1 Kona kkhaan kho ngshä kse kkhaan khoa kkhyüh kyum lok kti kah hmuh. Hiit mah bok bok lü ah jou taai üng kho mdek ksääi lok kti. 2 Akthai kdäm üng “Papu Lung mlüh nu pyak pääng ve. Thäü thäüa sim pyak pääng ve. Ah nih hin kho yaaiea ve naaka hnüna thoon hnüh ve. Kho yaai kshou noh ah nih im naak hnüh u ni. Mtuih shek kti meh mai ei kti kkha naküta ngbu tuk naaka thoon hnüh kti ni.” 3 Teng pe naküta ka kkhyaange noh ah boh bah naak sun ju tuia kba mhlim ei päih ktie. Kho mdeka shang phuhlange ah nih-a dä ip päih ktie ni. “Papu Lunga ngshui kti nghnu mi nu noh ngui xüi jah kyäp kti shui shak kpaam ei tong lüta ah nih üng kho mdeka ong pan poh ktie phi ngbüh ngmang lok ktie ni” tilü ngpyaang kti. 4 Kona kkhaan khoa ka kthai akse kah ngjaak be tü. “Kah kkhyaangeo, ahina mlüh kdäma kkhyüh shot hnüh ua. Ah mkhye mshoh naak üng am ngpüi yah u kti. Ah khui kha phi am khaam ei yah u kti. 5 Ah nih-a mkhye mshoh-a ngthoon sun kkhaan kho säpa angthap pha-hnüh kti ni. Ah nih-a bäü hma naak Pangsiim noh shüüm kti ni. 6 Ah nih ning jah peeta kba pe-be ua. Nah nih kkhaana ah poh-a kthaka ahun üng nghngih vei thung ei be ua. Ah nih ning jah tu hlü mtuih shek kti ju tuia kthaka thap nghngih-a kshe hleen ktia tu be ua. 7 Ah päta phäh akdo bok jah ah jou taai naak vai poh ei kti. Asun kba kuunga mkhuh mhlih be ua. Khui kha khaam ei be she. Ah nih noh ‘Kei hin shang phuhlang nua ngoh naak üng kah ngshut kti ni. Kei hin hmeei nu am ni ngü. I tüh-a phi puk shelü am kyap laang ngü’ tilü ah pät noh ah pät ngngaai ei lü nu kkhyap kti. 8 Asuna thoon lü kho mhnüüp mat üng ta am ah shim eia khui kha kshe nu ah kkhaana phalok kkhai ni. Te määng, mboih kyah naak jah kkhyoh ng'yop naak shoong toh kkhai ni. Mei noh phi uui kkhai ni. I a thoon lüni ti ta ah nih üng mtaam pek kti Booi Pa Pangsiim hiit mah bok kti ni.” 9 Ah nih ih om püi ktie jah ah shak sha naak üng ngpüi khoi kti kho mdek shang phuhlange noh ah nih uui kti mei khu hmu-ulü puk shetong lü kyap kkhaie. 10 Ah nih-a khaam ei mkhuh mhlih-a phäh sat ei tong ulü kyüh ei ktie. Akthuuk nua kkhyüh ngdüüi ulü “A i nu ni! Nghaai kti ni eei, mlüh kdämo! Papu Lung mlüh kdämo, jou taai mah kti mlüh-o! Ahunata Pangsiima mtaam phalo ve” tilü ngpyaang ktie. 11 Kho mdeka ong poh ktie ah nih-a phäh puk shelü mbooi kyap kkhaie. I lüni ti ta kyäp shok lü do bä kti ah nih-ea külak sun u noh phi am kkhyäi ti u. 12 Ah nih ngui xüi, lung phu kküüi, pule ksüüm, jih book, ngkyoh paai shen jih, pu khyeng jih, shen hnou jih, thing ng'uui am mjü mjü, mpui ha üng ah nih pyaan külake, thing phu kküüi, ke, mthi, lung book üng ah nih pyaan külake u noh phi am jah kkhyäi ti. 13 Vakok mbäih, Kala Vuih, ang'uui Mürah jah Phan Kinsenga ah nih shuia ng'uui ktia thing hnah, ngbom tui, kshi tui, kyung kkhaai, she shang, to, ngshe, ngshe nghleeng, mpyae, kkhyaangea shak phi u noh phi am jah kkhyäi ti u. 14 Asuna ong poh kti kkhyaange sun noh boh bah kti nghnu mi üng “Nang noh nah jah kpaam ei, do kti jah ngbüh ktie nah veeia kkhyüh khyük päih hnüh ve. Aphu küüi kti khoh hat jah nah jou taai naak shot hnüh kti ni. I tüh-a phi am hmuti laang kti” tilü ah nih pyen u. 15 Boh bah kti nghnu mia veeia ahina külake jah jooi lü sääng taai lok kti ong poh ktie sun akthuuk nua ngdüüi ulü mkhuh mhlih ah khaama phäh sat ei tong ulü kyüh ei ktie. Puk shelü mbooi kyap ktie. 16 Ah nih nih-e noh “A i nu ni eei! Nghaai kti ni eei! Mlüh kdämo! Anghläia shui shak book akdo nu, shen hnou jih, ngkyoh paai shen shui shak jah shui shak kti lü xüi jah lung phu kküüi, pule ksüüm üng ah nih pyaan lu keh, ngmou, nghnga kkaai, kut süp jah kthe kho hah pa nah ooi hnakhoi kti. 17 Küm seei kti nah booi maang naak ahnunata khyük päih hnüh khü” tilü pyen kkhaie ni. Mhlüüi kdäm üng khong mang poh ktie jah mhlüüi kdäm üng sit hü kti naküt, mhlüüi kdäm üng khuut poh kti abäng, mpang lai lam üng ong pan poh ktia kkhyaange naküt phi akthuuk nua ngdüüi kkhaie. 18 Mlüh kdäm uui kti mei khu hmu-ulü “Ahina mlüh nu teh mlüh am vekhoi” tilü mbooi kyap ktie. 19 Ah nih puk sheeta ngshing ngte naaka mput khuh ulü puk shetong lü kyap ktie. “A i nu ni eei! Nghaai kti ni eei! Mlüh kdämo! Nah booi maang naak üng mpang laia mhlüüi kdäm ka mah-e phi sääng taai ktie ni. Ahunata sim pyak-in vek kti” tilü ngpyaang ktie. 20 Pangsiim üng shääng ei kti noh ta “Kkhaan khoa vek ktieo, ah nih-a phäh xe na-a. Ngsiim ngsaih kti kkhyaangeo, ngshäeo, shahma ngsiimeo je kyai ua. Ahina nghnu mi noh ah ning jah mkhuh mhlih-a phäh Pangsiim noh ah nih sun mtaam ah peet pääng ni” ah nih ti u. 21 Kona hiit mah kti kkhaan kho ngshä noh lung kdäm nu hooi lü mpang laia ah kkhyaak-in ni. “Asun kba akdeen kuunga Pangsiim noh Papu Lung mlüh nu kkhya-in kkhai ni. Ah nih sun i tüh-a phi am nghmuh ti. 22 Khing khong nu tum kthai, ng'äi msuh kthai, leng la tum kthai, kpuung tum kthai i tüh-a phi am ng'yüng loti. Amjü kküm üng mjung mah ktie phi i tüh-a phi nah veeia kkhyüh am ngdang loti u. Kyung, saang, yeh naak lung nua kthai i tüh-a phi nah veeia kkhyüh am nglaüh loti. 23 Nang mlüh nua k'uma mei phäih-a kvaai i tüh-a phi am pou lo ti. Sa ngla jah sa ngla ngküh ktia kthai phi i tüh-a phi nah veeia kkhyüh am ngja-ti u. Nah ong poh ktie hin ahina kho mdeka booie ni. Nanga phun kam noh teng pe naküt lam hmü shak kti ni.” 24 Ahina mlüh-a shahma ngsiim jah ngsiim ngsaih kti kkhyaange, kho mdeka ah nih jah hnim naküta thi nghmuh kti ni.