3
1 Asuna athoon ta Jüdah kkhyaange hin kkhyaang mjü kse-ea kthaka sääng naak bok vek kkhaio. Puum sha üng vun moih khaam ei hin ado naak vek kti mä.
2 Aksanga ta sääng naak jah do naak amjü mjü vek kti. Aksüka Pangsiim noh Jüdah mjüe üng ah kkhyü sun ah jah peet.
3 Jüdah mjü akhäke ta kkhyü shing üng am vek ktie, am ni bä. Asun kba ani ta “Pangsiim phi Jüdah mjüea kkhaana kkhyü shing am ve” nih ti khoh ktio.
4 Am ni laang kuung. Kkhyaang naküt hleei hlak lüphi Pangsiim ta aksanga thoon kti ni. Sangsiim üng ng'yuk hüt kti ta “Pangsiimo, nah pyen tä lü nah sang kti ati sun kkhyaang naküt noh kshing lok kkhaie ni. Ah nih nih-e noh nang Pangsiim ah nih ning kbäü ei u üng nah ngnääng kkhai ni” tilü vek kti.
5 Lüphi nih nih-ea mkhyea phäh Pangsiima ngpyuun naak ah pou lo bok ta i hok kba vai ni. “Asun kba ani ta mkhye naaka kheen mtaam ah jah peet hin Pangsiim bäü kti ni” nih ti khoh ktieo. Ahin kei noh kkhyaanga ngngaih-a kba kah pyen ni.
6 Am ni laang kuung. Pangsiim am ah ngpyuun ta ahina kho mdek kkhyaange i hok kba jah si jaang khoh kkhai ja.
7 Lüphi akkhye kah poh-a phäh-a Pangsiima kkhyü shing küm seei lolü ah jou taai naak angshing ngte lo bok ta i lü Pangsiim noh mkhye ktia kba mtaam nah pe-ham kti ni.
8 “Akdo sun angshing ngte lo bok vaia mkhye poh phyak kti, am ni bä” ti-ulü kkhyaang akhäke noh kei nih-ea mong pyen hü ulü jah thang msheet ei ktie. Asuna kkhyaange Pangsiim noh mtaam ah jah peet vai hin looi ngkäih kti ni.
9 Asun kba ani ta nih nih Jüdah mjüe hin amjü kse-ea kthaka nih do ei naak u vek kkhaio. Am ve laang. Kah ning jah msuuk mtheh pääng ua kba Jüdah mjü jah amjü kse ah nih nghngih hin mkhyea hiit noh jah up kti.
10 Sangsiim üng ng'yuk kti ta,
“Kkhyaang mat sa hngoh phi am ngpyuun.
11 Pangsiim ngja-kya kti jah kshing hmat hlük kti mat laang phi am ve.
12 Ah nih bäng nglat be ulü lam hmü ktie. Ah nih bäng i a am suh kyak ktia thoon lok ktie. Akdo poh kti mat phi am ve.
13 Ah nih mpyong üng kkhyaang jah msim kpyak ulü ah nih mpyong hin thih naaka khuui üng täng kti ni. Ah nih ngthuh ei naküt üng hleei hlak ni ah nih mhluh lo u. Asuna thoon lü ah nih mlei kphyu kphyaai mkyüüma ha shik üng atäng ni.
14 Kkheih na-phyak ktia ngshe ngsham kking ni ah nih pyen u.
15 Kkhyaang ah nih hnim naak vai jah ah nih huui mhleei ei shak vaia ni ah nih kho phi ajaang hü.
16 Ah nih pha naak hü naküta kkhyaang ksim kpyak mkhuh mhlih ktie.
17 Pangsiim jah ah nih püi üng ah nih ng'ye vaia poh vai am hmat u.
18 Pangsiim käh kyüh laang lü vek ktie.”
19 Pangsiima thuum naküt hin asuna thuum üng shääng ei ktiea phäh däka thoon kti ati sun nih kshing ktie. Tuh-a ta Pangsiim noh kho mdek kkhyaang sa abäng jah si jaang kkhaia thoon lü u laang phi Pangsiima ma-a ngsiim ktia am nih thoon khoh u.
20 Thuuma kba nih vea phäh u phi Pangsiima hmuh-a am nih ngpyuun khoh. I lüni ti ta thuum hin kkhyaang noh päta mkhye kshing naak vaia thoon kti ni.
21 Tuh hi ta Pangsiim üng i hok kba kkhyaang sa ng'ye be vai ati sun ngshing ngte lohnüh kti ni. Ahin hin thuum üng am shääng laang. Thuum jah shahma ngsiimea yuk hüt Sangsiim hin Pangsiim noh ah jah poh peet ng'ye naaka shak shi ni.
22 Asun hin i ni. Booi Jeishüh Khrito jum eia phäh Pangsiim üng ng'ye naak be ni. Ngkhoi ngkhya naak am vek ktia thoon lü jum ei kti abänga phäh-a kyak kti.
23 Kkhyaang naküt noh mkhye nih poh ulü jou taai mah kti Pangsiim üng nih thuuk päih ktie.
24 Lüphi Pangsiim noh ah jah yeta bä naaka phäh ah nih üng nih ng'ye be ktie. Asun hin jah shuut phyam be kti Booi Jeishüh Khrito üng thoon lok kti ni.
25 I lüni ti ta Pangsiim noh nih mkhye ua phäh Booi Jeishüh Khrito sun khah naaka ah thoon shak ni. Booi Jeishüh Khrito ah thih naak jah ah thia loon loa phäh ah nih jum ei naküt ktie sun mkhye mhlät naak yah ktie. Asun kba Pangsiim noh ah ngpyuun naak ah jah mhnüh ni. Ahlaan üng ta kkhyaanga mkhye sun jah non ei lü am jah kshü kset ham.
26 Tuh hi ta Pangsiim ngpyuun kti ati sun jah mhnüh lü Khrito jum ei naküt ktie sun jah ng'ye püi be kti.
27 Asun kba ani ta i nih sam sah naak vai vek kkhai ni. I laang phi am ve. I lü sam sah naak vai am vek kti ja. Pangsiima thuuma kba nih ve ua phäh mä. Am ni. Nih jum eia phäh-a thoon lü sam sah naak vai am vek kti ni.
28 I lüni ti ta thuuma kba ve soh-a phäh ngpyuun ktia thoon lok kti am ni. Booi Jeishüh jum eia phäh ni ngpyuun ktia thoon lok kti ati sun nih k'üp ei ktie.
29 Pangsiim hin Jüdah kkhyaangea Pangsiim däka thoon ktio. Amjü kse-ea Pangsiima ta am thoon kti bä. Thoon kti ni. Amjü kse-ea Pangsiima phi kyak kti ni.
30 Pangsiim mat däka thoon lü vun moih khaam ei kti Jüdah-e sun ah nih jum eia kba jah ng'ye püi be kkhai. Amjü kse-e phi ah nih jum eia phäh üng jah ng'ye püi be kkhai.
31 Asun kba ani ta ahin jum ei naak üng Pangsiima thuum sun nih not-in, am ni bä. Am ni laang. Thuum sun ah nih-a hnün üng ta-u ngüshe kah nih ngkhääng shak u ni.