1 Kona To Sa noh kkhyüh üng ka mshing naak aksük ah phyeet sun kah hmuh. Kkhyüng kshei kphyü üng ka mat noh kho nghmüüm kthaia kba ah pyen kah ngjaak. “Loa” ah ti. 2 Bük ngüshe ngshe book kah hmuh. Ngshe ngsum kti noh li mla phi bilü Booi lu ngbün ah nih peet u. Ah nih hin ngnääng pääng lü ngnääng be tü kkhaia joong kti. 3 Kona To Sa noh anghngih naak mshing naak ah phyeet be tü. Asun üng anghngih naak kkhyüng kshei noh “Loa” ah ti kah ngjaak. 4 Ngshe pou lobe tü kti. Asuna ngshe ta ashen ni. Asuna ngshe ngsum kti üng kho mdeka diim deih naak ksim kpyak naaka hiit ah nih peet u. Kho mdek kkhyaang mat jah mat jah nghnim ei shak kkhaia hiit ah nih peet u. Ah nih üng ksim kshaaü nu ah nih mhjuum u. 5 Kona To Sa noh akthum naak mshing naak ah phyeet be tü. Akthum naak kkhyüng kshei noh “Loa” ah ti kah ngjaak. Bük ngüshe ngshe le kah hmuh. Ngshe le ngsum kti sun noh khin bi kti. 6 Kkhyüng kshei kphyüe üng ka-a kthai kah ngjaak. “Kyung kkhui mhnüüp mat ei sun mhnüüp mat ktha kheen vaia thoon kti. Püm sa ta mhnüüp mat ktha kheen sun mhnüüp kthum ei vaia kyak kti. Kshi dung jah ngbom dung käh jah hne käh jah kpyak bä” tilü ah pyen. 7 To Sa noh akphyü naak mshing naak phye lüta akphyü naak kkhyüng kshei noh “Loa” ah ti kah ngjaak. 8 Bük ngüshe ta ngshe mpou kah hmuh. Asun ngsum ktia ngming ta “Thih naak” ni. Mo Pia ngshui kti noh ah läk lo. Asun xooi sun noh kho mdek kphyüa bou nilü hnün mat üng ka kkhyaange sun ksim kshaaü üng ah nih jah hnim naak khoh, kho k'jo, yeh yaai jah moa ka jah mtu man kti kkhyüng kshei kshou üng ah nih jah mthih mkyuk naak khoh-a hiit yah kti xooi. 9 To sa noh amhma naak mshing naak phye lüta khah naak lung päma kkea Pangsiima kkhyü kpyaü lü ah nih shak shia phäh ah nih jah hnima ngmüi mkhyae kah jah hmuh. 10 Asune sun akthai kdäma ngpyaang ktie. “Hiit mah kti Booi Pao, nang hin ngsiim ngsaih kti lü kkhyü shing üng nah vek kti ni. Kei nih-e jah hnim kti kkhyaange jah si jaang lü mtaam nah jah peet vai i vei pi pi hjou ham kkhai ni” ah nih ti u. 11 Kona mat siim mat siim noh shui shak book yah ulü noong vei ah nih jah ngxü shak ham u. I lüni ti ta ah nih-ea kba thih khaam ei kkhai Pangsiima xüh shoh-e Khritjaan be nae am küm ham u. 12 To Sa noh akkhyuk naak mshing naak ah phyeet. Asun üng ta ngkhyü ngshüün lok kkhüt lü kah hmuh. Kho mik sun jih le üng ah nih khüma kba le lok kti. Khya phi thia kba shen lok kti. 13 Kho akhi kkhüt üng kthei dung ngshüün lü aktheih abook loa kba aai shie sun kkhaan khoa kkhyüh kya lok ktie. 14 Kkhaan kho phi sa nglep angtooma kba ngtoom lü khyük ei kti. Kona kho msuung jah tui shonge phi ah nih ve naaka kkhyüh kkhyük ei ktie. 15 Kho mdek shang phuhlange, up kti booie, ngtuk kpoh khonge, booi maange, sho hlaie, kkhyaang la la naküt, mpya naküt khuuia k'uma, lung nua k'aapa ni, msuunga lung nuea kkeh-a ngsüm hü ktie. 16 Ah nih nih-e sun noh msuunge jah lung nue sun jah khü ulü “Kah nih kkhaana kyalo ua. Booi ngoh naak kdäm üng ngshut ktia mik hmaai käh kah nih hmuh vaia jah mshung ua. To Sa-a thüi shei naak üng jah kham ua. 17 Ah nih-a thüi shei naak kho mhnüüp nu phalo hnüh kti ni. U noh khaam ei khoh kkhai ni” tilü nghui ktie.