ROMAH-E
Polüh noh Romah mlüh shaang üng ah kbia sa
1
1 Kei Polüh hin Booi Jeishüh-a xüh shoh-a thoon ngüshe Pangsiim noh ngshäa nah msoon lü thang kdo kkya kpyaü kkhaia ah nah xüh ni.
2 Ahlaan nu üng Pangsiim noh shahma ngsiime üng thang kdo kkya-a mong kkhyü taam ah jah peet. Asun Sangsiim üng ah jah yuk shak ni.
3 Asuna thang kdo kkya sun Pangsiima sa nih nih-ea Booi Pa Khritoa mong ni. Ah nih hin nghngi siima thoon lolü shang phuhlang Davita mjüa kkhyüh kyum lok kti ni.
4 Kona thih naaka kkhyüh ah thoh naak be üng Pangsiim noh hiit mah kti ah sa-a Mkhyangsiim üng ah ngte shak ni.
5 Ahina Booi Jeishüh üng bä naak yah ei u ngüshe Pangsiim noh ngshäa ah jah msoon ni. Asun hin Pangsiim am kshing ham kti kkhyaang mjü kse abäng noh Pangsiim jum lo-ulü ah ti pyen ksang na lo-ulü Booi Jeishüh-a jou taai ngshing ngte naak vaia phäh ni.
6 Nang nih-e hin kkhyaang mjü kse-e üng ngpüi kyo u kti lüphi tuh ta Khrito üng nah nih shääng ei vai ua Pangsiim noh ah ning jah khü ni.
7 Kei Polüh noh Romah mlüh-a vek kti Pangsiima kphya naake jah ah kkhyaang ngsiime abäng üng sa kah ning jah yuk lok kti ni. Nih nih-ea Pa Pangsiima bä naak jah nih nih-ea Booi Jeishüh Khritoa diim deih naak nang nih-e üng ayüma veshe.
8 Aksüka nang nih-ea phäh Booi Jeishüh üng kah Pangsiim sun kah je ei kti ni. I lüni ti ta nang nih-ea jum ei naak sun kho mdek abäng üng ah nih ngjaak hü päih u ni.
9 Nang nih-ea phäh ngshääi ei ktia kah ning jah tä sham peet kti ni. Keia kah pyen hin aksang ani ta Pangsiim hin keia shak shi ni. Ahin Pangsiima khuut sun mlung kko ksang üng poh ngüshe ah sa Jeishüh-a mong thang kdo kkya sun kah kpyaü kti ni.
10 Pangsiima hlü eia kba nah nih veeia kah pha lo hnüh ngaih vaia kah tä sham kti ni.
11 I lüni ti ta kah ning jah hmuhlü kkhüt ktie. Kei üng Mkhyangsiim noh ah nah peet bä naak sun kah ning jah yah ei hlü shak ktie. Asun hin nah nih jum ei naak angkhääng lo bok bok vaia phäh ni.
12 Asun üng mat jah mat nih jum ei naak üng ktha nih pe-khoh kti.
13 Kah püieo, nah nih veeia kah lo vaia anghläia kah ngpyaih xat kyo kti. Nah msü kpya kti kking velü am kah lo-hlot kti ati sun kah ning jah kshing hlü shak kti. Akhäk kkhyaang mjü kse-ea veeia kba nang nih-ea veeia phi jum ei ktie nung lo vaia kah yü naak ni.
14 Pangsiim noh Kärih mjü, amjü kse-e, aktheeme, anghmoonge abängea phäh mta ah nah peet ni.
15 Asuna thoon lü nang nih Romah mlüh-a kaea veei phi thang kdo kkya kah kpyaü hlük kkhüt kti ni.
16 Kei hin Khritoa thang kdo kkya-a phäh am ngke ei laang ngü. I lüni ti ta thang kdo kkya hin jum ei naküt kti sun jah kuum kyan kti Pangsiima hiit ni. Aksüka Jüdah-ea phäh thoon lü kona kkhyaang mjü kse-ea phäh phi thoon lok kti ni.
17 Pangsiim noh kkhyaang üng ah jah peeta ngpyuun naak sun thang kdo kkya üng nih kshing lok ktie. Ahina ngpyuun naak sun jum ei naküt kti noh ah jum ei naak üng yah kti ni. Sangsiim üng ang'yuka kba “Jum ei naak üng ngpyuun lok ktia kkhyaang ta xüng shei yah kkhai” tilü vek kti.
18 Pangsiim kpet mjak ktie, thuum lüüm kkaan ktie hin noh ah nih mkhye naak üng Pangsiima kkhyü ksang sun shung kham ktie ni. Ahine abängea kkhaana Pangsiim thüi shei kti ati sun kkhaan khoa kkhyüh ah jah mhnüh.
19 Pangsiim noh i lü mtaam ah jah peet ni ti ta kkhyaange noh Pangsiima mong ah nih kshing naak khoh sun ngte kyo kti. Pangsiim apät kuung noh asun ah jah mhnüh ni.
20 I lüni ti ta kho mdek ah mhnün msenga kkhyüh kkhyaang noh am nih hmuh khoh-a Pangsiima khyaih naak khoh ngshing ngte lok kti ni. I hok kba ni ti ta ah piit pyaange sun nih bük lü Pangsiima angshääia vek kti ahiit ni, ah pät däk Pangsiima thoon kti ati sun hmukhoh ktie. Asuna thoon lü i hok kba phi am ngsiim khoh u.
21 Kkhyaange noh Pangsiima mong kshing kyo ulüphi Pangsiima kba looi ngkäih ktia am hjok khah u. Pangsiim sun am je ei u. Asuna thoon lü ah nih su ngngaih nghmoong lolü ah nih mlung nghmüp lok kti ni.
22 Kah ngvaai kti tia ngngaai ei ulü anghmoonga thoon lok ktie.
23 I hok kba phi am sim pyak khoh kkhaia Pangsiima jou taai sun mhnama lup üng ah nih hlai ei u ni. Thi-be kkhaia kkhyaang, kkhyüng kshei, kphyu kkhaea lupa kba mhnama lup msom ktie ni.
24 Asuna phäh Pangsiim noh ah jah hoih ni. Am do kti ah nih kpaam ei ah jah läk shak ni. Mat jah mat ngke ei na-phyak ktia mkhye ah nih poh vaia ah jah hoih-in ni.
25 Pangsiima mong ksang sun jum ei vaia ksah-a hleei hlak, i am nik kti sun ah nih jum u ni. Abäng mhnün kti Pangsiim hjok khah vai jah ah khuut poh vaia ksah-a ah mhnün msenge akse-e sun jah hjok khah ktie. Angshääia aksüün vaai tä lü Pangsiim mküüi mtou vaia looi ngkäih kti ni. Amen.
26 Asun kba ah nih thoon ua phäh Pangsiim noh ngke ei na-phyak kti ah nih hlü eia hnu ah nih läk vaia ah jah hoih-in ni. Nghnu mie phi thuum khoi hoih ulü nghnu mi khye khye nghüüi ngtäm ktie.
27 Kpa mie phi nghnu mi käh ve püi ulü kpa mi alang lang nghüüi ngtäm onga suk kshou kkhüt ktie. Asun kba mat jah mat ngke kkhyak ei na-phyak ktia mkhye mshoh ah nih poh-a phäh Pangsiim noh ah nih puum sha üng looi ngkäih ktia mtaam ah jah peet ni.
28 Pangsiima mong kshing vai sun am suh lih ei ulü ah nih pum ngyam nghmoong lo lü jah ngke kkhyak ei na-phyak kti mkhye mshoh ah nih poh-a phäh Pangsiim noh ah jah hoih ni.
29 Kkhyaange noh amjü kküma mkhye mshoh lok kkhüt ktie. Asune sun shou shat ulü kpaam ei kkhüt ktie. Püi ngnei naak, ngkeei ngku, kkhyaang hnim, ngtuun ngvook, mhleei mhlak, ngtuui ngten, sok sek amjü kküm poh ktie.
30 Püi thang mseh ei ulü Pangsiim thi nak ktie. Kkhyaang nghnge naak, sam sah, pa kkhyap ulü kkhyaanga kkhaana i hok kba am do kti i kah poh khoh ham kkhai ve mä tia ngngaai kyet ktie. Nu pa-a ti pyen am ksang na-u.
31 Ah nih lu sing lü kkhyü shing üng am ve u. Püi po am mhlä kphya na-u. Püi ng'ye püi be am poh ti u. Mpyeen ei naak am ve.
32 Asun kba mkhye mshoh poh kti hin Pangsiima thuuma kba thi-yah kkhai ati sun kshing kyo ktie. Asuna kyalüphi ah nih pät däk noh ah nih poh-a thea akse-e noh ah nih poh vai phi hlü ei ham ktie ni.