1 Kkhaan khoa kkhyüh lut lok kti kkhaan kho ngshä kah hmuh. Ah kuta k'uma mthi yüüi nu bilü ksheng khuui kthuuk nu khaih naak khoh nghmon naak khoh-a hiit vek kti. 2 Ah nih noh kkhyü mshim sun ah man ni. Asun hin Shatan yaai pa-a thoon kti ahlaan üng ka kphyu kpyaai kphyüm ni. Kho kum thoong mata phäh ah nih sun mthi yüüi nu üng ah yai-in. 3 Kkhaan kho ngshä noh ah nih sun ksheng khuui kthuuk nua ah kkhyak-in ni. Ksheng khuui kthuuk sun khaai ma lü kshoh üng mshing naak ah taih. Asun üng kkhyü mshim sun noh kho kum thoong mat asuum veia teng pe naküta kkhyaange sun am jah mhleei yah ti. Kona noong vei hlät be kkhai ni. 4 Pangsiim noh si jaang naaka hiit ah jah peeta kkhyaange sun ah nih booi ngoh naaka kkhaana ngshut ulü kah jah hmuh. Booi Jeishüh-a mong ah nih shak shia phäh jah Pangsiima kkhyüa phäh ah nih lu ah nih jah kyüh-ea ngmüi mkhyae phi kah jah hmuh. Ah nih nih-e noh kkhyüng kshei kshou jah ah lup am hjok khah u. Ah nih-a mte naak sun ah nih msa yü am ani üng ah nih kut üng am dou u. Ah nih nih-e sun xüng lo be ulü kho kum thoong mat Khrito mah mah up ktie. 5 Kho kum thoong mat asuum hlaana akse thipääng ktie ta am xüng lobe ham u. Ahin hin aksüka thoh naak be ni. 6 Ahin aksüka thoh naak be üng ngpüi kti ta ngsiim ngsaih lü do kya naak vek kti. Anghngih naak thih naak ah nih nih-ea phäh hiit am ve ti. Ah nih nih-e hin Pangsiim jah Khritoa khotu ngsiima thoon ulü Khrito mah mah kho kum thoong mat up kkhaie.

7 Kho kum thoong mat asuum kona Shatan yaai pa Pangsiim noh ah kyum naaka kkhyüh hlät be kkhai. 8 Ah nih sun sit hü lü kho mdeka kkit kphyüa kkhyüh pe naküt üng ka kkhyaange jah mhleei mhlak kkhai ni. Ah jah mhleei mhlaka kkhyaange sun Kok jah Makoka ngshui kkhaie. Shatan yaai pa noh ngshun ah jah poh püi vai jah ngkhääm shak kkhai. Ah nih nih-e hin mpang lai tui peia lung mdih heena kba nung kkhüt ktie. 9 Ah nih nih-e sun kho mdek naküta lüp lüp ktia lo-ulü ngsiim ngsaih kti kkhyaangea kphung tuk naak jah Pangsiim mhlä kphya nak kti mlüh sun ah nih ngvai u. Lüphi kkhaan khoa kkhyüh mei kyalolü ah nih nih-e sun ah jah uih päih-in ni. 10 Jah mhleei mhlak hü kti Shatan yaai pa sun kaat üng dääi kti meia k'uma ah nih kkhyaak-in u. Asuna mei sun üng kkhyüng kshei kshou jah shahma-a hana ngsom kti phi ah nih jah na-kkhyaak pääng u ni. Ah nih nih-e noh amhnüüp mthan nghläia ngshääi ei ktia mkhuh mhlih khaam ei kkhaie.

11 Booi ngoh naak kdäm abook nu üng ngshut kti mat kah hmuh. Ah nih-a hmaai ma-a kho mdek jah kkhaan kho sen ei kti xooi. Kho mdek jah kkhaan khoa phäh ah nih ve naak vai am ve ti. 12 Thipääng kti kkhyaange akdäm akdiik Booi ngoh naaka ma-a ngdüüi ulü kah jah hmuh. Asun üng sa upe ah nih kphyan lo u. Kona xün naak sa upa ah nih shui sa up mat kphyang lobe tü ulü thi pääng kti naküta poh mshah abäng asuna sa up üng ng'yuk kti. Asuna sa up üng ng'yuk ktia kba Booi Pa noh jah si jaang kti. 13 Thipääng ktie mpang laia kkhyüh lut lok ktie. Mo Pi jah mulai pea ka thi pääng kti lut lok ktie. Mat siim mat siim Booi Pa noh ah nih ve soh poh mshah-a kba jah si jaang kti. 14 Kona thih naak jah Mulai pe phi mei li k'uma kya vaai kti xooi. Asuna mei li ta anghngih naak thih naak ni. 15 Kkhyaang mata ngming xün naak sa up üng am ah nih shuui hmuh-a athoon üng mei lia k'uma ah nih kkhyaak ni.