11
1 “Asun kba ani ta Pangsiim noh ah shääng van Isare mjüe sun ah jah hoih-ino” tilü kah ngthäh hlü kti ni. Asun kba am ni laang. Kah pät kuung hin Isare kkhyaanga thoon ngüshe Apyahama mjü mjoong, kei Ben Jaming shaang üng ka ni.
2 Pangsiim noh aksüka kkhyüh ah jah xü ah kkhyaange sun am jah hoih. Shahma ngsiim Eilijah noh Isare mjüe jah kbäü ei lü Pangsiim noh mtaam ah jah peet vaia nghui nak kti atia Sangsiim üng ng'yuk kti sun nah nih kshing ktie am ni bä.
3 Shahma ngsiim Eilijah noh “Booi Pao, ah nih nih-e hin noh nang Booi Pa-a shahma ngsiime jah hnim ktie ni. Khah naak lung päm phi ah nih jah phyeet phyat päih u ni. Kah pät däk sa kah ngseih lok kti phi nah hnim hlüham ktie ni” ah ti.
4 Pangsiim noh i hok kba mshak be kti ni ti ta “Kah päta phäh-a kkhyaang thoong kkhyüh Palaam mhnam am hjok khah ktie kah jah mseih ni” ah ti.
5 Asun kba ni tuh hi phi Pangsiim noh bä naak üng ah jah xü kkhyaange akhäk ah jah mseih ham ni.
6 Ah nih ve soh poh mshah-a phäh ah jah xü am ni. Pangsiim noh ah bä naak üng ah jah xü ni. Ah nih poh mshah ve soh-a phäh ah jah xü ta bä naak hin bä naak ksang am ni.
7 Asun kba ani ta i hok kba vai ni. Isare mjüe noh ah nih shui hjap sun am hmu-u. Pangsiim noh ah jah xü alääm sa noh ni ah nih hmuh u. Asuna thea abänge hin mlung kka ngngaih kka päih ktie ni.
8 Sangsiim üng ang'yuka kba “Pangsiim noh ah jah nghmoong shak ni. Asuna phäh tuh vei hia ah nih mik velü phi am hmu-u. Ah nih nghnga ve-lüphi am ngja-u” tilü vek kti.
9 Shang phuhlang Davit noh ah pyen ta “Pooi pyang ah nih poh hin ah nih pätea ngshun ng'oh naak vai msut kshoua thoon she. Ngpä tong-in lü mtaam khaam ei u she.
10 I käh hmuti onga ah nih mik mü ei she. Anghläia ngnoi ngsai ulü ah nih kkhyüng ngkhun ei she” ah ti.
11 Asun kba ani ta Jüdah kkhyaange hin ngshuk ei ulü käh thou lobe khoh ti onga ngpä ktieo. Am ni laang. Ah nih mkhye ua phäh amjü kse noh thoong khyah naak yah ei ktie. Asuna phäh ngkeei ngku ktiea Pangsiim noh ah jah thoon shak ni.
12 Jüdah kkhyaangea mkhyea phäh kho mdek kkhyaange noh do kya naak yah ei ktie. Ah nih shum koon naak hin amjü ksea do naaka thoon kti. Asun kba Jüdah kkhyaang abäng phi thoong khyah naak üng ah nih ngpüi lo u ta Pangsiim noh ah jah peet do kya naak hin däm duh lobok bok kkhai ni.
13 Nang nih amjü kse-e tuh kah ning jah ngthuh ei püi kti ni. Pangsiim noh amjü kse-ea phäh ngshäa nah msoon lü kah khuut ma sun kah mküüi mkhyah do kya shak kti.
14 Asuna phäh keia kkhyaang mjü Jüdah-e sun ngkeei ngku lo-ulü akhäk noh kuum kyan naak yah to kkhaiea kah ngngaai kti ni.
15 Pangsiim noh Jüdah kkhyaange ah jah hoih ma hin kho mdek kkhyaang sae Pangsiim üng ah nih ng'ye naak lobea thoon kti. Pangsiim noh Jüdah kkhyaange ah jah dou daan be ta thipääng ktie ah nih thoh be üng täng hnüh kti ni.
16 Aksüka ng'aat ei ma kti ksaak kthaai üng poh kkhaai kpeh Pangsiim üng nih peet ta asuna kum üng ng'aat ei kti üng ka kkhaai kpeh abäng Pangsiima ka ni. Pangsiim noh thinga pya ah ka naak ta thinga ngbaane phi ah jah ka naak päih ni.
17 Kshi dunga ngbaan akhäk bät lü ah nih-a hnün üng mo kshi dunga ngbaan ah nih mshu be ta mo kshi dunga ngbaan hin kshi dunga ngbaana thoon lolü kshi dunga pya-a kkhyüh phü be ei ktia ei o yah kti. Nang nih amjü kse-e hin ahina mo kshi dunga ngbaan üng nah nih täng ktie ni.
18 Bät kti angbaana kba Pangsiim noh ah jah hoih Jüdah mjüe sun käh jah mkeei mshong u bä. Nah nih sam sah vai am looi ngkäih. Apya hin angbaan üng ngphun ei kti am ni. Angbaan ni apya üng ah ngphun eia ati sun kshing ua.
19 Asuna thoon lü “Nih ngshu naak vai hnün ave vaia phäh angbaan bät kti” atia nah nih pyen hlük kkhaie ni.
20 Aksang ni. Angbaan ng'yong bät lüta kkhyaange noh ah nih jah xot kpyaai-ina kba am jum ei ulüta Pangsiim noh ah jah hoih ni. Lüphi nang nih-e hin noh nang nih jum eia phäh üng ngshu be kti angbaana kba nah nih thoon ktie ni. Asuna thoon lü käh sam sah lü Pangsiim kyüh lü ve ua.
21 Kshi dunga ngbaan ksang üng täng kti Jüdah-e hin Pangsiima mtaam üng am hlät khoh u. Nang nih-e phi ning jah mhlät kkhaia käh ngngaai ei u bä.
22 Pangsiima bä naak jah ah jah him pheek naak mlung ah kko bük ngngaai ua. Ah jah him pheek naaka mlung kko üng Pangsiim noh mkhye ktie sun mtaam jah pek kti ni. Nang nih-ea phäh ta Pangsiima bä naak vek kti ni. Ah bä naak üng ngphun ei lä ua. Asun kba am ani ta nang nih-e phi ning hoih kkhaie ni.
23 Jüdah kkhyaange ngthu nghlai be ulü ah nih jum ei lo u ta ahlaan üng ah nih ve naaka hnün üng jah ta-be kkhai ni. Pangsiim noh ah jah taak be vaia khyaih khoh kti.
24 Nang nih amjü kse-e ta mo kshi dunga kkhyüh ah nih kkyüh-a ngbaan üng nah nih täng ktie ni. Kshi dung kdo üng ah nih mshu bea ngbaan üng nah nih täng ktie. Kshi dung kdoa kkhyüh ah nih kkyüh angbaan kuung sun ah nih mshu be vai jä bok kkhai ni.
25 Kah be naeo, ngthup ktia mong mat kah nih ning jah ngja-kya hlü shak ktie ni. Nang nih-e noh asun nah nih kshing u ta “Kah theem kti” tia am ngngaai ti u kti. Asuna ngthup kti ta Jüdah kkhyaange hin anghläia ta mlung kka ngngaih kka kkhaie am ni. Amjü kse üng kae jum ei lok kkhaie sun ah nih suum lo u säpa ni ah nih mlung kka ngngaih kka kom u.
26 Asun üng ta Isare mjü abäng noh thoong khyah naak yah kkhaie. Sangsiim üng ang'yuka kba “Shion mlüh-a kkhyüh kuum kyan kti Booi Pa lok kkhai ni. Jakopa mjü mjoonga shou shat naküt jah hooi liim peet kkhai ni.
27 Ah nih mkhye naküt kah jah msiim peet üng ta ah nih nih-e üng ngkhaam ei naak be khüt kah jah poh püi kkhai ni” tilü vek kti.
28 Jüdah-e noh thang kdo kya ah nih kpeta phäh Pangsiima yea thoon lok ktie ni. Asun hin nang nih amjü kse-ea phäh do naaka thoon lok kti. Lüphi ah jah xü ksea thoon lü ah nih mah pookea mik hmaai üng Pangsiim noh ah jah kphya naak ni.
29 I lüni ti ta Pangsiim noh kkhyaang mat sun xü lü do kya naak ah peet hlü ta Pangsiim noh ah mlung am nghlai ti.
30 Nang nih amjü kse-e noh ahlaan üng ta Pangsiima ti pyen am ksang na-u kti. Tuh ta Jüdah-e noh Pangsiima ti pyen am ah nih ksang naaka phäh nang nih-e Pangsiim noh ah ning jah mpyeen ei ni.
31 Pangsiim noh ahin kba ning jah mpyeen ei lü Jüdah kkhyaange noh tuh k'um üng Pangsiima ti pyen am ksang na-u. Asun hin Pangsiim noh Jüdah kkhyaange phi ah jah mpyeen ei naak vaia phäh ni.
32 I lüni ti ta Pangsiim noh kkhyaange abäng sun ah jah mpyeen ei be vai jah mkhye naak noh ah jah up vaia ah jah hoih ni.
33 Pangsiima theem ngvaai naak hin küm seei kkhüt lü thuuk lü hlüng kti ni. Pangsiima si jaang sun kkhyaange noh am hmusu ngja-kya khoh u. Ah nüt yaan sun am dang yah u.
34 Sangsiim üng ang'yuka kba “Booi Pa-a su ngngaih sun u noh kshing khoh kkhai ni. U noh Pangsiim sun lu mhlang khoh kkhai ni.
35 Pangsiim noh ah jah thung be vaia u noh Pangsiim üng i yet ma kti ni” tilü vek kti.
36 Pangsiim noh ni akve luum ah mhnün mseng ta. Akve naküt hin Pangsiima hiit üng vesoh khoh lü abäng naküt hin Pangsiima jou taaia ngte naak vai thoon vek ktie ni. Pangsiim angshääia mküüi mtou u-she. Amen.