8
1 Asuna thoon lü Booi Jeishüh Khrito üng nglooi ei lü vek ktie Pangsiim noh mkhye naaka mtaam am jah peti.
2 Mkhyangsiima hiit noh Khrito üng nglooi ei naaka shak jah pek kti. Ahina Mkhyangsiima hiit noh mkhye naaka thuum jah thih naaka thuum üng nah lät shak kti ni.
3 Nih kkhyaang sae ktha ngseek lü thuum noh käh ah jah poh peet khoh sun Pangsiim noh ah jah poh peet ni. I hok kba ni ti ta Pangsiim noh ah sa kpa mat däk sun mkhye poh khoh kti kkhyaanga puum sha mlung kko joong pan üng kho mdek kkhaana ah tüih lo ni. Kkhyaangea mlung lo mkhye mshoh ah ksim kpyak naak vai phäh Pangsiim noh ah sa kpa-a puum sha sun khah naaka ah thoon shak ni.
4 Pangsiim noh asun kba i vai ah poh ni ti ta kkhyaanga mlung loa kba käh xüng ti lü Mkhyangsiima hlü eia kba xüng shei naküt kti hin Pangsiima thuuma kba küm seei lü ngpyuun vaia phäh ni.
5 I lüni ti ta mlung loa kba xüng shei naküt ktie hin kho mdek üng shääng ei kti kpaam ei vai kking ni ah nih su ngngaih u. Mkhyangsiima lam mshüüma xüng sheei naküt kti noh ta Mkhyangsiima hlü ei kking ni ah nih su ngngaih u.
6 Mlung lo üng shääng ei kti kking sun ah mlung üng ksep kyet kti noh thih naak ni ah hmuh kom. Mkhyangsiima hlü ei kking ksep kyet kti noh shak jah diim deih naak yah kkhai.
7 Ah mlung loa upa kkhyaang hin Pangsiima yea thoon kti. I lüni ti ta Pangsiima kkhyü sun am ksang na. Aksanga ta Pangsiima ti pyen sun am ksang na-khoh kuung.
8 Mlung lo läk ktie noh Pangsiima hlü ei am poh thei u.
9 Nang nih-e ta mlung loa kba am ve u kti. Mkhyangsiima lam mshüüma kba nah nih vek ktie ni. Asuna thea Pangsiima Mkhyangsiim nah nih k'uma vek kti. Khritoa Mkhyangsiim am yah kti ta Khrito üng am shääng ei.
10 Khrito nang üng xüng lüphi puum sha ta mkhyea phäh thi-yah kkhai ni. Nikyo lüphi nang nih-e hin Pangsiim üng ng'ye be u kti lü nah nih ngmüi mkhya ta anghläia xüng shei kkhai.
11 Booi Pa Jeishüh thih naaka kkhyüh thoh shak be kti Pangsiima Mkhyangsiim nah nih k'uma vek kti. Asuna thoon lü Khrito thih naaka kkhyüh thoh shak be kti Pangsiim noh nah nih k'uma vek kti ah Mkhyangsiim üng thi-khoh kti nah nih puum sha sun üng shak pek kkhai ni.
12 Kah be naeo, asuna thoon lü mlung loa kba nih ve soh ti vai u am hlü.
13 I lüni ti ta mlung loa kba nah nih ve soh u ta nah nih thik kkhaiea kyak kti. Lüphi Mkhyangsiim üng mkhye sun ngnääng lü mkhye am nah nih poh ti ta nah nih xüng kkhaie ni.
14 Pangsiima Mkhyangsiim noh lam ah mshüüm läk naküt kti hin Pangsiima sa na ni.
15 Pangsiima ning jah peet Mkhyangsiim noh mpya-a ning jah thoon shak lü ning jah kyüh ei shak kti am ni. Mkhyangsiim noh Pangsiima sa na-a ning jah thoon shak kti. Mkhyangsiima kpüi kpak naak üng “Kah pa-ääi, paai long ääi” tilü Pangsiim nih khü ktie ni.
16 Mkhyangsiim hin nih ngmüi mkhya üng ngpüi lü Pangsiima sa-a nih thoon kti atia shak shi kti.
17 Pangsiima sa-a nih thoon u ta khoh kshäänga phi nih thoon ktie ni. Khrito mah mah khui kha mpyeen sheet nih khaam yüm u ta ah nih-a dä khoh kshäänga nih thoon ulü ah jou taai naak üng phi nih ngpüi kkhaie ni.
18 Tuh-a nih khaam ei u khui kha mpyeen sheet hin ta Pangsiim noh nih nih-e üng angshing ngte lo shak vai ah jou taai üng mshuui msäp vai ngtu ta am ni tia kei noh kah ngngaai kti.
19 Pangsiima ah mhnün mseng naküt noh Pangsiima saea ah nih ngshing ngte lo vai sun yüng ei mnü lü mtäh ei ktie.
20 I lüni ti ta Pangsiima mhnün mseng naküt shum ei vaia am do lo päih. Mhnün mseng ta asun kba thoon ei lohlük kti am ni. Pangsiima hlü ei ni. Asuna kya lüphi ääp ei naak ta veham kti.
21 Asuna ääp ei naak ta sim pyak naak thuuma kkhyüh lät lang lü Pangsiima sae mah mah jou taai mah kti lät naak üng ah ngpüi vaia ni.
22 Tuh vei säpa ah mhnün mseng naküt hin na hmi hlük kti nghnu mia kkhyüng ksooi ah mshoh eia kba mshou ei lü ngkou nghleei-in kti ni tilü nih kshing ktie ni.
23 Pangsiima mhnün mseng noh ahin kba ah mtäh ei däk am ni. Nih nih-e üng aksük süka ktheih-a kba Mkhyangsiim nih yah ei ktie phi nih ngkou nghleei-in ktie ni. Pangsiim noh ah sa ksanga ah jah msoon vai jah puum sha kthaai ah jah peet vai sun nih yüng ei ktie ni.
24 I lüni ti ta asuna ääp ei naaka phäh Pangsiim noh jah kuum kyan kti. Nih mik üng nih hmuh yah hin ta ääp ei vai am ni. Nih hmuh yah ta u noh ääp ei kkhai ni.
25 Am nih hmuh yah nih ääp ei ta mlung mshaaü lü nih mtäh ei kti.
26 Asun kba ni Mkhyangsiim noh nih nih-ea ktha ngseek naak üng jah kpüi kpak kti. I lüni ti ta i hok kba tä sham vai sun am nih kshing u. Mkhyangsiim noh ta nih kkhyü nglung üng am nih pyen khoh-a ngkou nghleei naak üng nih ksah ua Pangsiim nghui nak kti.
27 Pangsiim noh kkhyaanga mlung k'um hmulü Mkhyangsiima ti hlü phi kshing kti ni. I lüni ti ta Mkhyangsiim noh Pangsiima hlü eia kba ah kkhyaangea phäh tä sham kti.
28 Pangsiim kphya nak ktie jah ah tüüma kba ah jah khüa kkhyaang naküta phäh shoong toh abäng naküt hin akdo bok vaia Pangsiim noh ah jah poh peet ni, atia nih kshing ktie.
29 Jum ei lok kkhaie sun ah nakshing lü ah sa kpa-a lup leeia kba ah nih thoon lo vaia ah jah msoon ni. Asun kba hnuun püi kho hah-ea kshuunga aksüka hmi loma kti sa kpa athoon vaia phäh ni.
30 Pangsiim noh ah jah namsoona kkhyaange sun ah jah khü ni. Ah jah khü naküte sun phi ah jah ng'ye püi be ni. Ah jah ng'ye püi be-e sun phi ah jou taai üng ah jah ngpüi shak ni.
31 Asun kba ani ta i ni ti ham kkhaie ni. Pangsiim nih nih da ah ngtung ta u noh jah kpet mjak khoh kkhai ni.
32 Pangsiim noh ah sa kpa mat däk käh kpaam ei lü nih bängea phäh thik kkhaia ah ap ni. Pangsiim noh nih phäh-a ah sa kpa ah jah peeta athoon ta ah sa kpa mah mah abäng naküt sun jah yet kkhai ni.
33 Asun kba ani ta Pangsiima jah xü kse-e sun u noh jah kbäü ei khoh kkhai ja. Pangsiim kuung noh ah jah ngpyuun shak ni.
34 Pangsiima kkhyaange sun u noh mkhyea phäh mtaam jah pe-khoh kkhai ni. Booi Jeishüh Khrito ah thih däk käh tan ktia Pangsiim noh ah thoh shak be ni. Tuh hi Pangsiima kkheet lama ngshut lü nih nih-ea phäh jah tä sham peet kti.
35 Asun kba ani ta u noh Booi Jeishüh Khritoa mhlä kphya naaka kkhyüh jah ngkya shak kkhai ni. Khui kha mpyeen sheet, mkhuh mhlih, ei nghmüh ook mkhyeh, shui kpum shak kko, kyüh kshe, li ksim naküte noh phi Khritoa mhlä kphya naak üng jah ngkya shak khoh kkhaieo.
36 Sangsiim üng ang'yuka kba “Nang Pangsiima phäh jah hnim hlü ulü amhnüüp mata kah nih kyüh ei ktie. Jah hnim vaia ah nih jah seh püi toea kba ah nih jah ngngaih u ni” tilü vek kti.
37 Lüphi ahine abängea kshuunga jah kphya nak kti Khrito üng küm seei ktia kah nih ngnääng ktie ni.
38-39 I lüni ti ta thih naak ni, xün naak ni, kkhaan kho ngshäe, kho yaaiea khonge ni, tuh-a ksüün üng thoon ve jah ngooia thoon vek kkhai noh phi nishe, kkhaan khoa kae, kho mdeka kkea kae, ah jah mhnün mseng abäng üng ka mat laang noh phi nih nih-ea Booi Jeishüh Khrito üng nih yah eia Pangsiima mhlä kphya naak üng am jah ngkya shak khoh u atia kah k'üp ei kti ni.