nih ksang naaka jah up khoh ktia kkhyaanga thoon yah kkhai ni.
13 Shaang üng jah kpüi kti sun mtun ei lü khuut ah nih poh ta shaang noh ah nih sun lei shong kkhai ni. Asun üng Booi Jeishüh Khrito ah nih jum ei naak phi xe xok nalü kpyaü khoh kkhai ni.
14 Ahina sa kah ning yuk lo um hin üng phi käh hjou-in ktia nah veeia lolü kah ning hmulok kkhaia kah ngngaai kti ni.
15 Lüphi am kah lai lo lan to balaak ta Pangsiima kkyoong long üng i hok kba ve soh poh msah vai atia nah kshing naak vai ahina sa kah yuk lo ni. Shaang ngsiim ta xüng kti Pangsiima kkyoong long ni. Asuna shaang sun aksanga phäh mkaih ktung jah mthoh ktung kba ni.
16 Nih hjok khah u Pangsiim üng shääng ei ktia ngthup kti ta däm duh kti ni ati hin nih ksang na-yah kkhaie ni. Booi Pa sun kkhyaang nghngi siima hmi lolü kho mdeka ngshing ngte lok kti. Ah nih sun pyuun kti ni tilü Mkhyangsiim noh shak shi peet kti. Kkhaan kho ngshäe noh phi ah nih hmuh u. Ah nih-a mong thang kdo kkya kkhyaang mjü kse-ea veei kpyaü hü ktie. Kho mdek kkhaana ka kkhyaange noh ah nih jum ei lok ktie. Jou taai mah kti kkhaan khoa Pangsiim noh ah jäh be ni.