1 Akpäih naaka ta kah be naeo, Booi Pa üng je kyai ua. Kah yuk khoi kah yuk be be vaia am dam ngü. Nang nih-ea phäh-a ta do kti ni. 2 Thang kdo kkya kpyaü ktia hana ngsom kti, vun moih aktung boka ngngaai lü am pyuun ktia kkhyaang, uia phonge sän jah mphen ubä. 3 Nih nih-e hin vun moih ksang nih khaam ei ktie ni. I lüni ti ta nih nih-e hin Mkhyangsiim üng Pangsiim nih hjok khah ktie. Booi Jeishüh-a dä nglooi ei naak üng nih je kyai lü nih nih-e noh kkhyaanga poh khoh jah hmuh yah ngshing ngte naake hin aktung boka am nih ngngaai u. 4 Lüphi kah poh mshah üng kkhyaanga hmuh yah khoh hin aktung boka kah taak hlü ta kho hah vek kti kyo va. Mat mat noh puum sha ngshing ngte naak üm nak ktia ah ngngaih ta keia veei asun vebok kti ni. 5 Kei ta kah hmi jah amhnüüp kkhyet üng vun moih kah khaam ei kti. Kei hin Isare mjü, Ben Jaming koon, Hepye kkhyaang ksang ksang ni. Pangsiima thuum üng nih pyen lolüphi kei hin Pharishe ni. 6 Pangsiima phäh-a mtun ei ngüshe Khritoa shaang ngsiim kah mkhuh mhlih bok khoi kti. Pangsiima thuum läk naak üng kkhyaang hin pyuun khoh-a athoon ta kei hin üng kbäü ei naak vai laang i am ve. 7 Lüphi kei noh ahlaan üng küüi bok ktia kah ngngaih khoie sän Khritoa phäh üng tuh-a ta shum naaka kah ngngaih be ni. 8 Kah Booi Pa Jeishüh aksanga kshing hmat naak hin abängea kthaka phu mah ktia thoon lü akse-e ta kah shum naak ni. Khrito sun kah yah vaia akse naküt hin bi booia ngngaai lü kah jah xot-in ni. 9 I lüni ti ta ah nih-a dä angseeia kah nih nglooi ei vaia phäh ni. Kei hin noh thuum läk ngüshe päta mtun ei üng yah khoh-a pyuun naak kei üng am veti. Tuh-a kah pyuun naak hin ta Khrito kah üm naaka phäh üng Pangsiim noh ah nah peeta pyuun naak ni. 10 Kei noh Khrito jah ah mthoh naak bea hiit sun kah kshing hlü bok kti. Khritoa dä khui kha khaam lü ah hlonga thih naak sun i ni atia kah dang yah hlü kti. 11 Kah pät kuung thih naaka kkhyüh nah mthou be kkhaia kah ääp ei kti.

12 Kei noh akkhaana kae hin kah jah kshing päih atia am ve. Kah küm seei pääng kti atia am ngngaai ei ngü. Lüphi Khrito noh nah van nalü ah nah büün peet küm seei naaka kah pha vaia kah mtun ei lä kti. 13 Kah be naeo, kei noh kah yah päih hnüh kti atia am ngngaai ngü. Lüphi ahlaan üng kae jah hoih hüt ngüshe kah hnua jah ta-hüt lü ma da don vaia khyaih khoh säpa kah mtun ei kti. 14 Pangsiim noh ah nah peeta kheen yah khoh vaia büün naak sun pha vai mtun ei lü kah dong kti ni. Asuna kheen sun yah vaia Pangsiim noh Booi Jeishüh-a thih naak üng kkhaan kho da jah khü kti.

15 Ah jum ei naak däm kti naküt asun kba mkhüh naak vai hlü kti ni. Akhäke noh akse ah nih mkhüh naak ta Pangsiim noh nang nih-e üng asun phi ning jah mhnüh kkhai. 16 I a thoon lüphi nih nih-e tuh vei säpa büün naaka nih pha vaia nih seh-a kba tuh kkhyüh lüphi nih sit lä vai u.

17 Be naeo, keia ning nah läk lü ve-ua. Nah nih läkea ve soh jah bük ua. 18 Kei noh nang nih-e kah ning jah mtheh lä ni. Tuh phi kphyü tui üng kah ning jah mtheh be tü u ni. Akhäk ta ah nih ve soh ngnei shak üng Khritoa baan lam ktunga yea thoon ktie atia ngte lok kti. 19 Asue sun akpäih naaka ta sim pyak lok kkhaie. Ah nih hjok khah-a mhnam nu ta ah nih lo k'o ni. Ngke ei na-phya kti üng pa kkhyap ktoih ktie. Kho mdek üng shääng ei kti siim siim nghnga nak ktie. 20 Nih nih-ea phäh anghläia nih ve naak vai ta kkhaan kho ni. Nih nih-e jah kuum kyan kti Booi Jeishüh kkhaan khoa kkhyüh ah kyum lo vai anghläia nih yüng ei lü nih ääp ei ktie. 21 Ah nih sun noh sim pyak khoh kti nih nih-ea puum sha sun hlai lü jou taai mah kti ah mti sha-a kba jah pyaang kkhai ni. Asun kba ah jah pyaang vaia abänge hin apäta mkha kkea ah taak naak vai ah hiit shum ei kkhai ni.